1Ti 2 | KjiSC | STEP | Ara a kusu fangaigho ta tarai toka ghidira ira noni haroharo. Fangai God ta toka ghidira nia ta va beanari haroharora e ghua, nia ta va kahe ghinina ta torai kudo vehaina agho ghidi maneri haroharo, e ghua.

1 Timothy 2

Ia Vari Va Kakaheina Va Totoana Ka Ia Suga Tarai

1 Ara a kusu fangaigho ta tarai toka ghidira ira noni haroharo. Fangai God ta toka ghidira nia ta va beanari haroharora e ghua, nia ta va kahe ghinina ta torai kudo vehaina agho ghidi maneri haroharo, e ghua. 2 Taghe iahi o ghua, tarai toka ghidira ira mane ginitaukela nia heiri haroharo ira ta auri mana e ghua, mala da boka au ghu ka ia doli ta au vanemoho ka ia bule, heluhelu ghinina God nia va vonavonarira ira keha noni, e ghua. 3 Kokolona tarai iahi mu e veha, e veha vanani ghu God ia noda Va Doli, 4 vununa manei ne kabai ghini ta hio va dolirira ira noni haroharo nia ta torai avohina maneri ia hohoghona e ghua. 5 Vununa kaike mo mu God ta auna nia kaike mo mu ta mala va bubulena ka vari hoataina God nia ghita, e ghua. Manei mu Kraes Zisas ia noni. 6 Manei neke va malumi taghonai ta lemena, ta mala tabara kaverira ghu ira noni haroharo ka ira muko maneri. Iahi lamu ia nonomoho neke vananio God malau iahi peka ka ia torai fafatana. 7 Ianimu lamu ghe neke faeteau nga God, taghe kaike mane nonomoho mala tuturi ghini beanana ia Nonomoho Ta Veha ka ira noni taka Ziu ghu, ghinina ia va hohoghona ta toraina hohoghona. Toraina hohoghogu ghu. E deo ga sesebo ghu.

8 Ara na kabai ghidi ira leghu noni nga hae ghe hae ghu ta tarai va tuhu vona kame ta kalasana ka God, ka ia deori vari mukoi. 9 Ara na kabai ghidi haro ira fotati, ta poko va totonuna ka ia ta fafahaka ka ira noni. Maneri geala edi toraina va vona poko va veha ka ira tinidi, nga eka ghua ghu ka ia ghaghahena ta mala va ngagungaguri ira mane mala kabai ghidira. Maneri geala edika riva ghidi ghu ira leghu kokolodi ikuiku kala nga nia edika va vonari ghu leghu kokolodi va sari ta puina vona tabaradi nga, taghe ira ta riva ghidi la ka golu ba bololodi davi, ba ta va vonarira ira poko ta puina vona tabaradi. 10 Ira fotati di leghui God ira ta ghua mu, geala edi riva ghidi ira riva ta boka toka ghidi ira keha noni.

11 Ira fotati geala edi au vanemoho nia unuhu edi ghua ghu, ka ia fafata ta vari va kakahei ira mane ta babatu ka ia kiloau va fafahakarira ira Kakangava Ta Maduana, va sisiva hio avoavohona maneri. 12 Ara e deo ga va malumuri ghu ira fotati ta kururina ia mana fatedi ira mane ka ia vari va kakahei maneri ghinina ia nonomoho ka God. Nga edi toraina au vanemoho ma edi nonomoho ghu. 13 Vununa God neke kusu va vuhaina Adamu, ghe neke va vuhai nga Ivi leghunana. 14 Nia Satana e ghua, eka la seke ghini mo Adamu, nga neke la seke ghini ia fotati mo, huhughi tuna mamu manei ia vetula ka God, neke ghua. 15 Nga ira fotati mu geala edi sute va vehari ma ira nodi rekaha. ^{▼▼2:15Polo ne kaheina aiahi mu, geala ira fotati edi au ka ia ghaghahena ta fatadi ira fotati, e veha vanani ghu God mu dito age riva ghini la maneri iahi.} Maneri geala edi rangerange tudu ma molamo ka Zisas, namaha ghidira ira keha noni, nia leghuina God, e ghua. Maneri geala edi au ghu ka ia doli ta lotoro ta totonu ka ia mato ira noni. Dito au la maneri ka kokolona doli ianimu, God e age hio va doliri ghatu.