1 Thessalonians 5

Ghita Da Toraina Va Tana Ghini Ia Leghu Meha Ka Ia Lod

1Eka torai mala kakangava ghidi age ghu ghai ka ghau tahimairo mu, niha ta dufura ira fafata nia ravata, e ghua. 2Vununa ghau to avoho va vehai mu, ta la mehana ia ravata ta ke la leghu mehao ia Lod taghe kaike noni ta sisiko ka ia redu ta ghuana ka ia fafata ta au melukai ghita. 3Ka ia ta kahe ghua iahi ira noni, “Vahina leghutau nga mu to puina veha nia bule e ghua,” ka ia ta ghuao maneri ghe, pakata, ge age ghua nga dufurina ia fafata mala va mukori, taghe ta ghua niala ia karatana va doli rekaha ka ia fotati ta zezeana. E deo ghu boka pelo ghinina.

4Ghe ghau tahimairo, ghau e deo go au ghu ka ia nagoromo ghidira leghutau irahi, nia ghau e deo go age kakazara ghini ghu ghatu e ghua, ia ravata ta ke la leghu mehao ia Lod taghe noni ta sisiko, ia ta ghua. 5Vununa ghau haroharo mu nona rekaha ia fegala nia ia ravata e ghua; ghita mu eka nona ghu ia nagoromo nia ia redu, e ghua. 6O va tana ghu, oka fatadi la ghu ira ta epu melukai. O baghunu ghu auna ka ia avoavoho. 7Ira noni edi epu ka ia redu nia kehara gedi fani ketuhu gogosu ghu ka ia redu, e ghua. 8Ghe ghita ira ta au ka ia fegala, da au ka ia ngangana ta kalasa. Taghe ira mane magara ta va tanai magara, da ghua molamo da toraina va tana ghu. Ira mane magara mu edi fani va vona poko mala magara, mala bara kaputurira ira tinidi. Geala da ghua molamo ianimu, da va tana ghu ka ia noda va hohoghona ka Zisas nia ka ia noda vari namahai, e ghua. Nia taghe ia mane magara ta barai la ia pauna ka ia tarapae magara da ghua molamo, geala da bara kaputuri ghu ira nganganada ka ia rangerangei Kraes, ta toraina hio va doli ghitana. 9Vununa God toraina to nai ghini ngangana ta mala hio va doli ghitana ka ia noda Lod Zisas Kraes, deona ge kabai va vavahagala ghita ghu ka ia haala. 10Zisas neke leme vanada ghita, da mala age au toghunai taremehana ghu, geta to leme ba doli nga ghita, ka ia fafata ke la leghu mehana manei. 11O vari va gigimai ghu, nia vari tokai ghu e ghua, taghe tato riva ghini nia lama ghau.

Va Nonoghana Tatangana Ka Polo

12Ghau tahimairo, o va vonavonari heiri ira ta babatu ghini ghau ka ia nona riva ia Lod. Maneri di riva va gigima vari hoataimu ghau, kahe ghini ghau va gigimana taka riva ghidira ghu ira ta muko. 13O heluhelu ghidi ghu namaha ghidira ka ira torai hihingomu, vununa ghidi ira riva ka maneri. Nia o nganai haro ta au varigharana ka ia bule.

14Ghau tahimairo, ghai na toraina fanga ghau ta ngengene va gigimarira ira noni ta toali. Va gigimari ira ta mamaghu, fini suteri ira ta paeke, nia oka magali haligho ghu ka ira noni haroharo, e ghua. 15Mato va veha, oka vari pahukai la ghu ka ira muko, nga o va sisiva tudu ma ta vari susute ghemuna, nia ta suteri harora ira keha noni, e ghua.

16Va ghazaghaza tudu ma nia 17tarai leleghu fafata, e ghua. 18Geta heve ta dufura ghe, o kudo vehai tudu ma God, vununa iahi mu nona lao nanafa manei vanamu ghau ira ta tagho ghau Kraes Zisas.

19Oka va nodoi ghu ia Tarunga Ta Maduana ta rivana ka vari hoataimu nira ghau. 20Oka sokeri ghu ira ta kaheri ira keha noni ta va hohoghona, neto va podolo vanadi la keha leghutaura ia Tarunga Ta Maduana, 21nga o fini avohori, ne meha ka Tarunga Ta Maduana, ba deo, ta ghuana, ira leghu nonomoho ta kaheri nga ira noni, ne va podolo vanadi ia Tarunga Ta Maduana, ira ta ghua. Posi va gima ka ira leghutau ta veha. 22Au va takale ghu ka leghu kokolodi muko nga.

23Ara a tarai fangai ghu ia God ta bule, ta toraina auna ghau ka ia beana ka ira leghu ghaghahedi doli nga, nia ara a tarai fangai haro God, e mala va kalasa ghau kamoto ghu, ka ira hihingomu, ka ira tarungamu nia ka ira tinimu e ghua, e vuhai dufu ghu ia ravata, ta ke la leghu mehao ia noda Lod Zisas Kraes. 24God ta kudo ghau iahi mu, e age va ghuduvi mo ghatu nogu tarai ini, vununa manei mu e hohoghona.

25Ghau tahimairo, tarai toka ghini ghai. 26O ungene namahari ira leghu ta va hohoghona nga ka ia angoho beana. 27Ara a torai va kahe ghini ghau ghu ka ia babaolona ia Lod, ta izumina ghau leta iahi ka ira leghu tahida haroharo nga.

28Ara na tarai ta age vanamuna ia Lod Zisas Kraes ia varisute ta vanada kakato.