1Ti 3 | KjiSC | STEP | Ngengene iahi mu e hohoghona: Hei noni neto kabai meha mane babatu la, manei ne kabai ghini ia riva ta toraina veha fuludu.

1 Timothy 3

Ira Ta Babatu Ka Ia Kiloau

1 Ngengene iahi mu e hohoghona: Hei noni neto kabai meha mane babatu la, manei ne kabai ghini ia riva ta toraina veha fuludu. 2 Ianimu lamu ghe, ia mane babatu ka ia kiloau mu e toraina veha puhina, mala e deo ghu hei ta boka ngengene va mukoina manei ka ira puhina, ne ghua nga. Manei e toraina kaike ghaseborona ma nia e hohoghona ka keranau, e ghua. Manei e toraina au banabana, kurui ngangana, nia veha tuturina, e ghua. Manei e hio suteri ghedi ira keha noni nia manei e boka vari va kakahei haroma, e ghua. 3 Manei e toraina deo ge suri ketuhu gogosu ghu, nia eka tuma ngaziri ghu e ghua, nga geala e au namaha ma, bule ma, nia eka hagalai rongo ghu, e ghua. 4 Manei e toraina kopu ghini va veha ia fototatamana ka taghonai nia e finiri ira tuuna ta ungene nonomohona ka taghonai ka ia va vonavona ta totonu. 5 ?Vununa hei noni neto deo la ge boka kopu ghini ghu ia fototatamana ka taghonai, heve e ghua manei ghe ge boka kopu ghini nga ia kiloau ka God?

6 Mane babatuna mu eka ghua ghu ia noni ta bake haghele mo ka ia kiloau, vununa neto ghua la ianimu, manei e boka age hadu varanga mo ghatu, nia tetu God ge age va vavahagali ghu tuna manei e ghua, taghe neke ghua ghinio la ia Faghinadi ira nazahi. 7 Manei mu geala kaike noni ta veha ta heluhelu ghini ira noni peghuruna ia kiloau, e mala deo ghu la hakena manei ka ia mamutu ia Faghinadi ira nazahi, mala maneri e deo ghu gedi ungene va mukoi ghu taghonai.

Ira Ta Toka Ka Ia Kiloau

8 Ira nenemadi noni mala toka ka ia kiloau mu, taghe ira ta babatu la, edi ghua molamo edi veha ghu ka ira dolidi, mala ira noni edi heluhelu ghidi ghu. Maneri edika turi lao meha ghu, edika ketuhu fuludu ghu gedi age gogosu ghu, ba, edika lulutoi rongo ghu, e ghua. 9 Maneri edi toraina va hohoghonai nia leghui e ghua ka ia toraina hihingodi kamoto, ia nonomoho ka God neke va podolo vanadao. 10 Ghe ge vanadi nga ia papala ira nenemadi noni mala toka, maneri edi kusu fini avohorina nga, edi boka riva va veha mo, ba deo ta ghuana. Dito riva va veha la, to deo ghu heve ta fini va mukoina ka maneri, ghe go va malumuri nga ta hioina maneri ia papala mala toka ka ia kiloau.

11 Taghe iala edi ghua molamo ira ghaseborodi, edi au va lotoro ghu, nia edika turi va mukori ghu ira keha noni, e ghua, mala ira noni edi heluhelu ghidi haro ghu. Maneri edi toraina au banabana ghidi taghodi nia edi toraina hohoghodi ka ira vahina leghutau ta riva ghidi nga, e ghua. ^{▼▼3:11Ka papaguaina iahi mu haeba Polo ne tuturi ghidi ira fotati ta toka ka ia kiloau, nga eka ghua ghu ira ghaseborodi ira mane ta toka ka ia kiloau.}

12 Ia noni nenemana mala toka ka ia kiloau mu e kaike ghaseborona ma nia e toraina hohoghona ka manei e ghua. Manei e toraina boka kopu ghidi va veha ira tuuna taghonai nia heiri ira ta va ghighiu ka manei, e ghua. 13 Ira noni faetaidi ta mala toka ka ia kiloau, ta riva va veha ghu ka ira nodi riva mu, edi age veha tuturidi nia edi boka ngengene va nadu ka ia mana e ghua, ghinina ia rangerangei Kraes Zisas, deona gedi maughedi ghu.

14 Na kabai magali age sigho ghinigho ghe, ato kakangava vananigho ma ungene babatu irahi mala leghurira agho, 15 mala nato mamahuge la ara agena, agho ghatu o age avohi heve e ghua au va totorongotaina ka giliona ia nona butubutu God. Iahi lamu ghu mu ia kiloau ka God ia ta doli. Taghe ira sutuna nia ia pakaraina lama ia suga verevere ka ia kiloau ia ta zuka ghini va gima, mala va ghuduvina ka ia ghaghahena e mala ghua neke ghua ghinio, e ghua molamo ira nona noni God, edi zuka ghini ghu ia nonomoho ka manei, e mala au va gima ghu va ghuduvina ka ia ghaghahena e mala ghua neke ghua ghinio God, ghe neke va mehaino nga.

16 E deo notohona ghu. God neto ke va podolo vanada ia popoikana ta torai tongovona ghini Zisas Kraes:

Taghe ia ta kahei la ka ia koze:
Kraes neke podolo ka ia vilahi,
nia ia Tarunga Ta Maduana neke va podoli Zisas ta Tuuna Manena God.
Ka ia tetuleghu manei ka ia leme, ira engizeli dike finini manei.
God neke hio vonai ka ia nona malau fate.
Ira ta leghui manei dike tuturi beana ghini ia nonomohona manei ka ira soloso,
dike va hohoghonai ghu manei ira noni ka malau iahi peka.