2Pe 2 | KjiSC | STEP | Sepao neke au porofeti ta hohoghodi aianihi Isiraeli nia neke au molamo ira porofeti ta sesebo e ghua. Ka fafata irahi keha noni ta vari va kakahei sesebo ka hoatamu ghau, edi age au molamo ghatu. Maneri edi age kahei ghatu ta hohoghodira heve ta vari va kakahei ghidi ari taghodi ka ghau, ghe vari va kakahei ari ka maneri mu e age va mukoi ia va hohoghona ka heiri ira ta age leghui ghatu. Geta neke leme mo ia Lod Zisas mala va kalasarira ira sasakedi ghe, maneri edi age ghahe kaini mo manei ghatu. Maneri magali ma edi age ngovalari ghu taghodi ghatu.

2 Peter 2

Ia Va Paluna Pagahaina: Pita Ne Kahe Kavei Tadi Huhughina God Ira Ta Vari Va Kakahei Sesebo. (2:1-22)

Ia Mamaghuana Ta La Meha Ka Ira Ta Vari Va Kakahei Sesebo

1 Sepao neke au porofeti ta hohoghodi aianihi Isiraeli nia neke au molamo ira porofeti ta sesebo e ghua. Ka fafata irahi keha noni ta vari va kakahei sesebo ka hoatamu ghau, edi age au molamo ghatu. Maneri edi age kahei ghatu ta hohoghodira heve ta vari va kakahei ghidi ari taghodi ka ghau, ghe vari va kakahei ari ka maneri mu e age va mukoi ia va hohoghona ka heiri ira ta age leghui ghatu. Geta neke leme mo ia Lod Zisas mala va kalasarira ira sasakedi ghe, maneri edi age ghahe kaini mo manei ghatu. Maneri magali ma edi age ngovalari ghu taghodi ghatu. 2 Tehi nonini edi age leghuri ghatu ira puhidi ta muko; nia vununa ka ira heve ta riva ghidi ira ta vari va kakahei sesebo, edi age kahe va mukoi ghu ira keha noni ghatu ia ghaghahena ta hohoghona. 3 Vununa ira ta vari va kakahei sesebo di luluto, edi age va kahe ghini ghau ghu ira turi sebo ta va vuha vonari maneri, mala sebo ghauna ka ira nomu leghutau ta taghori ghau. Sepao God neke nai ngangana ta mala va kilasarira ka ira sasakedi. Maneri edi age toraina hioi ghu ia muko ta la meha.

God E Age Va Mukori Ira Ta Vari Va Kakahei Sesebo Taghe Neke Riva Ghinio La Manei Sepao Ka Ira Noni Ta Muko

4 God e deo ma ghe geke dudumana ghidi ghu ira engizeli dike auri sasakero. Manei neke kai haghele laori Gehena ka ia ta va piliga ghidi seni ta nakairi ghu ka giliona nagoromo mala la auna ma aianimu ta vuhai la dufu mehana ghu ia ravata mala varifate.

5 Nia ka ia fafata auna Noa manei neke va kahe ghidi ira noni ta auna ka ira doli ta veha vanani God. God e deo geke dudumana ghidi ghu ira noni ka malau iahi peka dike leghuriro ira puhi ta muko. Manei neke va ghahe laoi ghu kaike leghahaina ologho mala atungurira maneri haroharo. Ghe God neke hio va dolini Noa nia ira vitu noni ka ia fototatamana taghonai, e ghua.

6 Leghunana, manei neke kahe kavei ta hotorira sasake ira palu malau leghaha Sodomu ghe Gomora, neke saligari ghu, age va kaike kabu kofelerira. Manei neke riva ghini iahi mala va podolina ka ira keha noni heve ta age dufurira ghatu ira noni ta muko puhidi ta huhughi God. 7 Ghe ka fafata ianimu, God neke hio kavei Loti aianihi Sodomu, vununa manei neke noni vehana, neke mumukoi fuludu ghu finirira ira zave lao meha ka ira noni neke la au taremehadiro. 8 Manei mu kaike mane ta lotoro, neke puina vahagali ghu ia hihingona finiri nomohorira leleghu ravata, ira doli au ta muko ka maneri.

Ira A’audi Ira Ta Vari Va Kakahei Sesebo

9 Ghau no finini ghu ia Lod ta avohina ia ghaghahena ta mala hio va doliri ira noni ta veha manei, ka ia hagheleri ira mamarutanadi va sisiva maneri. Nga ira noni ta muko mu manei ne posiri e mala va kilasari ghu ka ia ravata mala varifate. 10 Iahi mu e hohoghona sughavona ghu ka ira ta leghuri ira dolidi ta muko, ghahe leghuina ia hanganana nonoro nia edi mumukori ia mana mala kopu ka ia Lod, e ghua. Noni ta sebo ghau irahi ka ira nodi vari va kakahei ghinina Kraes mu, edi va varavaranga edika tuu la ghu, nia edika nanazara ghu maughedira ka ia kahe va mukomukori ira varanga ka ia Lod, e ghua. 11 Ghe geta gigima fuludu lao ghu nia mana fuluduri ghu ira ta vari va kakahei sesebo ira engizeli ghe, maneri e deo gedi ngengene fateri ghu ira ta vari va kakahei sesebo ka ira nganganadi ma taghodi. Ne ghua nga iahi mu vununa maneri edi age lausasaba ghini ia Lod, ia ta kurui taghonai lama ia mana mala fateri ira noni.

12 Ta vari va kakahei sesebo irahi mu edi ungene va mukoi heve ia ta deo gedi avoho va fafahaki ghu. Maneri mu taghe pusi meusu ta deo nganganadi edi ghua ma, ira ta doli meha mala sakomori nia atunguri ira ta ghua. Maneri edi age hioi ghu mukodira taghe pusi meusu ta age ghuana ghatu. 13 Ira ta vari va kakahei sesebo edi age hioi ghatu ira lilifudi vari ngovala dike va riva ghidiro ira keha noni. Geta ghua ghu ka ia ravata ghe, maneri edi veha vanadi rivai mahai varigharana mala rivai puhi ta mukona. Maneri mu taghe ira sota ta kapata nia ira aka’aka edi ghua ka vari hoataimu nira ghau. Sughavona ghu maneri edi veha vanadi sebo ghauna fata mahai taremehamu. 14 Maneri edi nonoro ka ira hibadi, nia e deo gedi hoviri ghu rivai puhi ta mukona, e ghua. Maneri edi sebori ira taka nadu ghu ira nodi va hohoghona, koroho haghele laorira ka ia hanganana sasake. Maneri dito va kakahe ghidi ghu taghodighi ta torai mala lulutona. Di au ghu ka ia tibiri mu maneri. 15 Maneri dito ghahe kaini ia hangana ta lotoro, dito leghui ghu ia puhina Balamu ia tuunamane Beoro, ia ta namaha ghini fuludu ia rongo ta boka hioi manei ka ia rivai sasake. 16 Ghe Balamu neke nodo ka ia puhina ta gogosu ka ia fafata rozaroza laona ka manei ia nona dongiki neke ngengene taghe leona noni neke ghuao.

17 Ta vari va kakahei sesebo irahi mu, torai deo lighorodi ma, taghe ira futu ta karango nia taghe ira toba ta dafe kairi edi ghua ma, vununa edi va bebereana tudu, ghe ge deo nga ma ta va ghuduvina. God neto va ghono vanadi ia malau ta tuta ia nagoromo aianihi Gehena. 18 Maneri edi va vonavonari taghodi ghe gedi kokomodi kakato ngama ka ira nodi turi ta gogosu. Ka ia nonoro maneri di auauri ghu va fihiki leghu laorira ka ia doli ta muko ira noni dito ke bake ghahe kainio mo ia doli ta muko. 19 Ta vari va kakahei sesebo irahi mu edi naiungene edi kahei ghu ta boka leghurira ira ngagungagu ka taghodi ira noni, dito leghui la maneri vari va kakahei ari ka taghodi, edi ghua. Ghe taghodi ira ta vari va kakahei sesebo ge deo ghu kalasadira e ghua. Maneri mu taghe ira noni mala varituhu edi ghua, vununa ira puhi ta muko ta riva ghidi maneri edi paufu leghuri taghodi. Ne ghua nga ianimu ghu mu, vununa noni mu e au ka pekana ia mana ia heve ta auleghu ghini manei.

20 Ira noni mu e boka va kalasari mo ka ira puhi ta muko ka malau iahi peka ka ia avohi ia noda Lod nia ia Va Doli Zisas Kraes. Ghe maneri dito ke leghu lao la ka ira puhi ta muko ta ke age paufu leghurina ghu, ianimu e toraina muko laoni ka maneri fuludu laoina ia kusu fafata, ghe dike meha va hohoghonao nga ka Zisas maneri. 21 Geala e veha laoni ghu ka maneri ta deona gedi to avohi ghu ia lotorona hangana ka ia doli ta veha vanani God, vununa geta avohori ghu maneri ghe, di sokei mo ia ungene va gigima ta beana dike va kakahe ghidiro. 22 Heve neke dufuriro maneri mu ne va podoli ta hohoghodira palu gugutodi ngengene irahi: “Ia meusu ne leghu lao ka ira mumutina taghonai,” ^{▼▼2:22 Tatangana 26:11} ia ta ghua, nia “Ia vadu ghasena neke seselio, to ke leghu la liboro ka ia nepete,” ia ta ghua, e ghua.