2Jo | KjiSC | STEP |

2 Zone 2Zo 2 Zone Ia Va Paluna Leta Ka Zone Ia Va Paluna Leta Ka Zone Va Kenuna Tuturi Ghidira Palu Leta Irahi

Ia Ponoena Va Fafahaka Ghini Ia Va Paluna Nia Va Litona Leta Ka Zone

Ka ia va kenuna leta Zone, manei ne kakangava ghini ia au varighara ka ghita taremehana God. Ka ia va paluna leta manei, Zone ne vari va kakahei ghini ta toraina ka au varighara taremehadira ghu ira ta vari va kakahei sesebo ira noni ta leghui Zisas. Ka ia va litona leta manei, Zone ne vari va kakahe ghini geala ira ta leghui Zisas, edi toraina mala toka ghidi ira hohoghodi mane ta vari va kakahe ghini ia Nonomoho Ta Veha.

Ka ia va kenuna leta Zone, manei ne tuturi ghidi ira ta vari va kakahei sesebo, dike to ghahe kainio ia va hohoghona ta hohoghona. Noni ta vari va kakahei sesebo irahi mu, dike ghahe kamoti kobosona ianimu, auna ka ira malaudi ira noni dike leghuio Zisas, va sisiva ongaharira ka ira suga tarai ira nodi vari va kakahei ta sesebo. Irahi lamu ghu mu noni ta vari va kakahei sesebo ne turi ghidira Zone ka lito leta irahi manei, ta mala balau ghidira maneri.

Ka ia va paluna leta Zone, manei ne vari va kakahei ghini ta toraina leghurira ira vetula ka God ghita ira ta leghui Zisas. Manei ne kahei molamo ta toraina vari namahaina ghita, ta va podolina ghu da leghui mamu ghita God ta ghuana. Ghe manei ne va fafahaki tada au mato va gigima ta auna ghu ghita ghidira ira noni ta vari va kakahei sesebo, ka ia fafata namaha ghidi ghita ira keha noni. Ira kokolodi noni ta vari va kakahei sesebo neke ngana maughidi ghenara manei ka leta iahi mu, ira ta vari va kakahei ghini, ia tinina Zisas mu eka toraina tinina noni ghu, ira ta ghua. Ghita mu da toraina au varighara taremehana God nia ira keha noni ta va hohoghona ka Zisas e ghua, nga daka toraina au varighara taremehadi ghu ghita ira ta vari va kakahei sesebo.

Ka ia va litona leta Zone, manei ne va kahe ghidi ira noni ta va hohoghona ka Zisas ta au varighara ma ta auna ghu maneri. Manei ne turi ghidi ira noni vehadi ta vari va kakahei neto ke va ghahe laorio taghonai ka suga tarai iranimu mala toka ghidira nia va gigimarira, e ghua. Manei ne helahela ghini Gaeasi ia mane baere ka taghonai ka ia hio namahari nia zuka ghidi manei noni vari va kakahei iranimu, ne kabai ghini ghu ta riva ghuana ma ta laona ghu iahi manei. Nga ia mane Daeoterefesi ia ta ghua ghini babaolonana neke sokeio ia mana mala kopu ka Zone, neke pake ghenao ghu hio namaharira ira mane vari va kakahei ta veha neke to tuhu laorio Zone mu, manei neke kahe tonoi. Daeoterefesi neke va nodori ira keha noni ta toka ghidira ira noni vehadi ta vari va kakahei, neke kai kaveri ghu ghe ka ia suga tarai, hei ka maneri neto toka ghidi la ira ta vari va kakahei.

Mane Dimitiriasi ta ghua ghini iahi babaolonana, haeba neke hio taremehana leta iahi vananina Zone ka ia fafata ghahe laona ka malau leghaha ianimu neke la vanani ghu Gaeasi. Haeba Dimitiriasi mu kaike ghu ka ira mane vari va kakahei ta veha neke tuhu kaveriro Zone.

Hei Neke Kangavarira Palu Leta Irahi

Leta irahi mu neke kangavari Zone ia tuunamane Zebedi e tahina mane ghu Zemesi. Zisas neke kudoi manei ta mala kaikeuna ka ira tazoi palu mane nonomoho.

Fafata Kangavarira

Zone haeba neke kangavari palu leta irahi aianihi Efesasi leghuna kangavi ia buka Nonomoho Ta Veha ka manei, e namo lao ghu ma ka ia fafata neke kangavio manei ia va kenuna leta ka manei. E nona au ka 90 komuhu leghuna ia urahana Zisas (90 AD) mu neke kangavarira ghu manei leta irahi. Iahi mu 57 komuhu leghuna ia tetuleghu ka Zisas ka ia leme.

Ka ia va paluna leta manei, ka ia fafata kahei Zone ne kakangava lao ka “ia ghasefaa faetaina ka God nia ira tuuna”, ia ta ghua mu, haeba kaike ghaghahena mala kahei manei neke kakangava lao ka kaike suga tarai nia ka ira noni ta au haghele haro ka suga tarai ianimu, e ghua bana. Suga tarai iahi mu neke au ka giliona kaike ghu ka ira malau leghaha gheremena ia malau leghaha Efesasi.

Zone neke kangava laoi ia va litona leta ka taghonai ka Gaeasi ia nona mane baere ka Kraes, neke taremehanao ia suga tarai giliona kaike ghu ka ira keha malau leghaha, gheremena ia malau leghaha Efesasi.

Torai Papataidi Nganganara Ka Leta Irahi

Zone ne fotai ia va paluna leta ka manei ka palu pagahaina. Ka ia va kenuna pagahaina, Zone ne va kakahe ghidi ira ta va hohoghona ka Zisas ta auna ka ia ghaghahena ta leghuri ira vetula ka God. Kaike ghaghahena ta mala riva ghinina maneri iahi mu, edi vari namahai. Ka ia va paluna pagahaina mu, Zone ne va kahe ghidi maneri ta mato va gigimarira ira noni ta vari kakahei sesebo, ta vari va kakahei ghini ghu, ia tinina Zisas mu eka torai tinina noni ghu manei, ira ta ghua. Ne va kahe ghidi ghu manei mu taka au varighara taremehadira ghu noni ta vari va kakahei sesebo irahi.

Zone ne fotai molamo ia va litona leta ka manei ka palu pagahaina. Ka ia va kenuna pagahaina, Zone ne helahela ghini Gaeasi ghinina ia namaha nia toka ta vanadi manei ira ta vari va kakahei neto ke tuhu laorio taghonai Zone. Ka ia va paluna pagahaina, Zone ne kahe tonoi Daeoterefesi ghinina neke sokerio manei ira ta vari va kakahei neto ke tuhu laorio taghonai Zone.

Ira Papataidi Tuturi Ka Giliona Ia Va Paluna Leta Zone

1. Va Kenuna Pagahaina: Leghuri ira vetula ka God. 1:1-6

2. Va Paluna Pagahaina: Oka au varighara taremehadi ghu ira ta vari va kakahei ta sesebo. 1:7-13

Ira Papataidi Tuturi Ka Giliona Ia Va Litona Leta Zone

1. Va Kenuna Pagahaina: Zone ne helahela ghini Gaeasi 1:1-8

2. Va Paluna Pagahaina: Zone ne kahe tonoi Daeoterefesi 1:9-14

2 John

Va Kenuna Pagahaina: Leghuri Ira Vetula Ka God. 1:1-6

Ira Ungene Veha

1 Leta iahi mu sipana ka ara Zone ia manesepa ta babatu ka ia kiloau. Ara na kakangava age ka agho ia fotati neke faetighono God nia ka ira nou rekaha ^{▼▼1:1 Haeba iahi fafahakanana mu Zone neke kangava laoi leta iahi ka kaike suga tarai nia ka ira noni ka suga tarai ianimu, e ghua.} ta namaha ghidi ara ka ia hohoghona e ghua. Eka ghua la ghu ara lama, nga heiri haroharo ta avohi ia hohoghona ka God di namaha ghini ghau haro, 2 vununa ia hohoghona ne au ka ghita e age au toghunai taremehada ghu.

3 Ara na tarai fangai God ia Mama nia Zisas Kraes ia Tuuna mala vanada kakatona ia varisute, ia dudumana nia ia bule ka ia va hohoghonai ghita ia vari va kakahei ta hohoghona, nia ghita da vari namahai e ghua.

Au Ka Hohoghona Nia Namaha

4 Ara nake puina age va manemane fuludu dufurira kehara ka ira rekaha agho ta auna maneri ka ia hohoghona, taghe neke ungene va gigima ghitao ia Mama. 5 Ghatunaina ara na fanga va gigimaigho ghu taremehagu fotati agho, geala tada vari namahaina ghita. Iahi mu eka ungene va gigima foforuna ghu, nga kaike ungene va gigima dake kusu avoho mehaio ka ia tatanigai leghuida mehani ghita Zisas Kraes. 6 Fafahakanana namaha ta ghua iahi mu, da riva ghini heve neto ke ungene va gigimaio God ka ghita. Manei neke ungene va gigima ghita ta vari namahaina, taghe noke nomoho mehaio ka ia tatanigainani.

Va Paluna Pagahaina: Oka Au Varighara Taremehadi Ghu Ira Ta Vari Va Kakahei Sesebo. 1:7-13

7 Tehi noni ta vari va kakahei sesebo dito ke kave laora ka malau iahi peka. Maneri edika va hohoghonai ghu neke hinae mehana Zisas Kraes ka ia tini noni ka malau iahi peka. Kokolona noni iahi mu e sesebo nia e kana ka Kraes, e ghua. 8 O balau ghidi ghau ta vari va kakahei sesebo irahi. Dito batu ghini ghau kave la ka ia vari va kakahei hohoghona ghinina Kraes, ianimu ia riva va faa ka ghau vanani God mu e age deo lighorona ma. Nga noto tetu va gima la noto lao ghu ghau, ghe ge age vanamu nga God ira leghutau ta veha neke nai ghidi ungene vanamuro manei. 9 Hei neto nanakai nona lao ngangana la taghonai, neto ghahe kaini ghu ia vari va kakahei ka Kraes, manei e deo ge age au parekete taremehana ghu God. Nga neto posi va gima la manei ka heve neke va kakahe ghinio, manei e age au parekete taremehana ghatu ia Mama nia ia Tuuna, e ghua.

10 Neto meha la ka ghau kaike noni mala va kakahe ghini ghauna, neto deo ghu ge vari va kakahei ghini ghu ia hohoghona ghinina Kraes, oka hio namahi ghu ka ira sugamu, ba oka ungene vehai ghu. 11 Vununa hei ia ta toka ghinini noni ianimu ka ghaghahena iahi mu, e age kaike taremehana manei nia toka ghini tuna ka ira riva ta muko manei, e ghua.

Va Nonoghadi Ungene Veha

12 Tehi fuludu ta mala turi vanamuna ara, ghe ara e deo ga kabai tuturi vanamu age ghu ka kakangava. Vununa ara na rangerangei ta mala magali age sigho ghini ghauna tada toraina nohe vari talaina ghu ghe, gada turi nga. E ghua ianimu ghe ge toraina age kamoto nga ia va manemane ka ghita.

13 Ira rekaha ka ia kerau fotati ^{▼▼1:13 Fafahakanana iahi mu ira noni dike parekete taremehanao ia suga tarai ka ia malau neke auno Zone.}, ia ta noni vehana neke faetio God taghe taghou la ia ta ghua molamo, di va ghahe age nodi ungene veha.