2Cor 8 | KjiSC | STEP | Ghau taremehagu noni kiloau, ghai na kabai ghini ghau ta avohina ghinina ia leghutau ta veha neke kave mehao ka ia varisute God neke vanadi kakatono ira noni ta va hohoghona ka ia babarana Masedonia.

2 Corinthians 8

Ia Kakai Maladi Ira Noni Kiloau

1 Ghau taremehagu noni kiloau, ghai na kabai ghini ghau ta avohina ghinina ia leghutau ta veha neke kave mehao ka ia varisute God neke vanadi kakatono ira noni ta va hohoghona ka ia babarana Masedonia. 2 Dike dufuri mo maneri tehi mamarutana nia dike kuma mo e ghua, ghe ia va manemane ka maneri neke toraina faa fuludu dike toraina lao hihingodi ghu ta toka ghidira ira keha noni ka tehi rongo. 3 Ara a boka toraina turi vanamu mo ka ia hohoghona dike toraina vanadi va tehi fuludu laona maneri ira keha noni fuludu laoina heve ia ta bokai maneri. Maneri dike riva ghini ghu ianimu ka ia nodi lao hihingo taghodi. 4 Maneri dike papada ghai tudu ma ta va malumurira ghai mala vanadi lao rongona ira noni ta va hohoghona Zerusalemu. 5 Maneri dike toraina riva fuludu laoi ghu heve nake toraina rangerangeio ghai. Maneri dike kusu vanani laona ia Lod ira dolidi taghodi, ianimu tuna ghe dike vanamai haro nga ghai ira dolidi, leghuina ia lao nanafa ka God.

6 Ghai nake va ohiohini ghu Taetusi neke va gigima ghauo tataniga ghinina rivai kakai iahi, take leghu age toka ghini ghauna ta va hokotina ghu riva ta namanama iahi. 7 Ghau no toraina veha ka vahina leghutau irahi nga: ia va hohoghona ka ghau ne toraina gigima fuludu, nia ghau no toraina tuturi beana va veha, ghau no toraina avohori ira vari va kakahei ghinina Kraes; ghau no toraina kuru ghau ngangana ta gigima haro mala leghuina God, nia ghau go namaha ghini ghai haro ghu ghai, no ghua. Vununa ghau no gigima ka leghutau irahi, o toraina gigima haro ghu molamo ka ira nomu kakai ta mala toka ghidi ira keha noni mala va podolo kaveina ka maneri ia namaha ka ghau. 8 Ara e deo ga nai vanamu ungene va gigima ta mala leghui ghu ghau. Ara mu na suna kabai va kahe ghini ghau ma ia doli ta kururi ira noni kiloaudi Masedonia ka ia ghaghahena ta toka ghidi maneri ira keha noni ta va hohoghona, a mala avohi ghu neto hohoghona la mamu ia namaha ka ghau.

9 Ghau no avohi mo ia varisute ta vanada kakato ia noda Lod Zisas Kraes. Neke puina taghotagho mo manei ka malauo God fate, ghe manei neke soni age va kumai mo taghonai malamuna ghau. Manei neke meha taghe kaike mane ta kuma neke ghua ka malau iahi peka mala boka age toraina va taghotagho ghauna.

10 Iahi ghu mu nogu tatanganana ara: E veha ka ghau ta va hokotina ia rivai kakai noke tataniga ghinio komuhu ta lao ini. Komuhu ta lao ini ghau lamu noke kusu kabai rivai kakai mala toka ghidira ira keha noni ta va hohoghona nia ghau lamu noke kusu tataniga riva ghinina e ghua. 11 Ghatunaina ghau o va hokoti ghu riva ianimu. Taghe noke ridiridi ghinio la ka ia vato ghini o ghua, o ridiridi ghini haro ghu riva ghini va hokotona ka ira heve leghutau ta kuru ghau ghatunaina. 12 Vununa noto puina lao hihingomu la ghau ta tufana ka ira heve ta kuru ghau, e deo ge tongovona ghu mu ta tufa va tehina ghau, vununa God e kabai ghini ghau ma ta tufana ghau ka heve ia ta kuru ghau lama, eka ghua ghu ka heve ia ta deo ghau. 13 Ara e deo ga va sisiva nanamo vanadi ghu kehara ka ia vanamu mamarutana ghau, nga vununa ne tehi ta kuru ghauna ghau ka fafata iahi, geala e fafahaka ghu ta toka ghidira ghau ira ta malanga. E ghua ianimu ghe gedi age toka ghini ghau nga maneri noto malanga la ghau, dito tehiri ghu maneri. 14 Ka torai ghatunaina mu, ghau mu e tehi ghau fuludu, o boka mo ghu toka ghidira ka heve ira ta malanga ghidi maneri. Keha fafatara ka ia ke age tehiri maneri ta deo ghau ghu ghau, gedi ke tufa ghau ghu tuna maneri, e ghua. Ka ghaghahena iahi ta boka vari tokaina ghau palupelo ka ira leghutau ta malanga ghidi ghau. 15 Taghe ia ta kahei la ka ira kakangava ta maduana, “Maneri dike varigharai ghano va tehiro, neke deo ma ta kununa, nia maneri dike varigharai birusunaro, dike fata vanadi mo,” ^{▼▼8:15 Kave 16:18} ia ta ghua.

Taetusi Nia Ira Ta Va Nunumai Manei

16 Ara na kudo vehai God neke vananina manei Taetusi ia ngana heta mala toka ghini ghauna ghau, taghe ta ghua ghini ghau ini la ara. 17 Taetusi neke va manemane ghini mo ia fanga ka ghai ta mala ke age sigho ghini ghaunani manei. Ghe manei taghonai neke kusu hagalai age fini ghau mo. 18 Ghai na va ghahe taremehana age haro molamo Taetusi ia keha tahimai mane ia ta toraina va vonavonai ira leghu noni kiloau nga ka ia riva manei. Manei mu e tuturi beana ghini ia Nonomoho Ta Veha. 19 Kehanani mu, manei dike faeti ira noni kiloau ta mala va nunuma ghaina ka ia hio laoi kakai iahi ani Zerusalemu. Riva iahi mu e mala vanani varanga ia Lod nia e mala va podoli molamo ta kabai toka ghidi hohoghonana ghita ira keha, e ghua. 20 Ghai mu na ghahe varighara ghu torai banabanana ka ia ghaghahena posini namaha tufa iahi, mala deona ge la vona meha ghu keha gumigumira ka ira noni. 21 Nganganamaina ghu ghai mu mala riva ghini heve ia ta lotoro, eka ghua ghu ma ka ia nahalina ia Lod nga ka ira hibadi ira keha noni haro.

22 Ghai na va ghahe age taremehadi ghu maneri kaike tahimai mane ta va hohoghona. Ghai nato ke va sisiva ghini manei tehi fafatani ka ira leghu ghaghahedi nga, nato ke hadu kavei ghu ta puina kabai toka fuluduna manei. Nia ghatunaina mu manei ne toraina oho’oho fuludu kabai riva ghinina riva iahi, vununa manei ne toraina rangerange ghau. 23 Hei neto notoho ghini la Taetusi, manei mu e kaike taremehagu ara e riva taremehagu ghu mala toka ghini ghauna ghau. Nga keha palu tahimai mane ta va hohoghona irahi mu, edi lao vanani ia kiloau edi mala va varangi ghu ia babaolona Kraes. 24 O va podolo vanadi ghu maneri lito ghu ia nomu namaha mala avohina ira leghu noni kiloau nga ta lotorona mo ghai ka ta va varanga ghau ini ghai.