2Cor 6 | KjiSC | STEP | Ka ia riva varighara taremehana God ghai, na fanga va gigima ghau ghu ghau ira noto ke hioio ia nona varisute God ta vanada kakato taka pepesana ghinina ghu.

2 Corinthians 6

1 Ka ia riva varighara taremehana God ghai, na fanga va gigima ghau ghu ghau ira noto ke hioio ia nona varisute God ta vanada kakato taka pepesana ghinina ghu. 2 Vununa God ne kaheina,
“Ka ia torai lotorona fafata, ara nake nomoho ghau.
Ka ia dufu mehana ia ravata mala hio va doli ghau, ara nake toka ghini ghau.” ^{▼▼6:2 Aesaea 49:8}

!Nonomoho meha! Ghatunaina lamu fafata ne kabai toka ghini ghauna God nia fafata ne kabai hio va doli ghauna manei, e ghua.

Ira Mamarutana Ka Polo

3 Ghai na va sisiva taka riva ghinina ghu kaike leghutau ghu, ia ta boka va mukoi ia nganganana hei noni, vununa ghai e deo ga kabai ghini ghu hei noni ta tetu kaputina riva ta riva ghini iahi ghai. 4 Ka ira vahina leghutau ta riva ghidi nga ghai, ghai na va podolo ghai taghomai ta nona nonirivana God, na au vanemoho ma ghu ka giliodi ira lelemeana, vavahagala nia mamarutana. 5 Ghai dito ke ruza ghai, nai ghai ka pipiliga, talari ira pukudi noni ta magara nia malasa ka riva ngazuluai, deona ga epu ghu ka ira redu taremehana lemei mahai haro. 6 Ghai nato ke va podolo ghai taghomai ta nona nonirivana God ka ia avoavoho ta vanamai God, ka ia va fafahaki God, ka ia au afa ta au ghu nia varisute, ka Tarunga ta Maduana giliomai ghai nia ka ia namaha hohoghona. 7 Ghai nato ke tuturi beana ghini ia hohoghona nia ia mana ka God ne riva ka giliomai ghai, ta ghuana. Ira puhimai ta lotoro ka ia au ghai lamu taghe nomai sebele nia rereo ta ghuana mala taga teturira ira kana ka ghai. 8 Ka ia riva vanani ghai God, keha nonira edi va vonavona ghai, kehara edi ungene va hinae ghai, e ghua. Kehara edi ngovangovala ghai, kehara edi helahela ghini ghai. Kehara edi kahei ta noni sesebomaina ghai, ghe ghai na tuturi beana ghini heve ia ta hohoghona. 9 Keha nonira taghe taka avoho ghai ghu edi ghua ghini ghai, geta avoho va veha ghai ghu ira tehi noni. Ghai mu to au namo lao ka ia leme, ghe ghai na doli ngama. Maneri dito ke bota ghai, ghe e deo ma gedi ke atungu ghai ghu. 10 Geta va muko hihingo ghai ghu ghe, ghai na va manemane tudu ma. Ghai mu na kuma, ghe na va taghotaghori mo tehi noni. Na deo mo ta taghoina ghe, na kuru ghai mo vahina leghutau nga.

11 !Ghau noni baere Koriniti, ghai nato ke va kahe ghini ghau ia hohoghona deona heve ta va poika ghini ghauna. Ghai na va podoli ta toraina namaha ghini ghauna ka hihingomai kamoto idi. 12 Eka ghua ghu ghai nake deona ga va podolo vanamu ghu ia namaha ka ghai. Ghau mo noke deona goke va podolo vanamai ghu ia namaha ka ghau. 13 Ara na ngengene age ka ghau ghatunaina taghe nogu rekaha taghogu ta ghua ghini ghauna, ka ia kahei ara ta kabai ghini ghauna take namaha ghini ghai leghuna, taghe ta namaha ghini ghau ini la ghai.

Ia Sugana God Ia Ta Doli

14 Oka holara taremehadi ghu heiri ira ta deo gedi va hohoghona ghu, vununa heve ia ta lotoro, e deo ge boka au varighara taremehana ghu ia muko. ?Heve, ia fegala e boka au varighara taremehana mo ia nagoromo? 15 ?Heve, Kraes e boka au va veha varighara taremehana mo Satana? Heve, e boka mo ia noni ta va hohoghona ta kaike ngangana taremehanana ia noni taka va hohoghona ghu? 16 ?Nia heve varivehai mu ta auna ka vari hoataina ia Ringifota ta Maduana ka God nia ira nguzunguzu, e ghua? Vununa ghita lamu ghu mu ia Ringifota ta Maduana ka God ia ta doli. Taghe neto ke kaheio la God:
“Ara a age au taremehadi ira nogu noni
nia ghaghahe taremehadi maneri.
Ara lamu ta age nodi God na maneri,
nia maneri lamu ta age nogu nonira ara.” ^{▼▼6:16 Hiama 26:12; Zeremaea 32:38; Ezikeli 37:27}
17 Ghau o kave kairi maneri
o fota ghu, ne ghua ia Lod.
Oka posi leghutau ta sota ghu.
Noto leghui la ghau iahi ara a age va manemane ghini ghau. ^{▼▼6:17 Aesaea 52:11; Ezikeli 20:34,41}
18 Ara a mala age nomu Mama ghau,
nia ghau go mala age tuugu ghu ara e ghua,
ne ghua ia Lod ta Torai Mana. ^{▼▼6:18 2 Samueli 7:14; 7:8}