2 Timothy 2

Agho Mu O Mala Nona Mane Magara Ta Veha Kraes Zisas

1Timoti, agho mu taghe toraina tuugu mane a ghua ghinigho ara, o au va gima ghu ka ia varisute ta vananigho God ta au ka Kraes Zisas. 2Agho noto ke nomohoau mo vari va kakahe ghidira ara tehi leghutauni ka kenudi ira tehi noni. O vari va kakahe ghidi leghutau hohoghodi leghaha irahi ka ira noni ta rangerangeri ghita, ta boka ke va kadolo laori maneri ka ira keha noni. 3Tetu va gima ka ia vavahagala taremehagu ara taghe kaike mane magara ta veha nona Kraes Zisas, o ghua. 4Noto meha nona mane magara la Kraes agho, oka la holara ghu ka ira keha puhi ka doli iahi. Neto ghua la ianimu, agho e deo go boka age va veha hihingoi ghu manei neke nai haghelighono ka ia nona punugara. 5Leghuri ira puhi mala leghuri ka ia Lod ka ia riva ghini ia nona riva, taghe ta ghua nia lama kaike mane ta purudu nia paraku e ghua. Ka ia varighohi purudu ba paraku manei, neto deo la ge leghuri ghu ira puhi mala leghuri ka ia hilava, manei e deo ge boka age kenu ghu, ge hioi ghu ia tabarana ghatu. 6Ira noni ponogara ta riva ngazuluai lamu, ta kusu hio vehadira ka ira fuadi ira nodi rigete. 7Noto suteri la agho ka ia nganganau heve nake va kahe ghinighoro ara, ia Lod e toka ghinigho ta toraina va ziloina zomona ka vahina leghutau irahi nga.

8Ngana avohi Zisas Kraes mu kaike mane neke doli meha ka ia pagusu Mane Ginitaukela Deveti, neke tetu leghu ghu ka ia leme, ta ghuana. Iahi lamu ghu mu ia Nonomoho Ta Veha ta tuturi ghini beana ini ara. 9Vununa ara na tuturi ghini beana Nonomoho Ta Veha iahi, na au vavahagala ghu, piliga ghinagu senina maneri ka ia giliona pipiliga, taghe kaike noni ta muko puhina ta ghua ghinaguna. 10Ara na lao hihingogu mo ta tetu va naduna ka vahina leghutau nga, neto mala age toka ghidi la ira neke faeteriro God ta mala hioina ia hio va doli ka manei nia ia pelarana varanga ta au toghunai ka Zisas Kraes, e ghua. 11Iahi mu kaike nonomoho ta hohoghona:
Dato ke leme taremehana la ghita Kraes,
ghita da age au tana haroma manei ghatu.
12Dato tetu va gima la ghita,
ghita da age au kopu taremehana haroma manei.
Nga deo ga avohi ghemai ghu manei, dato ghua la ghita,
manei e age kahei haroma, ta deona ge avoho ghita ghu ghita.
13Geta ka suteri ghu ghita ira noda naiungene ghe,
manei e suteri tudu ma ira nona naiungene,
vununa manei e deo ge boka huhai ghu ia nona naiungene taghonai.

Ia Maneriva Ta Kabai Ghini God

14O va ngana ghidi leghu tudu ira noni haroharo ghidi leghutau irahi, nia o kahe ghidi va gigima ka ia babaolona God taka vari tuufuai ghidira ghu ira ngengene. Vari tuufuai ta ghuara irahi mu e deo lighorodi ma, nia edi boka ngovalari mo heiri ira ta nonomoho, e ghua. 15O riva va gigima, e mala kudo vehaigho ghu God ka nou riva nira. O riva va veha taghe kaike maneriva taka boka haghava ghena ghu o ghua, vari va kakahei va lotorina ia nonomoho ta hohoghona ka God.

16Au va takale ka ira nonogele ta kingo ta deo lighorodi, vununa e age hio va varihau laorini ka God ira noni. 17Kokolona ngengene iahi ka maneri mu, taghe bigho ta deo ge boka mafo ghu, e ghua. Haemeneasi ghe Filetasi lamu dike ghua harora iahi. 18Maneri palu dito ke age kave kaini ia ghaghahena ia hohoghona ka ia tuturi beana ghinina ia tetuleghu ka ia leme neto ke dufu ia ta ghua, ne age ngovali ghu ia va hohoghona ka ira keha noni. 19Ghe ia hohoghona ka God mu e tetu va gima taghe kaike ghahipa mala va tetetu suga e ghua, ta au lao kakangava irahi: “Ia Lod e avohori heiri ira ta nona taghonai,” ia ta ghua, nia kehanani mu, “Heiri ira ta kahei taghodi mu nona ia Lod, ira ta ghua mu, edi toraina taghuru kairi ira leghu muko nga,” ge ghua ghu e ghua.

20Ka giliona ia suga ta taghotagho, keha disira edi riva ghidi ka golu nia siliva e ghua, nia kehara tuna gedi riva ghidi ghu ka heke nia kava kiriufu, e ghua. Kehara ka irahi mu e maladi ma ka ira fafata ta tongovodi, nia kehara tuna ge mala riva ghu ma ka ira re ravata mo, e ghua. 21Noto sute va mamalahuigho la taghou ka ira leghutau ta muko, agho lamu disi ta boka mala rivana God ka ira nona riva ta tongovodi. Ia doli ka agho e age mamalahu nia maduana e ghua, va tana riva vananina ia Faghina ka ira leghu riva ta veha nga.

22Pelo kairi ira leghutau ta va hugahugari ira noni foforu ka ia muko. O riva ghidi tudu ma agho ira leghutau ta lotoro. Ghorevaha ghini ia va hohoghona, ia namaha, nia ia bule e ghua, taremehadi ira ta helahela ghini ia Lod ka ira hihingodi ta mamalahu. 23Oka holara ghu ka ira vari tuufuai ta kingo kaputu, vununa agho no avohi mo e va memeha magara, ta ghuana. 24Ira nona noniriva ia Lod mu edika mala magara ghu, nga edi toraina mala hio suteri ira noni haroharo. Maneri mu edi toraina avohoa ghini ia vari va kakahei, nia edika tuma hali ghu, e ghua. 25Maneri geala edi areha ghidi va kakahe ghidira ira noni ta gorai ia hohoghona. Haeba God e age va malumuri mo ghatu ta taghuru kairira ira sasakedi edi va hohoghonai ghu ia hohoghona. 26Ka ianimu ghe gedi age avoavoho nga maneri, gedi boka age pelo kaini ghu ia mamutu ka ia Faghinadi ira nazahi. Vununa maneri mu to age hake va gima ka manei, mala riva vananina ira lao hihingo ka taghonai ia Faghinadi ira nazahi.