2Cor 12 | KjiSC | STEP | Va malumuau ta va varavaranga ma ta laona ghu, geta deo ghu veha ta hioina ka iahi. Ara a tuturi ghidi ghu ira hahaima nia ira leghutau neke va podolo vanaguo ia Lod.

2 Corinthians 12

Ira Leghutau Va Popodolo Ka God Vanani Polo

1 Va malumuau ta va varavaranga ma ta laona ghu, geta deo ghu veha ta hioina ka iahi. Ara a tuturi ghidi ghu ira hahaima nia ira leghutau neke va podolo vanaguo ia Lod. 2 Ghatunaina e tazoi rodanana komuhu ghu tato fuludura ka ia fafata hio vonau God toraina fateni ka nona malauo fate. Ara deo ga avoho va vehai ghu God neke hio vonau ma ka tarungagu lama, ba tinigu haro ini, ta ghuana. God lama ta avohina. 3 Uve, God lama ta avohina mu ara nake au ka ia tini, ba ka ia tarunga ta ghuana. Ghe ara na avohi mo 4 neke hio vonauna God Paradaisi nake nomohori ghu ara tehi leghutau ta beana ta fefereana ta deo ga boka va fafahakari ghu, ira leghutau ta deo ge malumu ghu turi ghidira hei noni. 5 E fata mo ta turi va varangina ara leghutau ianimu, ghe ara e deo ga age riva ghini ghu ianimu. Nga ara mu a va varangari ma ira leghutau ta va podoli ia paeke ka ara. 6 Tehi leghutauni, ta boka mala va varavaranga ghidira ara, ghe e deo ga kingo ghu nato riva ghidi la, vununa ara a kahei ia hohoghona. Ghe ara e deo ga age riva ghini ghu, vununa e deo ga kabai ghini ghu hei ka ghau, ta torai ngana va vonauna ara fuludurira ira heve ta fata mala va ngana ghinaguna ghau. E veha ia nganganamu ghau ghinagu ara ge leghuri la ma ira heve ta nomohori ghau kaherira ara nia ka ira heve ta finiau riva ghidira ara, e ghua.

7 Vununa God neke deo ge kabai ghinagu ghu va varavaranga ghidira ira tehi leghutau neke va podolo vanaguo ka nona malauo fate, neke va malumuri ghu keha leghutaura ta dufu auna ara, taghe kaike lolozo ta tonei tiniguini, e ghua. Iahi mu taghe kaike maneriva ka Satana mala va vavahagalau ara, e ghua. 8 Lito fafata nake tarai fangaina ara ia Lod mala hio kai taguna leghutau ta muko iahi. 9 Ghe manei neke kahe ghua iahi, “Ia nogu varisute ta vananigho kakato ara to fata ma ka agho, vununa ia mana ka ara e toraina faa fuludu ka ia fafata ta paeke agho.” Ara mu na toraina va manemane ghu va varangauna taghogu ghidira ira paeke ka ara, mala ia mana ka Kraes e au ghu ka giliogu ara. 10 Uve, ara na va manemane ta paekena, ta kahe va mukoauna, ta ngovalauna, ba ta kuruauna mamarutana nia ta va vavahagalauna, e ghua. Vununa ka ia paeke ara ta va gigimauna Kraes.

Ia Nganaheta Ka Polo Ghidi Ira Nonidi Koriniti

11 Taghe kaike noni ta kingo nato ghua ara, ka ta va varangau ini taghogu, vununa ghau lamu no va tutuufu ghinaguna ta riva ghuana iahi ara, vununa ghau noke au vanemoho noke deo ghu va varangauna ara. Vununa geta deo ghu ara ga tongovona ghu ghe, ara e deo ga hinae fuluduri ghu ira ta va kudo ghidi kenudi mane nonomoho ghau. 12 Mala va podoloauna taghogu ta kaike mane nonomoho hohoghonana, ara nake riva ghidi ma nake au ghu ka vari hoataimu ghau tehi hahaima nia va ghila ta fefereana. 13 Kaike leghutau nake riva ghinina ara ka ira keha kiloau, nake deona gake riva ghini ghu ka ghau mu, ara e deo gake fanga ghau ghu ta mala toka ghinaguna ka keha leghutau. Na zea ara riva ghinina ianimu noto ghua la ka ira nganganamu, ara a fanga ghau ta kai haza taguna zea ianimu ka ara.

14 Ghatunaina e va litona fafata ghu ta va tanai mala age sigho ghini ghauna ara, ghe ianimu e deo ga age va rugusi ghau ghu ghatu mala toka ghinaguna ara. Ara e deo ga kabai ghidi ghu ira nomu leghutau ta taghori ghau, nga ghau mo na kabai ghini ghauna ara. Vununa ira rekaha mu edika mala papasai vanadi rongo ghu nodi ukeri mamari, nga ukeri mamari mo ta papasai vanadi rongona ira nodi rekaha. 15 Ara a age va manemane ghu vanamuna ghau vahina leghutau ta kuruau nga ara nia vanamuna doligu haro ini taghogughi e ghua, mala toka ghini ghauna. ?Nato namaha ghini ghau fuludu la ara, heve, ghau o age namaha ghinagu birusuna ma ghatu?

16 Kehara ka ghau no va hohoghonai nake deona ara gake va rugusi ghau ghu mala toka ghinaguna. Ghe kehara ka ghau no nganai ngama ara nake sesebo nia sekeseke ghini ghau, ta ghuana. 17 ?Ghe heve? ?Ira keha mane nake tuhu ageriro ara ka ghau dike age sebo ghau mala hio tamura ira nomu leghutau? 18 Ara nake va ohiohini Taetusi mala agena ka ghau nia nake va leghu taremehana age haro kaike mane taremehada noni kiloau e ghua. ?Heve, Taetusi neke age sebo ghau? Ta torai avohina ghau mu, ghai palu Taetusi mu nake riva ma ka kaike ngangana mo nia nake leghui ma kaike kokolona ghaghahena riva mo, e ghua.

19 Haeba ngangana ne au tuduna ka ghau mu, ghai na kaheri leghutau irahi mala suna bara kaputu ghaina ma taghomai, no ghua bana. Deo, na kahe ghini ghau nga ghai leghutau irahi mu, vununa ghai mu nona noniriva Kraes, na ngengene ghu ka kenuna God. Ghau ira ta namaha ghini ghau ghai, ira leghutau haroharo ta riva ghidi ghai mu, e mala va gigima ghau. 20 Vununa ara na maughegu ta age fini ghauna ka ia mehagu, ta hazana ira dolimu nake nganai age finiriro ara ka ghau nia ta deona ghau go kabai finiau ghu ara ta age burua ghauna, e ghua. Ara na maughegu age finina ka vari hoataimu ghau ia vari giuruai, kakabai, tuma ngaziri, luluto, turi ghidi sebo ira keha noni, turituri noni, hadu varanga nia deo ge leghu puhi mala leghuri ghu, ia ta ghua. 21 Uve, ara na maughegu ka mehaguo ta age va haghavauna God ghatu ka kenumu ghau nia ara a toraina age muko hihingogu ghidi ira tehi noni dike rivai sasakero sepao tadi deo gedi fihiki kairi ghu ira puhidi ta sota ta zave lao meha.