2Cor 7 | KjiSC | STEP | Ghau nogu baere, vununa leghu naiungene irahi nga neke riva ghidi God malada ghita, da va fegala ghita ghu taghodaghi ka ira vahina leghutau ta muko nga ta boka va sotai ia tini nia ia tarunga. Ghita da toraina au mala va vonavonai ghu God va sisiva toraina au va lotorona.

2 Corinthians 7

1 Ghau nogu baere, vununa leghu naiungene irahi nga neke riva ghidi God malada ghita, da va fegala ghita ghu taghodaghi ka ira vahina leghutau ta muko nga ta boka va sotai ia tini nia ia tarunga. Ghita da toraina au mala va vonavonai ghu God va sisiva toraina au va lotorona.

Ia Va Ghazaghaza Ka Polo

2 Ghai na kabai ghini ghau ta toraina va podolo kaveina ka ghai ia nomu namaha. Ghai e deo heve nake riva ghini va zeana ka hei noni. Ghai e deo hei nake batu ghini va zeana. Ghai e deo hei nake seboina. 3 Ara e deo ga kahei ghu iahi mala makutu ghauna, vununa ara nake kusu kahei mo sepao ta faa fuluduna ia namaha ka ghai vanamuna ghau, geta leme ba doli ghai. 4 Ara na puina va hesi ghau fuludu, nia va varanga ghau fuludu. Ghau no toraina vanagu gigima nia no vanagu va ghazaghaza geta ghua ghu ka giliodi ira mamarutana ghai.

5 Ka ia la sabara ghai ka ia babarana Masedonia, ghai e deo ghe gake kuru ghai ghu kaike birusuna fafata mala maghosona. Ghai nake toraina vavahagala ka ira dolimai ka ira vahina kokolodi varituufuai nga ka ira noni ta huha ghai, nia nake au mamaghu ka ira nganganamai, e ghua. 6 Ghe God, ia ta va gigimari ira nganganadi heiri ira ta muko hihingodi, neke va kakapoto ghaina ka ia meha sabarana Taetusi. 7 Eka ghua ghu ma ia meha ka manei neke vanamaina ghu ia va ghazaghaza, nga ghai nake va manemane molamo vununa ka ia ghaghahena noke va gigimaio ghau ia nganganana manei. Manei neke va kahe ghini ghai ta hagalai fini auna ara, nia ta torai muko hihingomuna ghau ka ira va zezea noke riva ghidiro e ghua nia manei neke kahei molamo ta torai ngana hetauna ara ghau. Ara na toraina va ghazaghaza fuludu laoni ghu riva ghidira ghau iranimu.

8 Ia leta ka ara neke va muko hihingo ghau mo, ghe ara e deo ga muko hihingo ghini ghu ianimu. Ka ia tatanigaina mu nake muko hihingogu birusuna laona, vununa ara nake finini ta va muko hihingo ghauna leta ianimu, ghe birusuna fafata tei ma. 9 Ghe ghatunaina mu ara na va manemane, vununa ka nake va muko hihingo ghauno eka ghua ghu, nga vununa ia muko hihingo ka ghau ne holarari ira puhimu. Ianimu lamu ia kokolona muko hihingo ta kabai ghini God ta kururina ira nona noni. Ghai mu e deo ghu gake ngovala ghau ghu ka leta ianimu. 10 Vununa God e boka va rivai mo ia muko hihingo ka ira dolida ghita mala toka ghini ghitana taghuru kairira ira sasake, ta hioina ghu ghita ia doli soduai. Ghita e deo gada boka age muko hihingo ghini ghu ianimu. Nga ia muko hihingo ta sipa meha ka malau iahi peka mu, e vanadi leme ira noni.

11 Finini heve ne riva ghinina ka ghau muko hihingo ta leghui iahi ia lao nanafa ka God: Ghatunaina ghau no riva va gigima mala va podolina no lotoro mo taghomu ta ghuana, nia no kabai va podolo kavei haroma ta deona go muko ghu taghomu e ghua, no hala ghau ghu ka ia neke rivai mukono nia ghau no maughini ghemu ia va kilasa ka God, e ghua. Nia muko hihingo ianimu ka ghau neke toka ghini ghau, vununa ghatunaina mu ghau no kabai finiau ara, kabai toka ghinagu ara, nia no lao hihingomu va kilasina hei ia ta rivai muko, e ghua. Ka vahina leghutau noke riva ghidi irahi nga ghau mu, ghau noke deo go holara taremehana ghu ia neke rivai sasakeo. 12 Ka ia kakangava vanamu age ara leta ianimu sepao, ara e deo gake suna nganai ghu ma hei neke riva ghinina ia muko, ba, hei mo neke vavahagalana ka muko ianimu. Nga nake kakangava nga ara mu, vununa ara na kabai va podolo vanamu va veha ka ia nahalina God ta torai ngana tahu ghai fuluduna ghau. 13 Ka puhimu iahi lamu ghau ne va gigima ghaina.

Uve, ne hohoghona mamu ta va gigimaina ghau ia ngangana ka ghai, nia ghai na veha vanamai haro ka Taetusi neke toraina va manemaneo, vununa ghau noke va gigimai ia nganganana manei. 14 Ara nake to turi va varanga lao ka manei ghini ghauna ghau, nia ghau noke deo go va haghavau ghu e ghua, vununa manei neke finini ta vehana ira puhimu ghau. Taghe ira vahina leghutau nake va kahe ghini ghauro la ara dike hohoghonaro e ghua, edi hohoghona haro ghu molamo ira leghutau nake va varavaranga ghidi laoro ara ka Taetusi ghini ghauna ghau. 15 Taetusi neke toraina namaha ghini ghau fuludu ka ia ngana laoi manei ia ghaghahena noke nomohio ghau manei, ka noke maughini ghemuo nia ka noke va vonavonaio, e ghua. 16 Ghatunaina mu ara na toraina va manemane, vununa ara na toraina rangerange ka ghau.