Act 1 | KjiSC | STEP | Vananigho agho Teofilasi: Ka ia va kenuna buka ara, ara nake kakangava ghidi ira vahina leghutau nga neke tataniga riva ghidiro nia vari va kakahe ghidiro Zisas,

Acts 1

Va Kenuna Pagahaina: Ia Nonomoho Ta Veha ne ongaha giliona Zerusalemu 1:1–8:3

Ira Podolo Ka Zisas Ka Ia Ke Tetu Leghuna Ka Ia Leme.

Luku 24:44-49

1 Vananigho agho Teofilasi:

Ka ia va kenuna buka ara, ara nake kakangava ghidi ira vahina leghutau nga neke tataniga riva ghidiro nia vari va kakahe ghidiro Zisas, 2 neke vuhai dufuno ghu ia ravata neke vonao manei ka malauo God fate. Iahi mu leghuna ia vanadi ungene babatu manei ka ia mana ia Tarunga Ta Maduana ira nona mane nonomoho faetaidi. 3 Ka ira rodana ngavulu ravata leghuna ia vavahagala, ta leme ghu Zisas ka ia hekefalahata, manei neke podolo ghidi ira mane nonomoho tehi fafatani, ka ira ghaghahedi ta toraina mala hio va hohoghona maneri ghinina ia doli leghu ka taghona. Ka fafata iranimu manei neke tuturi vanadi ghinina ia Ravutu ka God.

4 Kaike fafata ka ia fafata mahai taremehadi maneri, manei neke toraina ungene va gigimari: “Oka ghahe kaini ghu Zerusalemu, nga o afa e vuhai vanamu ghu ia Mama ia Tarunga Ta Maduana neke naiungene ghinio manei, taghe nake va kahe ghini ghauno la sepao. 5 Zone mu neke rivai seselebeana ka ketuhu, nga ka keha ravata nira lama, oto age seselebeana ghu ghau ka ia Tarunga Ta Maduana.”

Ia Vona Ka Zisas Ka Malauo God Fate

Maki 16:19; Luku 24:50-51

6 Ka ia fafata au taremehana Zisas ira mane nonomoho, maneri dike notohi, “?Lod, agho o age va tetu leghui mo ghatunaina ia Ravutu ka Isiraeli?”

7 “Eka mala avohori ghu ghau mu ira fafata, ba ira ravata tato kusu pata ghidi meha ia Mama ka ia nona mana,” neke ghua Zisas ungene tughurira. 8 “Ghe ghau o age kuru ghau mana ghatu, ka ia meha suku ghau ia Tarunga Ta Maduana, o age va kahe ghidi ghu leghu noni nga ghinaguna ara aiani Zerusalemu, ka ia babarana kamoto Zudia, ka ia babarana Samaria gheremena mo, nia hae ghe hae ghu ka ira va nonoghana malau iahi peka, e ghua.”

9 Leghuna kahei lama manei iahi, neke to hio vonai ghu God ka kolangana, poika laona ka ira giliodi toba ka ia fafata mato ta au ghu maneri.

10 Ka ia fafata neke rizu vai vonao manei, dike mato dodoghohoto laono ghu maneri ka kolangana, heve ba ne ghua ma, neke to tetu ghu aianimu visi gheremedi mo, palu mane ta va vona poko ghiho. 11 Kahe ghua tuna iahi dike ghua, “?Ghau mane mu Galili, heve no ghua ghe no tetu nga aiamu, mato vona laona ka kolangana fate? Zisas neke hio ghahe tamu lao iahi ka malauo God fate mu, e ke la leghu meha mo ghatu, taghe noke fininio la ka ia vona laona.”

Mateasi Ne Holari Zudasi

12 Ianimu tuna ghe dike sipa nga ka ia Vuhukuna Olivi, dike leghu lao ghu Zerusalemu, haeba e gaha ghobi kangafa ^{▼▼1:12 kaike kilomita} bana nga hauainana. 13 Di la dufu ghu, maneri dike vona lao fate ka ia ringifota dike auno la. Dike aura mu, Pita, Zone, Zemesi ghe Aduru, Filipi ghe Tomasi, Bafolomiu ghe Matiu, Zemesi ia tuunamane Alofiasi, Saemoni (neke holara magara ghinio mala hio kaverira ira Ziu ka ia kopu ira noni Romu), nia Zudasi ia tuunamane Zemesi, e ghua. 14 Maneri dike fani varighara tudu ma dike tarai taremehadi ghu ira fotati nia Mere ia nona uke Zisas nia ira tahina mane Zisas, e ghua.

15 Kaike ravata ka fafata ianimu, haeba e kaike ghobi varadaki noni ta va hohoghona bana nga dike varigharara. Tetu vona tuna Pita ge ngengene ghu, neke ghua, 16 – 17 “Ghau noni taremehagu, ira leghutau neke kakangava ghidiro Deveti ka ira Kakangava Ta Maduana ghinina Zudasi, dike toraina mala age ghuduvu. Ia Tarunga Ta Maduana neke va kahe ghini Deveti sepaoni, heve ta mala kakangava ghinina. Zudasi mu neke kaikeu ma ka pukuna iahi ghai, neke faetio mala holara taremehamai harona ka riva beana iahi, geta neke batu ghidi mo manei ira mane mala sakomo hioina Zisas.”

18 (Zudasi neke tabari kaike galahena kava ka ia rongo neke hioio manei ka ia riva ta muko neke riva ghinio, neke riufu sopitili hinae ghu aianimu pohopo kavena ia sughahana kamoto ka ia tiana. ^{▼▼1:18Ne kaheina ka Mt 27:5 mu Zudasi neke liligho va reketi taghonai. Haeba manei mu neke liligho va reketi bana nga taghonai ka kaike hobona heke ka gheremena kaike pegu ta didighili ta mato hinae ka kaike galahena ta sare. E boka mo bana nga kodakina ia naroho keha nonira mala hio hinaeina ghu tinina ani, ba haeba ia hobona heke neke guto ba ia naroho neke buhutu, neke va zoghu hinae varihauina ghu sopitili habara kokopona manei. Haeba ia tinina manei neto ke age tatanigai boe haro molamo, neke boka age va pohopo tobehina ghu ia tiana ka ia fafata zoghu dufuna ka kavao.} 19 Ira noni haroharo ta au Zerusalemu dike nomohi iahi, Akeledama dike ghua ghini ghu galahena kava ianimu ka ungene Erameiki ia nodi ngengene taghodi, fafahakanana mu, “Galahena Kavana busaka,” e ghua ghu.)

20 “Iahi mu neke kusu kahe ghua ghini mo iahi ka ia bukadi ira Samu,” neke ghua Pita,
“‘Veha mo e korogha ghu ia sugana manei,
e deo ghu hei ta auina.’ ^{▼▼1:20 Samu 69:25}

Ne kahe ghua haro molamo iahi,
“‘Veha mo e hioi ghu kehara ia nonohe ka manei.’ ^{▼▼1:20 Samu 109:8}

21 Ghai na toraina faeti ghu ghatunaina, kaike mane ka heiri dike au taremehamai tudu dike meharo ghu, ka ia fafata au leleghui ghai Zisas, 22 tataniga ka ia seselebeana manei ka Zone, ta dufu ghu ka ia ravata neke hio vona tamai laono ka malauo God fate. Hei ia ta faeti ghai mu e toraina mala riva taremehamai ghai mala turi vanadira ira keha noni ghinina ia tetuleghu ka Zisas.”

23 Faeteri tuna palu mane dike ghua: Zosepu dike va kudo ghini Basabasi no (Zasitasi dike ghua ghini harono) nia Mateasi, e ghua. 24 Ianimu tuna ghe dike verevere haro nga, “Lod, agho to avohori ira hihingodi leghu noni nga, o va podolo vanamai ghu hei mo ka palu mane irahi no faetina agho 25 ta mala ke age riva taghe kaike mane nonomoho ta ghuana, holarina Zudasi neke to ghahe kai ghaino, mala laona ka ia malau ta fata mala laona manei.” 26 Ianimu tuna ghe dike hilava daesi nga, dike faeti ghu Mateasi ka ghaghahena ianimu, mala ke holara riva taremehadira ira keha tazoi kaike mane nonomoho.