2Cor 11 | KjiSC | STEP | Ara na kabai ghini ghau ta va malumu auna ta ngengene kingo birusuna laona ara. Uve, o va malumuau ta ghuana ianimu ara.

2 Corinthians 11

Polo Nia Ira Mane Nonomoho Ta Sesebo

1 Ara na kabai ghini ghau ta va malumu auna ta ngengene kingo birusuna laona ara. Uve, o va malumuau ta ghuana ianimu ara. 2 Na kakabai ghini ghau ara, taghe God la ta kakabai ghini ghau nia ghau. Vununa ara nake naiungene ta mala varihiona ghau ka kaike keramuau mo, manei mu Kraes. Vununa ara na kabai nai ghau lao ka Kraes taghe kaike kupi ta lotoro ta ghuana. 3 Ghe na maughini gheguna ara mu, gedi age sebo ghau la keha nonira, gedi batu ghini ghau kave ghu ka ia namaha malana Kraes nia ka ia ngangana ta gigima mala leghuina manei e ghua, taghe neke ghuao la ia adogho neke seke ghinio Ivi ka ia ngengene ta sesebo manei. 4 Vununa ghau no oho’oho ta va hohoghonana dito meha tuturi beana ghini la maneri kaike Zisas ta haza ka Zisas ta tuturi beana ghini iahi ghai. Nia ghau o va manemane ghini ma kaike kokolona tarunga mo nia kaike kokolona nonomoho ta veha mo, ta toraina haza ka ia Tarunga ta Maduana nia ka Nonomoho Ta Veha nake hio mehaio ghai ka ghau. 5 Ghe ka nganganagu ini ara mu, ira mane nonomoho ta tongovodi fuludu lao ira ta ghua ghidi mu, e deo gedi tongovona fuluduau ghu ara. 6 Ara mu haeba e deo mamu ga toraina vovoho tuturi va veha ghu, ghe ara mu e kuruau avoavoho mo ghinina Kraes. Ghai toraina to va podolo vanamu va veha iahi ka ira leghu ghaghahedi nga.

7 ?Ka ia nai va hinaeau taghogu mala va vonavona ghauna ghau ka ia tuturi beana ghini ia Nonomoho ta Veha ka God, ara deo gake fanga ghau tabara ghu. ?Heve, ara nake zea ka ianimu? 8 Ka ia fafata riva ara ka vari hoataimu ghau, ira keha noni kiloau dike vanagu tokana ka ira nodi kakai. Taghe nake sikori ira kakai ka maneri nake ghua ghu ara mala toka ghini ghauna ghau. 9 Nia ka ia fafata nake au tamuno ara, e deo gake fanga ghau ghu ka ia fafata deo au rongo. Vununa ira noni ta va hohoghona aianihi Masedonia dike hio vanagu meha ira vahina leghutau nake malanga ghidiro nga ara. Ara e deo kaike fafata tei ghu nake fanga ghau leghutau mala toka ghinaguna, nia e deo ga age riva ghini ghu ianimu keha nareo, e ghua. 10 Ka ia hohoghona nona Kraes ta au ini ka ara, e deo hei ka ia babarana Akaea ta age va nodoina va varavaranga ini ka ara ka ia ghaghahena ta riva ghini ara. 11 ?Ne heve ghe na deo nga ga va ghighiu ghu ka ghau ara? ?Nganganamuna ghau mu na deo ga namaha ghini ghau ghu ara, no ghua? !Deo! God ne avohi mo ta namaha ghini ghau fuluduna ara.

12 Nia ara a riva ghini ma a lao ghu ta deona ga fanga rongo ghu ka ghau. Iahi e age va nodori heiri ira ta hadui ia ghaghahena mala va varangari taghodi tadi kahei ghu di riva varifata ma ka ghai ta ghuana. 13 Kokolodi noni irahi mu edika hohoghodi mane nonomoho ghu. Maneri edi rivai sesebo ka ira nodi riva mala va fifini taghe toraina nona mane nonomoho Kraes ta ghua ghidira taghodi. 14 !Ghe ara e deo ga nogu fere ghu! Satana harona ghe taghe engizelina fegala ne ghua nga poikaina taghonai. 15 E deo ghu gada noda fere ghu taghe mane riva ta lotoro dito ghua la poikarira taghodi ira mane riva ka manei. Ka va nonoghanao maneri edi age hioi ghatu ia va kilasa ta fata ka ira riva ta muko maneri.

Ira Vavahagala Ka Polo Vanani Kraes

16 Ara ake kaheini: E deo hei geala ta va ngana ghinagu kaike noni ta kingona ara. Ghe noto ngana ghua la ianimu, o va malumu au taghe kaike noni ta kingo ta ghuana ara, a mala va varavaranga birusuna haro ghu ara. 17 Ghidira ira leghutau ta age va varavaranga ghidi ara mu, ara e deo ga leghui ghu ia ghaghahena ta ngengene ia Lod Zisas, nga na ngengene taghe kaike noni ta kingo na ghua. 18 Ghe vununa tehi noni fuludu di va varavaranga leghuina ia puhina noni ka malau iahi peka, ara a ghua haro ghu molamo ghatu. 19 Ghau taghomu no nganaina, no avoavoho fuludu no ghua, ghe ghau no va manemane leghurira ira ta kingo. 20 Ghau no va malumuri ghe ira noni ta mala varituhu ghini ghau kakato lao mehana, ba hio tamura vahina nomu leghutau nga, ba ta seke ghini ghauna, ba ta fini va hinae ghauna, ba ta tapala ghauna ka hihilimu nira. 21 Haeba no nganaina ghau mu e fata geala ta haghava gheguna ara ka ia va kahe ghini ghau ta deona ghai ga boka riva ghidi ghu ka ghau ira puhi ta muko.

Geta avohi ghu ara ta leghuina ara ia puhina kaike noni ta kingo ghe, ghatunaina ara a age ungene va varavaranga ghidi ira leghutau ta ungene va varavaranga ghidi maneri. 22 ?Maneri mu noni Hiburu? ^{▼▼11:22 Noni Hiburu ta ghua iahi mu e ghidi ira Ziu} Ara haroma. ?Taghodi mu noni Isiraeli, di ghua? Ara molamo. ?Taghodi mu pagusuna meha Ebarahamu, di ghua? Ara molamo. 23 Maneri di kaheina mu, taghodi mu nona noniriva Kraes di ghua, ghe ara mo mu nona noniriva ta vehana Kraes fuludurira maneri. Ara mu na ngengene taghe kaike noni ta gogosu na ghua ghu. Ara mo mu nake toraina riva ngazuluai fuludurira maneri. Ara mo mu nake auna ka pipiliga tehi fafatani fuludurira maneri. Ara mo mu dike torai puruasimiauna fuludurira maneri. Ara mo mu nake toraina namo hioina lemeguna tehi fafatani. 24 Ka gaha sopai fafata, ira noni babatu ka ira Ziu dike puruasimiau ara litofulu leghaha puruasimi ka kaike fafata. 25 Lito fafata ira noni Romu dike va bota ghinagu kodakana heke. Kaike fafata maneri dike va roborobo ghinagu ghahipa. Lito fafata ara nake haghe ka kaike vaka neke mukono ka tahio. Kaike fafata ara nake felo ka tahi kaike redu kamotona nia kaike ravata. 26 Ka ira tehi ghaghahe nake riva ghidiro, ara nake dufuri tehi lelemeana. Keha fafatara nake dufuri ira ologho, keha fafatara ira noni ta sisiko, keha fafatara ira noni taremehagu taghogu ira Ziu nia keha fafatara ira noni taka Ziu ghu, e ghua. Ara nake talari ira lelemeana ka ira malau leghaha, ka ira malau koroghadi ta karango, nia ka ira tahi. Nia ara nake talari ira noni ta kahei taghodi mu noni va hohoghona ira ta ghua ghe ta deo ma. 27 Ara nake riva ghorevaha soduai, deona gake epu ghu tehi redu. Keha fafatara ara nake nogu liha nia parangoso nia deoau ghano. Keha fafatara ara nake kapo nanazara ghegu, vununa deo geke fata ghu ira poko teri mala va dangavauna.

28 Taremehadi laora ira keha leghutau mu, ara na ngana tahuri fuludu leleghu ravata ira leghu pukudi noni ta va hohoghona nga. 29 Ka ia ta paeke hei noni ka ia nona va hohoghona, ia doli ka ara e paeke. Hei noni neto hio va sasakei la kaike noni, e va halau fuludu ara.

30 Vununa ghau no va tutuufu ghinagu ta va varavarangana ara, a suna va varavaranga ghidi ghu ma ira leghutau ta va podolo kaveri ira paeke ka ara. 31 God ia nona Mama ia noda Lod Zisas ia ta mala helahela ghini fuludai, e avohi mo taghona ta turi hohoghoguna ara. 32 Ka ia augu ara Damasikasi, ia gavana ka pekana ia mane ginitaukela Aretasi neke nakai mane kopu ka ira makatanana ia babarana malau leghaha mala sakomo hio auna ara. 33 Ghe maneri dike nai hagheleau ka kaike maka leghaha ta fifihu dike va luara hinae au ghu ka naroho ka ia vuidana babarana malau leghaha, nake pelo ghahe ghu.