2Cor 10 | KjiSC | STEP | Kehara ka ghau no kaheina mu, “Polo mu eka ngengene va gigima ghu neto au taremehamai la ghai, nga neto au meha la varihau mu manei e toraina ngengene va gigima,” no ghua. E deo ge ghua ghu ianimu. Taghonai Zisas na neke varisutena nia vari amotona.

2 Corinthians 10

Polo Ne Taga Tetu Ghini Ia Riva Beana Ka Manei

1 Kehara ka ghau no kaheina mu, “Polo mu eka ngengene va gigima ghu neto au taremehamai la ghai, nga neto au meha la varihau mu manei e toraina ngengene va gigima,” no ghua. E deo ge ghua ghu ianimu. Taghonai Zisas na neke varisutena nia vari amotona. 2 Nia ka ghaghahena haro ianimula, ara Polo na fanga va gigima ghau ta holararira ira puhimu, mala aka age ngengene va gigima ghau la ghu ara ka ia mehagu. Nga ara a age ngengene va gigimari ira keha noni tadi kahei ara na riva taghe ira nonidi ka malau iahi peka na ghua, ira ta ghua. 3 Ghai mu na au mamu ka malau iahi peka, ghe ghai e deo ga magara ghu ka ia ghaghahena tadi magara ira nonidi ka malau iahi peka. 4 Ghai aka mala magara ghu ira leghutau mala magara ta riva ghidi ira noni ka malau iahi peka. Ghai mu na mala magara ira leghutau mala magara ka God ta toraina mana mala huararira ira leghutau ta gigima ka ira kana. 5 Ghai a va mukori ghu ira leghu kokolodi ngangana ta deo nga gedi hohoghodi ghu. Nia ghai a boka huara kai hinaeri mo ira leghu kokolodi ngangana ta va varavaranga nga, ta tetu kaputi ia avoavoho ghini God, e ghua. Nia taghe ta ghuania ta sakomo hiori nira ghai ira leghu nganganadi nga ira noni, ta toka ghidi ghu mala leghuina maneri ia ngangana ka Kraes, e ghua. 6 Nia ka ia fafata ta va podoli ghau ta toraina ungene nonomohona ghau ka manei, ghai a va tana ta va kilasina hei ia ta deo ge kabai ungene nonomoho ghu.

7 Mato laori ira leghutau hohoghodi ka kenumu ghau. Ghau o toraina fini avohi ta nona harona Kraes mu ghai, taghe ta ghua la heiri ira ta kahei taghodi mu nona Kraes molamo, ira ta ghua. 8 E hohoghona mamu ta hadu varanga ghinina ara ia mana mala kopu ta au ka ghai neke vanamaio ia Lod. Manei neke vanamai mana mala kopu iahi, mala va gigimaina ia va hohoghona ka ghau, eka mala va hinaei ghu ia va hohoghona ka ghau. E deo ghu ara ga haghava ghegu ghu mala rivana mana mala kopu ini ka ara.

9 Ara e deo ga kabai ghini ghau ghu ghau ta nganaina ara na va sisiva mamaghu ghau ta ghuana, ka ia fafata ta izumuri ghau ira leta ka ara. 10 Vununa kehara di kaheina mu, “Letara ka Polo mu edi puina tahu nia gigima e ghua, nga ka ia au tada mu, manei e paeke ma nia tuturira ka manei ge deo fafahakadi ma ghu, e ghua,” di ghua. 11 Kokolodi noni iranimu geala edi toraina ngana avohi, ta toraina age riva ghidira ara ghatu heve na kaherira ara ka ira leta ta kangava vanamu age ka ia age au taremehamu ara.

12 Ghai e deo ga kabai va fata ghini ghai lao ghu taghomai ka heiri ira ta toraina ngana va vonari taghodighi. Deo. Nga maneri mu di leghuri ira nganganadi taghodighi ka ia va fata lao ka ira puhidi taghodighi. !Ka kingodira!

13 Nga ghai mu, e deo ga helahela ghini ghai ghu taghomai ghidira ira leghutau ta deo gedi au ghu ka giliona ia riva neke vanamaio God. Ghai mu na suna helahela ghini ghai ma taghomai ka ia riva neke vanamaio God, ia ta mala toka ghini ghau haro ghau. 14 Helahela ta riva ghini iahi ghai mu geala e deo mamu ge lotoro ghu gake deo la ghai meha dufu maina ka ghau. Ghe ne lotoro mo, vununa ghai lamu kusu noni nake hio mehaina ka ghau ia Nonomoho ta Veha ka Kraes. 15 Ghai e deo ga helahela ghini ghai ghu taghomai ghidira ira riva dike riva ghidi va hokotoro ira keha noni. Nga ghai mu na rangerangei ma ta age gigima laonani ghatu ia va hohoghona ka ghau, mala ia riva ka ghai ka vari hoataimu ghau e age faa laoni ghu. 16 Ianimu tuna ghe ga boka la tuturi beana ghini nga ghai ia Nonomoho ta Veha ka ira keha malau ta toraina au varihau lao ka ghau, ka ia ta deo nga gedi la riva ghu keha nonira. E ghua ianimu ghe ge deo nga hei ta boka kaheina ghai mu na helahela ghini ghai taghomai ta ghuana, ghidira ira nodi riva ira keha noni. 17 Taghe ia ta kahei la ka ira Kakangava ta Maduana, “Hei ia ta kabai va varavaranga mu e toraina va varavaranga ghini ma heve neto riva ghinina ia Lod.” ^{▼▼10:17 Zeremaea 9:24}

18 Hei ta ghuana ia Lod ne helahela ghinina, manei lamu ne va manemane ghinina God, nga eka ghua ghu hei ia ta ungene va vonai taghonai.