2Th 3 | KjiSC | STEP | Va nonoghanana ghau tahimairo, ghai a fanga ghau ta tarai toka ghini ghaina. O kusu tarai ghini ia nona nonomoho ia Lod, e mala ongaha mamagali ghu, nia edi va vonavonai ghu e ghua hae ghe hae ghu, taghe neke ghuao la ka ghau.

2 Thessalonians 3

Polo Neke Fanga Toka Ka Ia Tarai

1 Va nonoghanana ghau tahimairo, ghai a fanga ghau ta tarai toka ghini ghaina. O kusu tarai ghini ia nona nonomoho ia Lod, e mala ongaha mamagali ghu, nia edi va vonavonai ghu e ghua hae ghe hae ghu, taghe neke ghuao la ka ghau. 2 Tarai fangai haro God e mala age hio va doli ghai ghu, ka ira leghutau ta muko ta kabai va riva ghini ghai ira noni ta puina muko, vununa eka ghua ghu ira noni haroharo ta va hohoghonana ka ia Lod.

3 Ghe ia Lod mu e hoghona tudu ma. Manei e va gigima ghau nia e kagara ghini ghau e ghua, ka Satana. 4 God to vanamai ia rangerange tato leghurira ghau nake toraina ungene va gigima ghauro mala riva ghidira, nia ta riva ghidira ma ta aura ghu ghau, e ghua. 5 Ghai na tarai fangai ghu ia Lod, e babatu ghidi ghu ira hihingomu, ta mala avoho va vehaina ia nona namaha God ia ta malada ghita, nia ta mala avohina ia ghaghahena tetu va gima taghe Kraes ta ghuana.

Polo Neke Kahe Ghidi Va Gigima Taka Toalina Ghu

6 Ghau tahimairo, ghai na torai ungene va gigima ghau ka ia babaolona ia noda Lod Zisas Kraes, ta au va takalena ka hei noni kiloau ta au ka ia doli ta toali, nia ta deo ge leghui ghu ia ghaghahena ziifi ka riva nake va kakahe ghini ghauno ghai, e ghua. 7 Vununa ghau no avohi mo, ta mala deke leghurira ghau, ira riva ka ghai. Ghai deo gake toali ghu ka ia fafata au taremehamu ghau. 8 Ghai e deo gake va malumu ghai ghu taghomai ta hio ghanona ka hei noni, nato deo la ga tabarari ghu. Ghai nake ziifi rivana redu ravata, mala oka rugusi ghini ghai la ghu ghau, nake ghua. 9 E deo ge deo ghu, au ghaina ia mana ta mala fanga ghau ta valiha ghaina ghu, nga nake kabai ghini ma ta vanamuna ia ghaghahena riva, ia ta mala deke leghui ghau. 10 Ka ia fafata au taremehamu nga ghai ghe, ghai nake vanamu haroma puhi mala leghui iahi: “Hei neto deo la ge riva ghu, eka mahai ghu,” ia ta ghua.

11 Ne ghua mo iahi ghe, ghai na nomohori ngama kehara ka ghau ta auna ka ia doli ta toali, pake ghedina rivana, nia ta au kakatona ma gara ghidira ira nodi riva ira keha noni, e ghua. 12 Ka ia babaolona ia Lod Zisas Kraes, ghai a torai ungene va gigimari nia va gigimari e ghua kokolodi noni iranimu, ta au tokena ta rivana ghu, malanana ia doli ka taghodi. 13 A kahei ghu ara ka ghau haroharo ira tahimai, taka baelu ghemuna ghu riva va vehana.

14 Fini avohori heiri ira ta pake ghedi leghurira ungene babatu idi ka ghai ka leta iahi, oka au tadi la ghu, mala edi haghava ghedi ghu. 15 Taghe ira kana oka ghua ghidi ghu ka ira nganganamu, nga o va kahe ghidi va gigima ma, vununa maneri mu tahimu ma ka ia kiloau.

Va Nonoghadi Ungene Va Vonavona Ka Polo

16 Tarai fangai taghonai ia Lod na ia bule, e vanamu tudu ghu ia nona bule geta heve ta dufuna. Ia Lod e au taremehamu ghau haroharo.

17 Iahi tuna mu nogu ungene va vonavonana ara Polo. Ara na kangavi ghu ka va nonoghana leta iahi ka toraina kamegu ini taghogu. Iahi ghu mu nogu va ghilaghila ta kangavi tuduna ara ka ira va nonoghadi leghu nogu leta nga, nake kangavari mamu ara, ta ghuana.

18 Ara na tarai e age vanamu ghu ghau haroharo ia Lod Zisas Kraes ia varisute ta vanada kakato.