2Cor 9 | KjiSC | STEP | E toraina deo ma ge tongovona ghu mu ta mala kakangava ghini agena ara ka ghau kakai ta maladi iahi ira noni kiloaudi Zerusalemu.

2 Corinthians 9

Kakai Maladi Ira Noni Kiloaudi Zerusalemu

1 E toraina deo ma ge tongovona ghu mu ta mala kakangava ghini agena ara ka ghau kakai ta maladi iahi ira noni kiloaudi Zerusalemu. 2 Vununa ara to avoho ghau mo ta toraina ridiridi mala tokana ghau, nato ke turi va varanga ghau lao ghu ka ira noni aianihi Masedonia. Nake kahe ghua ghu iahi, “Ira ta va hohoghona aianihi Akaea dito ke va tana mala tokana ka komuhu ta lao anini,” nake ghua. Ia oho’oho ka ghau neke va ridiridiri tehini ka maneri. 3 Ghe ara e deo ga kabai ghini ghu ungene va varanga ghau iahi ta meha suna kaike ngengene kakatona ma. Ara na kabai ghini ghau ghu ta va tanarira ira nomu toka, e to vatana ghu ira nomu kakai, mala torai leghuina heve nake turi ghinio ara ka maneri. 4 Keha nonidi Masedonia ta va hohoghona dito leghu mehau la ara, dito age finini ghu ta deona heve ta va tanaina ghau, ara a toraina age haghava ghegu ghatu, vununa ara nake toraina kuruau rangerange ka ghau. Nia ghau haro go age haghava ghemu ghu, e ghua. 5 Na nganai na ghu ara mu, geala a kusu va kenu agerina mane ta va hohoghona irahi mala age toka ghini ghauna maneri va tanaina ia kakai noke naiungene ghinio mala riva ghinina ghau, e to kusu au ghu ghe ga sabara nga ara. Ghe ara na kabai ghini kakai iahi ta la mehana ka ia torai lao hihingo hohoghona, nga eka ghua ghu ka ia ta va tutuufu ghini ghau riva ghinina.

6 Nganai iahi: ia noni ponogara ta numa ghidi ma keha subudira mu, e rekahana ma haharuina ka manei ghatu, nga hei ia ta numa va tehi mu, e age faa ia haharui ka manei ghatu. 7 Ghau geala o toraina riva ghini kave ka ira sopai hihingomu taghe niha ghu ta mala vanadi laona maneri. Oka kakai taremehana muko hihingo ghini ghu, ba eka ghua ghu ka ia ta va tutuufu ghini ghau maneri, vununa God e namaha ghini hei ia ta kakai nona ka ia va manemane. 8 God e boka vanamu va tehi fuludu lao mo ira leghutau ta malanga ghidi ghau. Ianimu tuna ghe go age kuru ghau tudu nga ira vahina leghutau ta malanga ghidi nga, nia tehini ta kunura mala tufari ghedira ira keha noni e ghua. 9 Taghe ia ta kahei la ka ira Kakangava ta Maduana,
“Manei neke tufari kakato ka namaha ira noni ta kuma.
Ira riva ta veha ka manei edi au toghunai,” ^{▼▼9:9 Samu 112:9} ia ta ghua.

10 Vununa taghonai God ia ta vanadi subudi ira ta numa nia ghano mala mahai e ghua, e age va tehiri ira leghutau ta taghori ghau, ta boka va tehiri ira leghutau ta veha ta kave meha ka ira puhi ta lotoro ta riva ghidi ghau.

11 God e age va taghotagho ghau ka ira leghu ghaghahedi nga mala boka tufa tuduna ghau leleghu fafata, mala ka ia hio laoi ghai ia kakai ka ghau ka ira noni ta malanga ghidi leghutau iranimu, maneri edi age kudo vehai God. 12 Kakai ta riva ghini iahi ghau mu, e age vanadi ira noni ta va hohoghona ani Zerusalemu ira leghutau ta malanga ghidi maneri. Nia e age vanadi va ghazaghaza ira noni mala kudo vehaina God. 13 Leleghonana kakai ta vanadi ianimu ghau mu, maneri edi age va varangi God. Vununa ia varisute ka ghau ta vanadi maneri nia ira keha leghu noni ta va hohoghona nga e ghua e age va podoli ta leghuina ghau ia Nonomoho ta Veha ka Kraes. 14 Nia maneri edi age tarai toka ghini ghau nia ngana ghau fuludu, vununa maneri di finini God to vanamuna ia nona varisute ta va meha kakatoi.

15 Kudo vehai God ka ia Tuuna, ia nona namaha ta vanada kakato ta deo ngengene ta boka va fafahakina.