2Pe 3 | KjiSC | STEP | Ghau taremehaguro, iahi mu va paluna letana ka ara nato kakangava vanamu agena. Ka palu leta haro idi, ara nato va sisiva va ngana ghini ghau leghu ghidira keha leghutau tato kusu avohoriro ghau, mala toka ghini ghauna ngana va veharira leghutau iranimu.

2 Peter 3

Ia Va Litona Pagahaina: Zisas Mu Eke La Leghu Mehani, O Nomohi Ghu Nia Au Ghu Ka Ira Doli Ta Lotoro (3:1-18)

Ka Ira Va Nonoghadi Ravata, Kehara Edi Age Mala Velavela Ia Hohoghona

1 Ghau taremehaguro, iahi mu va paluna letana ka ara nato kakangava vanamu agena. Ka palu leta haro idi, ara nato va sisiva va ngana ghini ghau leghu ghidira keha leghutau tato kusu avohoriro ghau, mala toka ghini ghauna ngana va veharira leghutau iranimu. 2 Na kabai ghini ghau ta nganarira heve dike kahe kenuio ira porofeti sepao laoni ta age dufuna ghatu. Nia ara na kabai ghini ghau haroma ta nganaina heve neke ungene va gigimaio ka ghita ia noda Lod nia ia noda Va Doli ta mala riva ghidira ghita, ka heve dike kaheriro ira mane nomoho.

3 Va kenunana mu ghau o toraina va fafahaki ta age aura ka ira va nonoghadi ravata, ira noni ta leghuri ma ira nodi lao hihingo taghodi ghatunaina ta vuhai ke la leghu meha ghu Zisas. Noni taka va vonavona irahi ghu mu, edi age vela ghini ia naiungene ka Kraes. 4 Iahi mu ta age vari tuufuai ghinina maneri ghatu: “?Zisas neke naiungene mala ke la leghu mehana, ghe neke ghua mamu baia? ?Hae la ghu mu manei? !Ira faada ghe tato lemero, ghe vahina leghutau nga mu ta varifata ma ta au idi ghu, ka ia tatanigainani malau iahi peka!” Edi age ghua.

5 Taghe ianimu edi ghua kabai velavela ghini ghauna, vununa maneri edi deo gedi kabai nganai ghu neke va vuhaio sepao laoni God kolanga ani fate nia malau iahi peka e ghua ka ia nona saoro. Manei neke va podolo vonai malau iahi peka ka ia kolo va kolo lilohina. 6 Ianimu tuna ghe neke va mehai nga ia ologho leghaha ta gigima mala va ludurina malau iahi peka, nia va lomohorira ira vahina leghutau ta doli nga, ka kolo haro, e ghua. 7 God neto kahe va gigimai molamo ghinina ia kolanga fate nia malau iahi peka e ghua, ta age auna ma ta dufuna ghu ia fafata ta age saliga va nogha ka totoi ka ia ravatana varifate. Ka fafata ianimu, manei e age fateri nia va mukori ira noni ta deo gedi leghui ghu manei.

Taghe Heve E Age Ghua Mu Ia Ravata Ka Ia Leghu Mehana Zisas

8 Ghe oka ngana kai ghu ghau taremehaguro, kaike ravata mu taghe kaike togha komuhu ka ia Lod, nia kaike togha komuhu mu taghe kaike ravata ma, e ghua ka manei. 9 Nganganadira keha nonira mu ia Lod ne mamahuge va ghuduvina ia nona naiungene ghinina ia leghu meha ka taghonai edi ghua, ghe manei e deo ge mamahuge ghu. Nga manei mu ne au afa ghini ghau malana ia veha ka ghau mo. Manei e deo ge kabai va mukoi ghu kaike noni ghu, nga ne kabai vanadi hei noni ta ghuana ia vehana fafata mala va hohoghonana, ta taghuru kairira ghu ira sasakedi.

10 Ghe ia ravata ka ia Lod mu, e la meha. Ira noni e deo gedi age avohi ghu niha ta la mehana ravata ianimu, vununa manei e la meha taghe kaike noni ta sisiko, e ghua. Nia ia kolanga tuna ge age ogoro ghu ka totoi ta urungu mamaghuana, e ghua. Nia ira vahina leghutau tato va vuhari nga ka malau kamoto iahi peka mu edi age saliga va nogha haro.

Taghe Iahi Geala E Ghua Auna Ka Ghita Ka Ia Au Afa Ghinida Ia Lod Ke La Leghu Mehanana

11 ?Dito age ogoro haro la vahina leghutau irahi nga ka ghaghahena iahi, geala taghe kokolona noni heve o age ghua ngaini ghau? Ira doli ka ghau geala e beana nia nai ghau taghomu vanani God, e ghua, 12 ka ia au afa ghini ghau ia Ravata ka God. Nia ghau o riva ngazuluai va veha mala va mamagali mehaina ia ravata ta age va doli ghini totoio God kolanga ani fate. Nia ira vahina leghutau dike auro nga tuna gedi age kolo va nogha ghu ka ia sisitona, e ghua. 13 Ghe ghita mu da fini vai kenui ia foforuna kolanga fate nia ia foforuna malau aiahi peka e ghua, neke naiungene ghinio manei, ia malau ta au ira leghutau ta lotoro lama ka ia mato God.

14 Ianimu la ghau taremehaguro, ka ia au afa ghini ghau ravata ianimu ka ia nomu rangerange, o riva ngazuluai va veha mala auna ka ia doli ta mamalahu ta deo sotana nia ta bulebule e ghua, vananina Kraes ka ia ke la leghu mehana manei. 15 Nia o ke nganai iahi e ghua. Ia au afa ka ia Lod mu, e mala nai vanani fafata taghonai mala hio va dolirira tehi nonini. Iahi mu taghe neke kakangava vanamu ageo lama Polo ia tahida mane ka Kraes, ka ia avoavoho neke hioio ka ia Lod. 16 Polo ne tuturi ghini ka ira nona leta haroharo ia ghaghahena ta mala hio va doliri God ira noni. Keha ta kaherira manei mu edi marutana va fafahakarira. Keha noni taka nadu ghu ira nodi va hohoghona nia ta deo gedi avohi ghu ia hohoghona e ghua, dike fihiki lao mehari ira nona leta va hazarira ira fafahakadi turi ka manei. Taghe ianimu lamu dike riva ghidira maneri ka ira keha pelodi ta au lao ka ira Kakangava Ta Maduana. Maneri edi age va mukori taghodi ka ia riva ghini iahi.

17 Nga ghau ira noni baere ka ara mu to kusu avohi iahi. O au banabana ghu mala edika hio va zea ghau la ghu ira noni ta muko ka ira nodi vari va kakahei sesebo. Noto leghuri la ghau maneri, ghau o age riufu kave ka ia nomu va hohoghona ta nadu. 18 Nga o kodolo ma o lao ghu, ka ia varisute ta vanada kakato, nia ka ia avoavoho ghini ia noda Lod nia ia noda Va Doli Zisas Kraes, e ghua. !Ia varanga e nona manei ghatunaina, e au toghunai ghu! Amen.