2Cor 2 | KjiSC | STEP | Ka ia sigho ghini ghau ara sepao, ara nake ngengene va gigima ghau nake va muko hihingo ghau ghu. Na ghua mamu ghe na deo nga ke age sigho ghini ghaunani, vununa e deo ga kabai ghini ghu take age va muko hihingo ghaunani.

2 Corinthians 2

1 Ka ia sigho ghini ghau ara sepao, ara nake ngengene va gigima ghau nake va muko hihingo ghau ghu. Na ghua mamu ghe na deo nga ke age sigho ghini ghaunani, vununa e deo ga kabai ghini ghu take age va muko hihingo ghaunani. 2 ?Vununa nato va muko hihingo ghau la ara, hei mo mu ta boka vanaguna ara ia va manemane? Ghau ira noni nake to va muko hihingo ghau no lama mu ta boka va manemane auna ara. 3 Ianimula ghe nake kangava vanamu age nga ara leta ianimu. Ara e deo gake kabai meha ghu ka ghau ta age va muko hihingo auna ghu ghau ira toraina noni ta boka vanagu ia va ghazaghaza. Vununa va hohoghonana ka ara mu, nato va manemane la ara, ghau haroharo o va manemane molamo. 4 !Ka ia fafata kangava vanamu ara leta ianimu, neke puina va hagalau fuludu nia nake puina muko hihingogu e ghua, nake toraina nakele ghegu ghu kotoro ghedira hibaguidi! Nia ara e deo gake kakangava age mala va muko hihingo ghau ghu, nga o mala avohi ghu ta toraina namaha ghini ghau haroharona ara, nake ghua.

Kai Hazari Ira Sasakena Ia Keha Noni

5 Ia mane ka vari hoataimu ghau neke rivai zea no, manei e deo geke va muko hihingoau ghu ara lama, nga ghau haroharo molamo. Ghe ara e deo ga kabai kaheri ghu tehi leghutau ta torai mala va mukoina noni ianimu. 6 Ia va kilasa noke vananio ghau tehini to fata ma. 7 Ghatunaina mu ghau geala o kai hazari ira sasakena mane ianimu nia o va kakapotoi ghena e ghua, ghatu e age faa vanani muko hihingo e nodo ghu ia va hohoghona ka manei. 8 Ara na toraina fanga va gigima ghau ghu ta va podolina ta avohina ghu manei, no toraina namaha ghini fuludu ghau, ta ghuana.

9 Nake kakangava vanamu age nga leta ianimu ara mu, vununa nake kabai hadu kavei no lao hihingomu mo, ba deo ta ghuana leghurira heve nake va kahe ghini ghauro. 10 Noto kai hazari la ghau ira sasakena ia keha mane, ara a age kai hazari haroma sasakenari manei neto hohoghona la neke riva ghinina manei ia leghutau ta fata mala kai hazaina ara. Nia nato riva ghini la ara ianimu, ara na riva ghini ka ia mana Kraes malana ia veha ka ghau, 11 mala eka age paufu ghita la ghu Satana, vununa ghita da avohori mo heve nona vatovato ta mukora manei.

Ia Anga Ka Polo Ani Toroasi

12 Ka ia la sabaragu aianihi Toroasi ta la tuturi beana ghini ghu ia Nonomoho Ta Veha ghinina Kraes, ara nake hadu kavei neke to tobehina ia Lod ia makatana malana ia riva aianimu. 13 Ghe ara nake toraina anga ghegu, vununa ara nake deo ga boka hadu dufui ghu ia tahigu mane Taetusi aianimu. Kubaeri ma tuna maneri gake lao ghu aianihi Masedonia, nake ghua.

14 Ghe kudo vehai God, vununa Kraes ne meha kenu ka ia magara nia ghai ira mane nonomoho ga parekete taremehana ghu manei e ghua, nia ghai na leghui manei taghe ghai mu nona maneriva manei, ta ghuana. God neke tuhu lao ghai ghu ta mala la tuturi beanana ka ira keha noni, mala ia nonomohona Kraes e ongaha ghu ka ira leghu pelodi nga, taghe longarana inisenisi, ta ghuana. 15 Vununa ghai mu taghe longarana inisenisi ia ta mala riva Kraes mala va vonavonaina God ia ta ghua, ia longara ta ongaha vari hoataidi heiri ira ta hio va doliri God, nia ira ta au ka ia hangana ta lao Gehena, e ghua. 16 Ka ira ta au ka ia hangana ta lao Gehena mu, ghai mu taghe kaike hurangi ta mumukoana, nia e batu ghidi lao ka ia leme ta deo va nonoghana, e ghua. Ka heiri ta hio va doliri God mu, ghai mu taghe kaike longara ta veha ta va meha doli, e ghua. E deo hei mu ta fatana ka riva iahi neto deo la God ge toka ghini ghu. 17 Tehi noni mu edi suna tuturi beana mala hio rongo ma, ghe ghai mu taghe ianimu aka ghua ghu. Ghai mu a tuturi beana ghini ia nonomoho ka God taremehana ngangana ta lotoro nia taremehana ia mana ka Kraes, e ghua. Nia ghai na avohi mo neke tuhu ghai mehana God aiahi, nia manei e mato ghai meha tudu ma, e ghua.