3 Zone 3Zo 3 Zone Ia Va Litona Leta Ka Zone Ia Va Litona Leta Ka Zone

3 John

Va Kenuna Pagahaina: Zone Ne Helahela Ghini Gaeasi 1:1-8

Ira Ungene Veha

1Leta iahi mu sipana ka ara Zone ia manesepa ta babatu ka ia kiloau.

Ara na kangava vananigho age agho Gaeasi, ia nogu mane baere kenuna ta namaha ghinigho ara ka ia hohoghona.

2Nogu mane baere, ara na tarai fangai mala ira vahina leghutau nga ka ia kamotona doli agho edi age ghahe va veha taremehau ghu agho nia o mala doli va veha haro ghu ka tiniu nia e ghua, taghe doliu ta veha niala agho ka Kraes. 3Ara nake puina va manemane ka ia meha sabaradi kehara ka ira tahida ka Kraes, dike va kahe ghinaguro ghu taghe heve ta ghuana posi va gimana agho ka ia hohoghona ta auna ghu ka ia hohoghona. 4E deo keha heve leghutaunani ne va manemaneauna ara, fuludu laoina ia nomohi ara, ghau ira nogu rekaha haroharo no au ka ia hohoghona, ta ghuana.

Kopuna Ghidira Ira Noni Riva Ta Nona Ia Lod

5Nogu mane baere, agho no au hohoghona ka God ka ia kopu ghidi agho ira tahida ka Kraes dike kave la tuturi beana ghinio ia Nonomoho ta Veha, geta deo mo goke avohori ghu. 6Maneri dike tuturi ghini ka ia suga tarai aiahi ghinina ia namaha ta vanadi agho maneri. O toka ghidi ghu ko maneri ka ia ghaghahena ta veha vanani God, mala edi boka pagusi edi lao ghu ka ghaghahe ianimu maneri. 7Vununa maneri di ghahe vanani ia Lod, e deo ghu heve ta kabai hioina maneri ka ira noni taka va hohoghona ghu. 8Ghita ira noni ta va hohoghona mu, da toraina toka ghidi ghu noni irahi, mala da holara taremehadi ghu molamo ka riva ta mala va ongahi ani maneri ia hohoghona.

Va Paluna Pagahaina: Zone Ne Kahe Tonoi Daeoterefesi 1:9-14

9Ara nake kakangava vanani lao ia suga tarai ghinina iahi, ghe Daeoterefesi ka ia hagalai meha pauna mane babatu, ne pake ghena va ghunaghunana ka heve ta kaheina ara. 10Ka ia la mehagu ghatu, ara a age turi ghidi vahina leghutau neke riva ghidi nga manei nia ira vari makutu ta muko ta kaheri manei ghini ghaina ghai, e ghua. E deo soni ngama ge veha vanani ghu, neke pake ghena ghu manei hio namaharira ira ta ghahe vari va kakahei, nia neke va kahe ghidi haro molamo kehara taka toka ghidira ghu maneri, e ghua. Maneri dito toka ghidi la ira ta vari va kakahei, manei e nai kaveri ka ia suga tarai.

11Agho nogu mane baere kenuna, oka riva leghui ghu ia riva ta muko, nga o riva leghui ma heve ia ta veha lama. Heiri ira ta riva va veha mu di va podolori taghodighi ta nona rekahana God, nia heiri ira ta riva va muko tuna, gedi va podolori ghu taghodighi ta deona gedi avohi ghu God, e ghua. 12Leghu noni nga di turi va vehai Demitiriasi, nia ia nonomoho ta hohoghona ta vari va kakahei ghini manei ge kahe ghua ghu molamo, ne ghua. Ghai haro na boka turi ghua ghini haroma manei, no avohi mo ghu ghau ta turi ghinina ghai ia hohoghona.

Va Nonoghadi Ungene Veha

13E tehi fuludu laoni ta mala turi vananighona ara, ghe ara e deo ga kabai tuturi vananigho age ghu ka kakangava. 14Vununa ara na rangerange ta mala magali age sigho ghinighona tada toraina nohe vari talaina ghu ghe, gada turi nga ghita palu.

15Ara na tarai fangai ta age vananighona God ia bule.

Ira nou noni baere aiahi di va ghahe age nodi ungene veha ka agho. O vanadi ko nogu ungene veha idi ka ira leghu noni baere nga ghita aiamuhu.