2Cor 5 | KjiSC | STEP | Ira tinida ghita ka malau iahi peka mu taghe suga tapole edi ghua ma. Ka ia age huara ira suga tapole ka ghita, ghatu ghita da age kuru sugada ka malauo God fate, ia foforuna tini ta au toghunai neto ke vatana vanadao taghonai God, ta deo ge riva ghini ghu noni.

2 Corinthians 5

Ia Au Ka Ghita Ka Malauo God Fate

1 Ira tinida ghita ka malau iahi peka mu taghe suga tapole edi ghua ma. Ka ia age huara ira suga tapole ka ghita, ghatu ghita da age kuru sugada ka malauo God fate, ia foforuna tini ta au toghunai neto ke vatana vanadao taghonai God, ta deo ge riva ghini ghu noni.

2 Ghatunaina mu ghita dato puina muko vanada ka tinida idi ka malau iahi peka, dato hagala ghini ghu ta age auna ka kaike foforuna tini ka malauo God fate. 3 Vununa ka ia fafata au ghita ka ira tinida foforu ka malauo God fate, ira tarungada ghita mu taghe noni ta sosole e deo gedi age ghua ghu ghatu. 4 Ka ia au ghita ka ira tinida ka malau iahi peka, ghita da vavahagala muko vanadana, vununa ghita da toraina kabai ghini fuludu ta hioina ia foforuna tini. Ghita da kabai leme e age deo tinida ghu eka ghua la ghu. Nga ghita da kabai holari ia tinida sepa ia ta boka leme, da hioi ghu kaike tini ia ta age au toghunai. 5 Nona ngangana nia lao nanafa taghonai God mu ta mala holara ghitana ka foforuna tini ianimu, neke vanada ghu manei ia Tarunga ta Maduana mala va podolo vanadana ta toraina age hioina ghatu ghita heve neke naiungene ghinio manei.

6 Ia ngangana ka ghita mu, e gigima ghu. Tada avohina ghita ka ia auda ka tini iahi ka malau iahi peka mu, ghita to au kave ka ia Lod. 7 Vununa ghita mu da au ka ia va hohoghona, nga eka ghua ghu ka heve ia ta finini ghita. 8 Uve, ia ngangana ka ghita mu e gigima tudu ma, nia da toraina kabai ghini ta ghahe kairira ira tinida ka malau iahi peka, da au taremehanana ghu ia Lod ka malaunao fate. 9 Geta au ghu ghita aiahi, ba ka malauo God fate ghe, leghutau ta tongovonana mu ghita da toraina riva mala veha vanani ia Lod. 10 Vununa ghita haroharo mu, da toraina age tetu ka kenunao Kraes ghatu mala age fate ghitana manei. Ghita da age hioi ghu ghatu heve ia ta mala hioi ghita, leleghuna ka ira heve muko ba veha dake riva ghidiro ka tinida idi.

Hio Mehari Ka God Ira Noni

11 Vununa ghai na avohi e fata ta maughinina ghai ia Lod, na toraina va ohiohiri haro ghu ira keha noni ta va hohoghonaina ia Nonomoho ta Veha. God ne avohi mo ta lotorona ghai, na rangerangei ghu ara mu ta avohi harona ghau iahi. 12 Ghai mu e deo ga va sisiva ghu take helahela ghini ghainani taghomai ka ira hibamu ghau, nga na kabai va podolo vanamu heve nato ke riva ghidira ghai, o boka mala va varanga ghai ghu ghau, ungene tughurira heiri ira ta helahela ghidi ira riva ka taghodi, ghe tadi deo nga ge lotoro ghu ira puhidi ka ia nahalina God. 13 Ghai na gogosu, dito ngana ghua ghini ghai la maneri, ia riva va gigima ka ghai vanani God ne ghua ghini ghaina ianimu. Nga nato au ghai ngangana ta veha la ghai, ianimu vununa ghai na riva va gigima mala toka ghini ghauna ghau. 14 Na riva va gigima nga ghai ka ia va hohoghona mu, vununa ghai na avohi Zisas Kraes ta namaha ghini ghaina. Nia vununa ghai na va hohoghonai neke leme vanadina Kraes ira noni haroharo, na va hohoghonai haro ghu molamo ghai dike leme taremehanana manei ira noni haroharo. 15 Manei neke leme vanadi ira noni haroharo, mala heiri ira ta hioi ia doli foforu edika au maladi la ghu taghodighi, nga maneri edi au mala veha vanani Kraes neke lemeo nia neke va tetu leghuio maladira maneri.

16 Ghita daka va ngana ghini la ghu hei noni, ka ia va fafahaka malau iahi peka. Geta taghe ianimu dake ghua mo ghita va ngana ghinina Kraes kaike fafata sepao ghe, ghatunaina mu ghita daka ke ngana ghua ghini ghu ianimu manei. 17 Hei neto parekete taremehana la ghu Kraes, manei mu to foforuna noni ghu: ia doli sesepana to nogha, to meha ghu ia doli foforuna.

18 Leghudi leghutau irahi nga mu sipa mehadi ka God. Manei neke tuhu mehai Kraes mala ke vari parekete leghuina ia fota ka vari hoataina taghonai God nia ghita e ghua. Manei neto ke vanamai ghu ghai ia riva ta mala ke vari parekete ghidi leghu ka taghonai ira keha noni. 19 Uve, God neke parekete leghui ia fota ka vari hoataina taghonai nia ira noni ka malau iahi peka e ghua ka ia leme Kraes, deona ge raghe leghuri ghu ira sasake ka maneri. Iahi lamu nonomoho neto ke vanamaina manei mala tuturi ghini kavena ghai ka ira keha noni. 20 Ghai mu na tetu vanani ghu Kraes, nia ka ia fafata ngengene ghau ghai, taghe ta ghua nia taghonai God ne ngengene ghauna, e ghua. Ka ia tetu vanani Kraes, ghai na fanga ghau ta leghuna ka God ta au vari parekete taremehanana ghu manei. 21 Kraes mu neke deo sasakena, ghe God neke hio kairi ira leghu sasakeda nga ghita neke nai laori ghu ka manei, mala age lotorona ghita ka ira nahalina God ka ia leme Kraes.