1Ti 6 | KjiSC | STEP | Ira noni ta mala varituhu ta noni kiloau ghu mu geala edi toraina heluhelu ghidi ira ta taghori maneri, mala eka age va haghavi la ghu ia babaolona nia ia nona vari va kakahei God, e ghua.

1 Timothy 6

Tatangana Maladi Ira Noni Kiloau Ta Mala Varituhu

1 Ira noni ta mala varituhu ta noni kiloau ghu mu geala edi toraina heluhelu ghidi ira ta taghori maneri, mala eka age va haghavi la ghu ia babaolona nia ia nona vari va kakahei God, e ghua. 2 Dito noni kiloau haro la ira ta taghori ira noni mala varituhu, ira noni mala varituhu edi toraina heluhelu ghidi haroma, nga edika ungene va mukori ghu, ngangana ghuana iahi, “Ghai mu varifata haroma ka maneri a tatahina haroma ghu ka Kraes,” ta ghuana. Nga geala edi riva va gigima vanadi laoni, vununa maneri di toka ghidi haro molamo ira ta va hohoghona nia ira ta namaha ghidi maneri, e ghua. Agho o vari va kakahe ghidi leghutau irahi nia va kahe ghidi ira ta va hohoghona ta riva ghidira, e ghua.

Ira Sesebodi Vari Va Kakahei Nia Ira Taghotagho Ta Hohoghodi

3 Keha ta sesebora ka ira ta vari va kakahei, haeba edi va sesebori leghu irahi nga, ghe irahi mu ira torai vevehadi nia namanamadi ungene babatu ka ia Lod Zisas Kraes e ghua, ia torai vununa ia doli ta veha vanani God. 4 Hei ta vari va kakahe ghidira ira keha leghutau ta haza mu, ne hadu varanga nia deo ta avohina, e ghua. Ira nganganadi to age zea, to kabai vari tuufuai ghidi ghu ira ngengene. Kokolona riva iahi mu e age ghuduvu ka kakabai, magara, va vuvuha turi, nia mamata ta muko fuludu, e ghua. 5 Noni irahi mu edi va vuvuha muko tudu ma. Ira nganganadi edi sota edika kahei la ghu ia hohoghona. Ka maneri mu, kiloau ini mu e mala hagete taghotagho ma, edi ghua.

6 Ghe dato leghui la ghita God, ghita da puina age taghotagho ghini ia va manemane, dato hovi ghita la ka ira heve tato kusu taghori. 7 Vununa e deo heve dake hio mehaina ghita ka malau iahi peka, nia e toraina deo haroma molamo heve ta ke hio leghuina ghita ka lemedao, e ghua. 8 Neto ghua la ghu ianimu, dato va manemane ghidi ma ghu heve ghano nia poko e ghua, ta kuru ghitara. 9 Ghe ira noni ta kabai taghotagho mu, edi zoghu kolanga ka ira leghu kokolodi auau nga, va hakerira taghodi ka ira tehi leghutau ta kingo nia lelemeana ta hagala ghidi maneri, koroho ghidi laora taghodi ka ia doli ta toraina va mukori nia ngovalari, e ghua. 10 Vununa ia hagalai rongo mu, ia zaghara ta la meha ira leghu kokolodi muko nga. Keha noni ta hagalai rongora tuna, gedito age ghahe kaini ghu ia va hohoghona gedi age va vavahagalari ghu taghodi ka ira leghu nodi muko hihingo nga, e ghua.

Ta Torai Riva Ghinina Timoti

11 Agho Timoti mu nona God, o au va takale ghu ka leghu muko irahi nga. O toraina va sisiva deke leghui God, e veha vanani ghu manei ka agho. O au ka ia doli ta lotoro, ta namaha, ta nadu nia ta varisute, e ghua, ka ia va hohoghonai God. 12 Magara ghini va veha ia ta va hohoghonai ghita. O poposi va gima ka ia doli soduai neke vananighono God, ka ia fafata kahe kave va vehai agho ia nou va hohoghona ka kenudi ira tehi noni. 13 Nia ara a toraina kahe ghinigho va gigima ka kenuna God, ia ta vanadi doli ira vahina leghutau nga, nia ka kenuna Kraes Zisas neke turi ghini kaveo ka Ponitiusi Paelati ghini ia nona va hohoghona e ghua, 14 ta leghu va veharira agho ira nona ungene va gigima ka ia doli ta mamalahu, e vuhai ke leghu meha ghu ia noda Lod Zisas Kraes. 15 God lamu ta ke va leghu mehaina Kraes ka ia torai fafata neke faetio. God mu ia ta helahela ghini ira nona noni nia manei lama mu ia God ta maduana nia torai mana, e mane ginitaukela kaputuri ghu ira mane ginitaukela haroharo, nia e faghina kaputuri ghu ira faghina haroharo e ghua. 16 God lama mu ta doli fuludaina, e au ghu ka ia fegala ta deo hei noni ta boka namo laoina. E deo nga hei neke to finina, ba, ta boka finina. Nona manei ia heluhelu nia ia mana ta au toghunai. Amen.

Tatangana Maladi Ira Ta Taghotagho

17 Ungene va gigimari ira noni ta taghotagho ka malau iahi peka, edika hadu varanga la ghu, nia edika rangerange la ghu ka ira nodi rongo ta age nogha magali ma ghatu, e ghua. Nga geala edi rangerange ka God ta va taghotagho ghitana ka ira vahina leghutau ta malanga ghidi nga ghita, mala va manemane ghitana. 18 Ungene va gigimari edi va rivari ghu ira nodi rongo ka ira riva ta veha. Maneri geala edi taghotagho ka ira riva ta veha nia geala edi vavaliha e ghua ka ira ta malanga, va tana tuduna tufari ghedira ira keha noni ka ira heve ta vanadi God. 19 Ka ia riva ghini iahi, maneri di nai teghina ia nodi bokaboka taghe pakarai ghini va gimana ia veha malana keha nareo, edi boka hioi ghu ia torai doli ta hohoghona.

20 Timoti, kopu ghini heve neke vananighono God. O peholo ghidi ira turi ta kingo taka heluhelu ghini ghu God nia ira nonogele ta deo fafahakadi e ghua, taghe avoavoho kenudi, ira ta ghua ghidi ira noni ta goraigho. 21 Keha nonira dito ke age ghahe va zea ka ia va hohoghona, ka ia leghuri maneri kokolodi kingo iranimu.

Ara na tarai e age vanamu ghu God ghau haroharo ia varisute ta vanada kakato.