1Ti 5 | KjiSC | STEP | Oka puina rarautu ghini ghu hei ia ta mamanekusu, nga o va kahe ghini ma ka ia ghaghahena ta namanama heluhelu ghinina, taghe nou mama ta ghua ghinina. Taghe tahiu mane taghoughi o ghua ghidi ira mane foforu.

1 Timothy 5

E Ghua Iahi Ta Riva Ghinina Ka Ira Noni Kiloau

1 Oka puina rarautu ghini ghu hei ia ta mamanekusu, nga o va kahe ghini ma ka ia ghaghahena ta namanama heluhelu ghinina, taghe nou mama ta ghua ghinina. Taghe tahiu mane taghoughi o ghua ghidi ira mane foforu. 2 Taghe nou uke o ghua ghidi haro ira ghasekusu, nia taghe kerau fotati taghou o ghua ghidi haroma ira rekaha ghase foforu e ghua, filu ghidira ka ira leghu kokolodi doli nga ka ia toraina hihingo ta fegala.

E Ghua Iahi Toka Ghidira Ira Nabokodi Fotati

3 Kopuna ghidi ira nabokodi fotati ta malanga ta deo hei ta hio suterira. 4 Nga neto au la keha tuuna ia fotati ta naboko, ba, keha tuudi ira tuuna, geala va kenuna rivana ka maneri mu, edi riva vanani God kopuna ghinina ia fototatamana ka taghodi, ke lifu leghuri ghu ira baelu ka nodi mama ghe nodi uke dike kopunai ghidiro, vununa ianimu lamu ta veha vananina God.

5 Nabokona fotati ta toraina malangana mu, ia ta deo taremehana ta au kakaike ghu rangerangena ka God, tarai fangaina redu ravata mala toka ghinina. 6 Nga ia nabokona fotati ta nganai va ghaseghase mamu, to leme ia tarungana, geta doli ghu manei. 7 O vanadi ira noni kiloau ungene babatu irahi, e deo ghu muko ta boka va zutu ghidira.

8 Heiri ira taka suteri ghu ira taremehadi, sughavona ghu ira fototatamana ka taghodi, dito age nai kaini ia nodi va hohoghona. Noni ta ghuara irahi mu, to age muko laoni ira riva ka maneri fuludu laorira ira ta riva ghidi ira noni taka va hohoghona ghu ka Kraes.

9 Oka va malumi ghu kaike fotati nabokona ta au taremehadira ira fotati nabokodi ta au ka ia pukuna ta toka tudu ira noni kiloau, neto deo la manei ge fuludi ghu onomo ngavulu komuhuna nia neto ke deo la manei ge hohoghona ghu ka ia keranau, e ghua. 10 Ira leghu noni nga edi toraina heluhelu ghini, vununa ghidi ira leghu kokolodi veha neke riva ghidiro nga manei, taghe pausu va vehari ira nona rekaha, hio suteri ghedi ira keha noni haza, riva vanadi ira nona noni God ka ia unuhu ka ira tehi ghaghahedini, toka ghidi ira ta kururi mamarutana nia va tana tudu riva ghidira vahina leghutau ta veha nga, ia ta ghua.

11 Ira nabokodi fotati ta foforu mu geala edi deo gedi au haghele ghu ka pukuna nabokodi fotati irahi, vununa ia ngagungaguna vilahi ka maneri neto ke kabai varihio leghu la, maneri edi age kodaki ghatu ia naiungene dike riva ghinio ka Kraes, eka ke varihio ghu ia ta ghua. ^{▼▼5:11Ka ia fafata foforuna nga ia Kiloau ka Kraes ira fotati nabokodi edi boka au haghele mo ka ia pukuna fotati nabokodi ta toka ghidi ia kiloau. Ge haghele nga ka pukuna fotati ta nabokodi irahi mu, maneri edi nai ungene mala riva vananina Kraes ia kamotona fafata ka maneri nia nai ungene haro ta deona ke varihio leghunani e ghua, mala edi kalasa ghu deona va rugusirira ka ira keradiau ba ka ira rekaha.} 12 Leleghonana mu, God e age fateri maneri ghatu, ka ia deo maneri gedi riva ghidi ghu heve dike nai ghidi ungenero. 13 Kehanani e ghua, maneri edi age namaha ghini ia toali nia ia liloho lao meha ka ira leghu suga nga, e ghua. Eka ghua ghu ma irahi, maneri haro edi turituri noni nia taghodi ma ta avohorira vahina leghutau nga edi la ghua haroma ka ira nodi riva ira keha noni, kaherira ira leghutau taka mala kaheri ghu maneri. 14 Ta va kahe ghidira ghu ara nabokodi fotati foforu irahi mu, edi ke varihio leghu ma edi nai rekaha ghu, nia au kopuna ghidi tuna ira keradiau nia ira tuudi ka ira sugadi, e ghua. E ghua iahi ghe ge deo nga ungene va muko ghitana ira ta kana ghini ghita. 15 Kehara ka nabokodi fotati irahi mu, dito ke age nodo leghurira ira au doli ta kabai ghidi God ta riva ghidira maneri, to age tataniga riva ghidi ghu ira leghutau ta kabai ghidi Satana mo ta riva ghidira maneri.

16 Kaike fotati kiloau neto au fotati taremehana ta nabokodi la, manei e toraina kopuna ghidi, eka va fate laoi la ghu ka ia kiloau riva ianimu. E ghua ianimu ghe ge boka torai hio suteri nga ia kiloau ira nabokodi fotati ta toraina malanga.

Ira Ta Babatu Ka Ia Kiloau

17 Ira ta babatu ka ia kiloau ta riva va veha ghu mu, geala edi heluhelu ghidi nia tabara va vehari e ghua, sughavona ghu ira ta tuturi beana nia ira ta vari va kakahei, e ghua. 18 Vununa ne kaheina ka ira Kakangava Ta Maduana mu, ne ghua iahi, “Oka piliga kaputi ghu ia mangana bulumakau ta mahai ghenana, noto hioi la mala la dekedeke va kafurira ira fuadi witi.” ^{▼▼5:18 Vetula 25:4} Nia kehanani mu iahi, “Ira ta riva mu edi mala hiori ira tabaradi.” ^{▼▼5:18Ira mane ponogara edi hiori ira bulumakau mala koroho pakena ka ira nodi sare ta numa ghidi witi. Maneri edi hio bulumakau haroma mala sipa kaverira ira fuadi witi ka ira hekedi. Iahi mu edi riva ghini maneri ka ia fafata ghaghahe ira bulumakau ka ira tabaladi ta ngaru fatedi ira witi, nia ka ia korohi ia selezi ka fatedi ira witi, e ghua. Pekadi ira kipedi hekena selezi mu, ira kipedi ghahipa ta ngaru, ta mala toka kodakarira ira hekedi witi, ta mala zoghu fuludu hinaena ghu peka ka kavao ira subudi witi ka ira hekedi.}

19 Oka nomohori ghu ira vari makutu ta va kahe ghini lao maneri ia noni ta babatu ka ia kiloau, neto ka meha la ka palu, ba lito noni. 20 Hei ia ta babatu ta rivai muko ma ta au ghu mu, maneri geala edi ke va totonui ka kenudi ira noni kiloau haroharo, taghe mala va mamaghuri ta au banabanana ghu heiri haroharo.

21 Ka kenuna God nia Kraes Zisas nia ira faetaidi engizeli e ghua, ara a toraina kahe ghinigho va gigima ta leghurira ungene babatu irahi, nia taka kaike pelona ghu toka ghidira ma ira ta veha vananigho taghou, e ghua. 22 Noto faeti la ia noni ta mala riva vanani ia Lod, oka bobolo nai laori ghu kameu nira taofinina. Oka holara taremehadi ghu ira keha noni ka ira muko ta riva ghidi maneri. O sute va mamalahuigho taghou.

23 Ghe oka ketuhu kolo ketuhu ma ghu, nga o ketuhu birusuna waeni haro molamo mala toka ghinina kokoilou ta muko nia, nia ira keha fogara ta fani dufuigho, e ghua.

24 Keha nonira mu edito va podolori ma ira muko ka taghodi, to avohori ma ghu leghu noni nga. Agho o age avohi haroma ghatu, ghe ge age dufu nga ia fafata ta mala hadu kaveri agho ira puhidi. Nga ira muko ka ira keha nonini mu, leghunana ghe gedi age podolo nga. 25 E ghua molamo e avoavohoana haroma ghu mu ira riva ta veha ka ira keha noni, ghe keha riva ta vehara ka ira keha noni mu edika podolo ghu, nga leghunana ghe gedi age podolo nga.