2Ti 4 | KjiSC | STEP | A toraina kahe ghinigho va gigima ghu ara ka kenuna God nia Kraes Zisas ia ta age fateri ghatu ira ta doli nia ira ta leme e ghua ka ia leghu mehana ta va tetui ghu ia nona Ravutu:

2 Timothy 4

Va Gigima Ta Tuturi Ghini Beanana Ia Nonomoho Ta Veha

1 A toraina kahe ghinigho va gigima ghu ara ka kenuna God nia Kraes Zisas ia ta age fateri ghatu ira ta doli nia ira ta leme e ghua ka ia leghu mehana ta va tetui ghu ia nona Ravutu: 2 Tuturi beana ghini ia saorona God. Ohoꞌoho riva ghinina ka ia fafata ta kabai nonomoho ira noni nia geta ghua ka ira fafata ta pake ghedi maneri, e ghua. O au unuhu ma o va totonuri ghu ira nou noni, buruarira nia va gigimarira e ghua, ka ira ungene babatu ta veha. 3 Vununa ia fafata e la meha ta age pake ghediro ghatu va melongona ira noni ka ira vari va kakahei ta hohoghona. Maneri edi age leghuri ma ghatu ira nodi lao hihingo taghodi, edi age haduri ghu ira noni ta vari va kakahei ta va kahe ghidira leghu ta kabai nomohori nga taghodi lama. 4 Maneri edi age sokei ia hohoghona, edi age leghuri ghu ira turi sepa.

5 Ghe agho o torai au leghu ghinigho taghou ka ira vahina leghutau ta dufu nga. Oka maughini gheu ghu ta vavahagala vananina ia Lod. O riva va gigima mala hio haghelerira ka Kraes ira keha noni. O va hokoti ia riva neke vananighono God.

Ia Rangerange Ka Polo Ghini Ia Leme

6 Nga ghinina ia doli ka ara mu, taghe ia waeni mala veala ta oranga ghini lao ka ia sopebeana, e ghua. To namo ghu mu ia fafata mala leme ka ara. 7 Ara nato ke magara va veha, nato va hokoti ghu ia varighohi, au va gima tuduna ka ia va hohoghona. 8 Ghatunaina e au afa ghinagu ghu ia tabaragu, ka ia leghui ara ia doli ta veha vanani God, ta age vanagu ghu ia Lod ia Mane fate ta lotoro, ka ia leghu mehana ka ia ravata mala varifate ghatu. Tabara ianimu ghu mu, eka malagu ma ghu ara, nga e maladi haroma heiri haroharo ira ta au afa, kuhana ghinina ia leghu meha ta varanga pelara ka manei.

Ira Nona Ngengene Babatu Taghonai Polo Vanani Timoti

9 Agho o toraina va gigima, o magali meha finiau ghu. 10 Demasi mu neto age ghahe kaiau, vununa manei ne ngana hetari fuludu ira leghutau ka doli iahi ghatunaina, neto lao ghu Tesalonaeka. Keresenisi mu to lao aianihi Galesia nia Taetusi tuna geto lao ghu Dalamesia, e ghua. 11 Kaikena ma Luku lama ne au taremehaguna ara. O hio taremehau meha ghu Maki noto meha la agho, vununa manei e age toka ghinagu faana ka ia riva ghatu. 12 Ara nato tuhu laoi Tikikasi aianihi Efesasi. 13 Noto la meha la agho, o toraina hio mehai ia koti nake nai kai hinaeio ka Kapasi aianihi Toroasi nia hio mehari haroma ira nogu buka ta vividuhu e ghua, sughavona ghu ira ta riva ghidi ka kafudi sipisipi.

14 Alekesada ia mane ta rivai leghutau ka kapa, neke puina ngovala va mukoau ara, ghe ia Lod ta age rivai lilifuna ka manei ka heve neke riva ghidiro. 15 O balau ghini ghu manei, vununa manei ne taga teturi ira leghu dake kaheriro nga ghita.

16 Ka ia kusu fafata hioau lao maneri ka kenuna ia manefate, e deo hei neke meha toka ghinaguna. Maneri haroharo dike to ghahe kaiau ara. Ghe ka ia rangerange ara, God e deo ge age raghe leghuri ghu. 17 Ghe ia Lod neke tetu taremehaguna ara, neke vanaguna ghu ia gigima, a mala boka tuturi beana ghini va hokoto ghu ara ia Nonomoho Ta Veha mala nomohina ira noni haroharo taka Ziu ghu. Manei ghu neke hio va doliauna ka ia leme. 18 Uve, ia Lod e age hio kaveau ka ira leghu rapata ta muko nga, e age hio va doliau ghu hio hagheleauna ka ia nona Ravutu ka malauo God fate. E nona ghu God mu ia pelarana varanga ta au toghunai. Amen.

Ira Va Nonoghadi Ungene Veha Ka Polo

19 Vanadi Pirisila ghe Akuila nia heiri haro ta au ka ia suga Onesiforasi e ghua, nogu ungene veha irahi. 20 Erasitasi ne au mo aianihi Koriniti, nia Torofimasi tuna ga nai kaini ghu aianihi Maelitasi e ghua, vununa manei neke fogari. 21 Mamagali o meha dufu ghu aiahi, ghe ge dufu nga ia rabongi. Iubiulasi, Piudenisi, Laenasi nia Kaladia e ghua, di va ghahe vanamu age ira nodi ungene veha nia di ghua haro molamo ira leghu tahida noni kiloau nga, e ghua.

22 Ia Lod e au ka tarungau nia. Ara na tarai fangai ia varisute ka ia Lod ta vanada kakato e age au ka ghau haroharo.