2Th 1 | KjiSC | STEP | Leta iahi mu nake kangavi ara Polo, taremehadi Saelasi ghe Timoti, Vanamu ghau ira noni kiloau aiamuhu Tesalonaeka, ta nona noni haro God ia noda Mama, nia ia noda Lod Zisas Kraes, e ghua.

2 Thessalonians 1

Polo Neke Ungene Vehari Ira Noni Kiloaudi Tesalonaeka

1 Leta iahi mu nake kangavi ara Polo, taremehadi Saelasi ghe Timoti,

Vanamu ghau ira noni kiloau aiamuhu Tesalonaeka, ta nona noni haro God ia noda Mama, nia ia noda Lod Zisas Kraes, e ghua.

2 Ghai na tarai fangai God ia noda Mama, nia ia Lod Zisas Kraes e vanamu ghu ia varisute ta vanada kakato nia ia bule.

God E Age Fateri Ghatu Ira Noni Ta Ngovangovalari Ira Noni Kiloau.

3 Ghau tahimairo, ghai na kudo vehai tudu ma God ghini ghauna ghau. Ne veha ghu ta ghuana ianimu e ghua, vununa ia va hohoghona ka ghau ne kodolo ma ne au ghu, nia ia vari namahai ka ghau e ghua, ne gigima laoni. 4 Ghai na va varangi turi vanadira ira keha nona noni God ghinina ia nomu tetu va gima, nia ia au hohoghomu tudu ka ira ngovangovala ghau nia mamarutana e ghua, ta vavahagala ghidi nira ghau. 5 Ghe God e va rivai vari ngovala iahi ghatu, mala va podolina ia nona totonuna, mala o fata ghu ghau ira ta vavahagala vanani God, ta haghelina ia nona Ravutu, 6 nia ka ia nona totonuna haro, manei ghatu e age va vavahagalari ira noni dike ngovangovala ghauro. 7 Nia God e age vanamu ghau ira noni ta vavahagala, nia ghai haro e ghua, ia bule, ka ia la mehana ia Lod Zisas ka malauo God fate. Manei e la meha taremehadi ira nona engizeli ta mana 8 ka ia totoi ta burungu, hio mehaina ia varifate ka ira ta zea ghini ghedi God, nia ka ira ta pake ghedi leghuina ia Nonomoho Ta Veha ka ia noda Lod Zisas, e ghua. 9 Ghatu maneri edi age hioi ia vavahagalana ngongovala ta au toghunai, vari fotaina ka ia Lod, nia ka ia namanamana ia nona mana ta varanga e ghua. 10 Iahi mu e age dufu ghu ghatu ka ia ravata ta ke la leghu mehao ia Lod, helahela ghinina nia va vonavonaina ira leghu nona noni ta va hohoghonai nga manei. Nia ghau haro e ghua, o age helahela ghini manei ka ravata ianimu, vununa ghau no va hohoghonai heve nake tuturi ghinio ghai ghinina manei.

11 Ne ghua mamu ghe, na tarai toka ghini ghau tudu nga ghai, e mala kahei ghu ia noda God ta fatana ghau ka ia doli neke kudo ghauno manei. Nia ghai na tarai fangai God ka ia nona mana, e mala toka ghini ghau ghu riva ghidira ira leghu riva ta veha nga ta nganai riva ghidi ghau, nia ira leghutau haroharo ta kabai riva ghidi ghau ka ia nomu va hohoghona ka Zisas, e ghua. 12 E ghua mamu ianimu ghe, gedi heluhelu ghini nga maneri haroharo ia babaolona ia noda Lod Zisas, vununa ghini ghau, ghau. Ghatu maneri edi age heluhelu ghini ghau haroma ghu taremehana manei. Ghe di age ghorevura nga leghu irahi nga mu, vununa ka ia nona varisute ta vanada kakato ia noda God, nia ia noda Lod Zisas Kraes, e ghua.