2Cor 4 | KjiSC | STEP | Vununa God ne dudumana ghini ghai, neto ke vanamai riva ghu mala tuturi beana ghinina ia Nonomoho ta Veha. Ianimu lamu ghe na deo nga ga boka bualefo ghu riva ghinina ghai.

2 Corinthians 4

Ia Fegalana Ia Nonomoho Ta Veha

1 Vununa God ne dudumana ghini ghai, neto ke vanamai riva ghu mala tuturi beana ghinina ia Nonomoho ta Veha. Ianimu lamu ghe na deo nga ga boka bualefo ghu riva ghinina ghai. 2 Ghai na sokeri ira leghu ghaghahedi ta hahaghavadi nga nia ta poika nga, e ghua. Ghai e deo ga va sisiva seke ghidi ghu ira keha noni, nia e deo ga fihifihikini ghu ia saorona God, e ghua. God e avohi mo ta tuturi beana ghini kavena ghai heve ia ta hohoghona ka ia nona saoro, edi avohi mo ghu ira noni haroharo mu ta hohoghomaina ghai. 3 Neto poika la ia Nonomoho ta Veha ta tuturi beana ghini ghai ka hei noni, e poika ma ka heiri ira ta leghui ia hangana ta lao ka ia leme fuludai. 4 Satana ia god na malau ta muko iahi peka neto ke va nagoromori ira nganganadi heiri ira taka va hohoghona ghu, mala bara kaputina ia pelarana varanga ka ia Nonomoho ta Veha ta pelara laona ka fatedi maneri. Maneri e deo gedi va fafahaki ghu ia nonomoho ta tuturi beana ghini ghai ghinina ia pelarana varanga ka Kraes ia torai totoghalena taghonai God.

5 Ghai e deo ga tuturi beana ghini ghai ghu taghomai, nga na tuturi beana ghini Zisas Kraes mu ia Faghina, ta ghuana. Nia ghai lamu nomu nonirivana ghau, vununa ghai na leghui Zisas. 6 Ka ia va vuhai malau iahi peka God, manei neke kahei, “Va pelara kavei ia fegala ka giliona ia nagoromo,” ^{▼▼4:6 Tatanigaina 1:3} neke ghua. Nia ghatunaina God ne va rivai ia nona fegala ta mala pelara haghelena ka ira hihingoda ghita, e mala vanada ghu ia avoavohona ia pelarana varanga ka God ia ta finini ghita ka ia hihilina Zisas Kraes.

7 Ghai mu nake hioi ka God leghutau ta namanama iahi, ghe ghai mu taghe ira raro ta riva ghidi ka kava palaki a ghua ma. Iahi mu ne va podoli ghu ta nonana God ia mana leghaha, eka nomai ghu ghai.

8 Ghai mu to tamunu ghai mamarutana ka ira leghu pelomai nga, ghe ghai deo ga paeke ghu. Geta ngana ponoe ghu ghai ghe, e deo ga suaraghi ghu. 9 Maneri dike va vavahagala ghai, ghe God e deo geke ghahe kai ghai ghu. Maneri edi keta hinae ghai, ghe ghai ake tetu vona soni mo ake ghahe ghu. 10 Leleghu fafata ka ia vavahagala, ghai a hure ghaghahei ka tinimaidi ia leme ka Zisas, mala ia doli ka Zisas e boka finini haro ghu molamo ka tinimaidi ghai. 11 Uve, vununa ghai na riva vanani Zisas, di kabai atungu ghai ghu ira noni. God ne va malumu ghai ta mala va vavahagalana, mala ia dolina Zisas e age dodoruana ghu ka ira tinimai ta boka leme. 12 Fafahakanana ghu iahi mu, ia leme mu ne riva ka giliomai ghai, nga ia doli mu ne riva ka giliomu ghau.

13 Ka ira Kakangava ta Maduana ne kahe ghua iahi, “Ara nake va hohoghona ka God, na ngengene ghu,” ^{▼▼4:13 Samu 116:10} ne ghua. Ka kokolona va hohoghona haro ianimula, na tuturi beana ma na auna ghu ghai. 14 Na avohina ghai mu, ia God neke va tetu leghuio lama ia noda Lod Zisas, ta age va tetuleghu ghai harona ghai taremehana Zisas, ta hio ghai age taremehamuna ghu ghau ka kenunao taghonai. 15 Vahina leghutau irahi nga mu, e malana ia veha ka ghau. Nia ka ia fafata hio va tehi meha noni ma ta au ghu ia varisute ta va meha kakatoi God, tehi nonini ta age kudo vehaina God nia ta helahela ghinina manei, e ghua.

Va Hohoghonai Ia Lod

16 Ne ghua mamu ghe, na deo nga ghai ga boka bualefo ghu. Geta to paeke mo tinimaidi to ghahe vai leme ghu ghe, ira tarungamai mu, edi foforu tudu ma e au ghu leleghu ravata. 17 Vununa mamarutana irahi ka ghai ghatunaina mu edi nodi rekahadi ma, nia e deo gedi age au soduai fuludu ghu, e ghua. Geta ghua mo ianimu ghe, mamarutana iranimu edi age vanamai ia varanga ta age au toghunai. 18 Ghai mu e deo ghu ga mato laori ghu ira mamarutana ta finiri torai ghatunaina, nga na mato vai kenu laori ira heve ta deo nga ga finiri ghu. Vununa mamarutana ta finiri idi ghai mu, edi magali age ghahe fuludu, nga ira va ghazaghaza ta meha nga mu, edi age au toghunai.