1Ti 4 | KjiSC | STEP | Geta ghua mo ianimu ghe, ia Tarunga Ta Maduana ne va kahe ghini ghita va totonu ta age taghuru kainina ghatu kehara ia nodi va hohoghona, ka ira ravata va nonoghadi. Maneri edi age leghuri ghatu ira tarunga ta sesebo, nia ira vari va kakahei ta meha ka ira nazahi, e ghua.

1 Timothy 4

Banabana Ghidi Ira Noni Vari Va Kakahei Ta Sesebo

1 Geta ghua mo ianimu ghe, ia Tarunga Ta Maduana ne va kahe ghini ghita va totonu ta age taghuru kainina ghatu kehara ia nodi va hohoghona, ka ira ravata va nonoghadi. Maneri edi age leghuri ghatu ira tarunga ta sesebo, nia ira vari va kakahei ta meha ka ira nazahi, e ghua. 2 Noni vari va kakahei irahi mu, edi tatangana kobiri nia edi sesebo, e ghua. Maneri to deo ma gedi age avohi ghu di vari va kakahe ghini mo ia ta lotoro, ba ta muko ta ghuana, vununa ira nganganadi mu to lemedi, taghe ta ghua nia lama ia vilahi ta sito va kogavi, tato age deo ghu heve ta va ghilaghilaina, dito va sito ghini lao aeana ta sisito la. ^{▼▼4:2Polo deo geke suna va kahe ghini ghu ma ghu Timoti, taghe ira porofeti ta sesebo edi la meha keha ravatara, ta ghuana. Maneri mu to kusu au mo aianihi Efesasi, ka neke au ani Timoti. Maneri mu kaike mamarutana neke to kusu au mo neke au ghu, taghe neke kangavio la Polo ka hori 1:3a-7c. Neke kaheina Polo mu, leghu irahi nga mu dito ke dufu ma to au ghu, taghe neke toraina kaheio la ia Tarunga Ta Maduana, e age ghua mu ghatu, neke ghuao.} 3 Ta kaheina maneri mu, e zea ta varihiona nia ta mahairira ira keha ghano e ghua, edi ghua. Ghe God neke va vuhari ghano iranimu, mala mahairira ka ia kudo vehai ira noni ta avohi nia ta va hohoghonai ia hohoghona, e ghua. 4 Vahina leghutau neke va vuhari nga God mu, edi veha, geala e deo ghu heve tei ta sokeina ghita dato hiori la ka ia kudoveha. 5 Vununa God neke kaheina ka ira Kakangava Ta Maduana mu, ia varihio nia ira leghu ghano nga e ghua mu edi vehadi haroma. Dato kudo vehai la ghu God ghita ghidira leghutau irahi, ghita da kaike hihingo taremehana God ta vehadira, ta mala hiorira ghu ghita.

Ia Nona Noniriva Ta Veha Kraes Zisas

6 Noto va fafahaka vanadi la agho leghutau irahi ira tahida, agho mu o age nona noniriva ta veha Kraes Zisas. Agho o age va podoli ghu noke faa vonana agho, ka ira vari va kakaheina ia noda va hohoghona nia ka ia leghuri ta au ghu agho ira ghaghahedi ta veha, e ghua. 7 Oka nonomoho lao ghu ka ira tuturi ta deo lighorodi nia deo fafahakadi e ghua. Nga o riva va ngazuluai, mala va gigima laoighonani taghou, o boka nomohi ghu God ka ira vahina leghutau nga. 8 Agho geala o riva ghini iahi, vununa to avohi agho, ira noni edi fani kahe ghua iahi:
“E veha
ta va gigimari tudura ghita tinida idi,
ghe e tongovona laoni
ta va gigimarira ghita ira dolida ka ia tarunga,
vununa e age toka ghini ghita
ka vahina leghutau nga.
E naiungene vanada leghutau ta veha ka ia doli ghatunaina,
nia ka ia doli ta la meha ghatu, e ghua.”

9 Iahi mu e hohoghona, geala ghita haroharo da kabai ghini ghu. 10 Ghita da riva va ngazuluai nia ghorevaha e ghua, edi mala va hohoghonai ghu ia hohoghona ira noni, vununa ia rangerange ka ghita mu e lao ka ia God ta au toghunai, ia Va Doli ka ira noni haroharo, sughavona ghu ka heiri ira ta va hohoghona.

11 O ungene va gigima nia vari va kakahe ghidi leghutau irahi, nia o ungene va gigimari tuna maneri haroharo, ta mala riva ghidira heve ta kaheri nira agho, e ghua. 12 Oka va leleghu ghini ghu hei noni ta fini hinaeighona, vununa ta mane foforu nia agho. Agho mu edi mala age fifini kadolo ka ira noni kiloau ka heve ta vari va kakahe ghidi nia riva ghidira agho, nia ka ira nou namaha, va hohoghona, nia puhiu ta lotoro, e ghua. 13 Ghe ga dufu age nga ara aiamuhu, o au va nadu izumu vananina ia kiloau ira Kakangava Ta Maduana va gigimarira nia va kakahe ghidira e ghua, ira ta va hohoghona.

14 Oka nai kakatoi ghu ia nona kaikadolo ia Tarunga noke hioio ka ia fafata ngengene ira porofeti, dike va beanighono ghu ira mane babatu ka ia kiloau ka ia va fara ageri ira kamedi ka paunia. 15 Agho o toraina ngana tahuri leghutau irahi. O nakai laoigho taghou ka ira nou riva, edi age fini ghu ira noni haroharo ia rizu vai kenuna ia riva ka agho. 16 O banabana ghini ia au doli ka taghou nia ghidi ira ta vari va kakahe ghidi agho, e ghua. O au va gima ghu ka doli irahi, vununa noto ghua la ianimu agho, God e age hio va doligho agho nia heiri ira ta nomohigho, e ghua.