2Cor 13 | KjiSC | STEP | Iahi mu va litona fafata mala meha sigho ghini ghauna ara. Ka ira Kakangava ta Maduana ne kahe ghua iahi, “Mala hio va hohoghonana ka leghu vari sukutuai nga mu, e toraina va dedeke ka palu, ba lito noni ta fini hibadi muko ianimu,” e ghua ta kaheina.

2 Corinthians 13

Ira Va Nonoghadi Tatangana Nia Ungene Veha Ka Polo

1 Iahi mu va litona fafata mala meha sigho ghini ghauna ara. Ka ira Kakangava ta Maduana ne kahe ghua iahi, “Mala hio va hohoghonana ka leghu vari sukutuai nga mu, e toraina va dedeke ka palu, ba lito noni ta fini hibadi muko ianimu,” ^{▼▼13:1 Ngengene 19:15} e ghua ta kaheina. 2 Ka ia va paluna meha sigho ghini ghau, ara nake to kusu kahe ghidi va gigima heiri dike rivai mukoro ka ia fafata au tamu ara. Nia ghatunaina ka ta deo ini nga ga au tamu ghu, ara ake va kahe ghidi va gigima ageni maneri nia heiri haroharo ta deo gedi nodo ghu rivai mukona e ghua, ta toraina age va kilasarina ara ghatu ke la leghu mehaguna.

3 Ara a riva ghini ianimu ghatu mala torai fini avohina ghau ghinina Kraes lamu ne va rivauna ara mala turi ghini kavena ia nona saoro, ta ghuana. Kraes e deo ge paeke ghu ka heve ta age riva ghinina manei mala nai va lotoro ghauna, nga e toraina mana fuludu ka ia nona riva ka vari hoataimu ghau. 4 Hohoghona fuludu neke paekena nonina manei ka ia tupila ghini maneri ka ia hekefalahata, ghe ghatunaina mu manei ne doli ka ia mana God. Ka ia parekete taremehana manei, na paeke haro ghu molamo ghai. Ghe ghai na au doli taremehana manei ka ia mana ka God. Nia ghai a age va lotoro ghau ka mana iahi, e ghua.

5 O fini va fafahaka ghau taghomughi, o hadu kavei ghu no toraina va hohoghonai mamu ghau Kraes ba deo ta ghuana. Noto deo la go avohi ghu ghau ta auna Zisas Kraes ka ira dolimu ghau, ianimu ghu mu ia va hohoghona ka ghau e deo ge hohoghona ghu. 6 Ka ia rangerange ara mu ghau to fini avohi ta hohoghonana ia va hohoghona ka ghai.

7 Nia ghai na tarai lao ka God, e mala toka ghini ghau ghu manei mala deona go riva ghidi ghu ghau ira leghutau ta muko. Ghai a tarai ghua iahi e podolo ghu ka ira dolimu ta veha ghau ta noniriva vehamaina ghai, eka ghua ghu. Deo. Ghai na kabai ghini ma ta au ta laona ghu ghau ka ira puhimu ta veha, geta nganai ghu ira noni ta deo lighoronana riva ini ka ghai. 8 Vununa ghai e deo ga boka tetu kaputi ghu ia hohoghona, nga toraina tetu ghini tudu ma ia hohoghona. 9 Ghai mu a va manemane noto gigima la ghau, geta paeke ghu ghai. Na tarai fangai ghu ghai mala meha zeolona ia doli ka ghau taremehana Kraes.

10 Na kangava agei nga ara leta iahi ka ghau mu vununa ara na rangerangei ta age holararira ghau ira dolimu ghe ga meha nga ara. Noto riva ghua la ghau ianimu, ara e deo ga age va vavahagala ghau ghu ka ia mana neke vanaguo ia Lod. Manei neke vanagu mana mala va gigimaina ia va hohoghona ka ghau nga eka mala va mukoi ghu.

Va Nonoghadi Ungene Veha Ka Polo

11 Ghau taremehagu noni kiloau, ara a bakisini leta iahi ka ara ka va nonoghadi ngengene irahi: O au va ghazaghaza. O zeolo ka ia nomu va hohoghona. O vari va gigimai. Au ka bule nia soleana. E ghua ianimu ghe, ge age au tamu nga ia God na namaha nia Bule.

12 O vari ungene veha ka ia angoho beana. ^{▼▼13:12 Vari angoho iahi mu e beana, vununa neke kaike va ghilaghilana baere nia kaike, dike riva ghini ghu ka varihoataidi ira noni beana ka God. Kehanani mu, vununa ira leghu ta va hohoghona nga dike tatahina ka Zisas, neke deo ghu auna ka ia angoho beana ia va ghilaghilana vari kabai.}

13 Ira leghu nona noni nga God aiahi di va ghahe age nodi ungene veha.

14 Nia ara na tarai fangai ia nona varisute ta vanada kakato ia noda Lod Zisas Kraes, nia ia nona namaha God nia ia vari parekete varighara taremehana ia Tarunga Ta Maduana, e age au ka ghau haroharo.