2Ti 1 | KjiSC | STEP | Leta iahi mu sipana ka Polo leghuina ia lao hihingo ka God, neke meha mane nonomohono ghu manei ka Kraes Zisas, neke tuhu kaveio ta mala va kahe ghidira ira keha noni ghinina ia doli neke naiungene ghinio God, ia ta mala hioi ka ia va hohoghonai Kraes Zisas.

2 Timothy 1

Polo Ne Ungene Vehai Timoti

1 Leta iahi mu sipana ka Polo leghuina ia lao hihingo ka God, neke meha mane nonomohono ghu manei ka Kraes Zisas, neke tuhu kaveio ta mala va kahe ghidira ira keha noni ghinina ia doli neke naiungene ghinio God, ia ta mala hioi ka ia va hohoghonai Kraes Zisas. 2 Ka agho Timoti ia tuugu mane ta namaha ghinigho ara: Ara na tarai fangai God ia noda Mama nia Kraes Zisas ia noda Lod, e vananigho ghu ia nona varisute, dudumana nia bule. 3 Timoti, ara na kudo vehai God ghinighona agho. Manei mu ia God ta riva vanani ara ka ia ngangana ta kalasa, taghe dike ghuaro la ira faagu. Redu ravata ara na nganaigho tudu ma ka ira nogu tarai. 4 Ara na torai kabai ke fini leghuighoni, vununa na ngana leghui ia nakele ka agho, ka ia vari ghahe kaida. Nia ara a puina ke age va manemane fuludu ka ia ke age au varigharada ghatu.

Polo Ne Va Gigimai Timoti Ta Va Hohoghonana

5 Ara na nganai ia va hohoghona ta hohoghona ta auigho agho; ia kokolona va hohoghona ta au ka nou kakaghase Loisi nia nou uke Unasi haro, e ghua. Ka ia va hohoghona ara mu, agho e kuruigho haroma. 6 Ianimu la ghe na va ngana ghinigho leghu nga ara, ta tehu va burungina ia kaikadolo ka ia tarunga neke vananighono God, ka ia fafata va fara ageri ara kamegu idi ka pau nia. 7 God e deo geke vanada ghu ia tarunga ta mala mamaghu, nga neke vanada ia tarunga ta mana, namaha nia au banabana, e ghua.

8 Oka haghava gheu la ghu, turi vanadira ira keha noni ghinina ia noda Lod. Nia oka haghava ghinagu ghu ara e ghua, ge ta au ghu ara ka ia pipiliga ghinina Kraes. Ka ia gigima ta vananigho God, o va tana ghu ta vavahagala taremehaguna ara, ka ia va ongahi ia Nonomoho Ta Veha. 9 God lamu neke hio va doli ghitana, nia neke faete ghitana e ghua, ta mala auna ka ia doli ta maduana. Ghe neke riva ghini nga manei iahi mu, ghita da puina fata ma ta ghua ghini ghitana eka ghua mo, nga vununa manei neto ke kusu pakara ghini meha sepaoni ia nona vatovato, ghe neke vuha nga malau iahi peka, mala va podolo vanadana ia nona namaha nia varisute ka Kraes Zisas. 10 Ghe ghatunaina geto va podolori ghu God leghu irahi nga e ghua, ka ia mehana Kraes Zisas ia noda Va Doli, neke paufio ia mana ka ia leme, va podolo vanadana ia doli ta au toghunai ka ia Nonomoho Ta Veha. 11 God neke faeteau ghu ara ta mala tuturi beanana, ta mala mane nonomohona nia ta mane mala vari va kakahe ghinina ia Nonomoho Ta Veha, e ghua. 12 Ianimu lamu ghe, na meha au vavahagala nga ara aiahi ka giliona pipiliga ini. Ghe ara e deo ga haghava ghini ghegu ghu e ghua, vununa ara na avohi hei ia ta rangerangei ara, nia ara na torai avoho va vehai ta boka kopu ghidira manei heve nake rangerange laoina ara ka manei, ta vuhai dufu ghu ia ravata ta ke la leghu meha manei. 13 O posi va gima ka ia ghaghahena vari va kakahei ta lotoro noke avohoriro agho ka ara. Nia o ke nganai haroma ta auna ka ia va hohoghona nia namaha ta auigho agho ka Kraes Zisas, e ghua. 14 Ka ia nona toka ia Tarunga Ta Maduana ta au ka gilioda ghita, o banabana ghu kopu ghidira ira leghutau ta veha neke vananighoro manei.

15 Taghe to avohi nia la agho ira leghu noni kiloau nga dike meharo aiahi ka ia babarana Esia mu, dito ke ghahe kaiau ara; Figelasi ghe Hemogenisi na nga ghe, to ghahe kaiau haro.

16 Ara na tarai fangai ia Lod e vanani ghu ia varisute Onesiforasi nia ia fototatamana kamoto ka manei e ghua, vununa manei e fani sigho ghinagu, e va gigimau ghu. Manei e deo ghe geke haghava ghinagu ghu ara nake auno ka ia pipiliga. 17 Ka ia fafata mehana manei Romu, manei neke haduau ara ka ira leghu pelodi nga, neke vuhai dufuau ghu. 18 A tarai fangai ghu ara ia Lod ta vananina manei ia dudumana ka ia ravata mala varifate. Nia agho to puina avoho va vehai taghe niha ngavulu toka neke vanaguna ara manei aianihi Efesasi.