Act 12 | KjiSC | STEP | E nona au ka fafata ianimu, neke tatanigai ngovangovalarira Herodi Agiripa ia mane ginitaukela, ira keha noni ka ia kiloau.

Acts 12

Zemesi Di Atungi Nia Pita Di Naini Ka Pipiliga

1 E nona au ka fafata ianimu, neke tatanigai ngovangovalarira Herodi Agiripa ^{▼▼12:1 Ia Kusu Herodi Agiripa Ia Mane Ginitaukela mu, tuunamane kaike tahina mane Herodi Anitipasi nia nona kakana manei tuna ge ghua ghu Herodi Ia Ta Varanga, e ghua.} ia mane ginitaukela, ira keha noni ka ia kiloau. 2 Manei neke kahe va gigimai ta mala atungina Zemesi ia tahina mane Zone ka leboto sisilufu mala magara. 3 Ne finiri ghu Herodi ta toraina veha vanadira ira mane babatu ka ira Ziu ghinina iahi, manei neke la sakomo hioini Pita ka ira ravatana Ia Mahai Varigharana Ghahe Fuludu. ^{▼▼12:3 Keha babaolona Ia Mahai Varigharana *Ghahe Fuludu mu Ia Mahai Varigharana Ia Bereti Ta Falao Kakato.} 4 Leghuna sakomo hioi maneri Pita, ta kai hagheli ghu ka pipiliga, keha rodana pukudi ta sopai rodana mane magaradi dike kopu ghinina manei. Herodi neke vato ghini ta mala hio kaveina Pita ka pipiliga ta fateina ghu ka kenudi ira noni, ka leghuna Ia Mahai Varigharana Ghahe Fuludu. 5 Pita mu neke au ghu ka ia pipiliga, ghe ira noni ta va hohoghona dike toka ghini ma dike au ghu tarai toka ghini laona ka God.

Kaike Engizeli Ne Va Kavei Pita Ka Pipiliga

6 Ka ia reduna, kenuna lao ia hio kavei maneri Pita ta fatei ghu ka kenudi ira noni, manei neke epu pipiliga ka seni ka vari hoataidi palu mane magara. Kehara ka ira mane magara mu dike tetu kopu ghini ia makatanana ia babarana malau pipiliga. 7 Heve ba, ne ghua ma, neto ke fegala pelara ghu ka ringifota ani, la tetuna ka kenuna Pita ia engizeli ka ia Lod. Ia engizeli neke la gigini Pita ka ghaghahonao, ghe neke kahe ghua nga iahi, “!Magali! !Tetu vona!” neke la ghua. Ianimu lama to sopele kave ghu ira seni ka ira kamena. 8 Ianimu tuna ghe neke kahe ghua nga iahi ia engizeli, “Va vonari nou poko, sadolo nira.” Riva ghini tuna ianimu, neke ghua Pita. “Lao, va vonai nou poko sodu nia, o leghuau ghu ara,” neke ghua ia engizeli.

9 Leghui tuna ge kave ghu ia engizeli, neke ghua Pita. Ka ia nganganana Pita mu neke suna fini ma kaike hahaima, neke ghua. Manei deo ghe ge ngana avohi ghu, neke toraina hohoghona mamu ta finini ani taghona, ta ghuana. 10 Maneri palu dike to ghahe fuludi ia kusu malau mala kopu ka ira mane magara, ghe dike la ghahe fuludini nga ia va paluna makatana ta kave kaini ia suga pipiliga. Ianimu tuna ghe, dike la dufu nga ka ia babakisina ta aeana ia hidi babarana malau leghaha ani ta tobehe kave lao peghuru. Ia babakisi neke to tobehe ma taghonai lama vanadira maneri palu. Kave lao tuna gedi tatanigai ghaghahe hinae ghu ka ia hangana leghaha dike ghua. Heve ba ne ghua ma, neto ke ghahe kaini ghu Pita ia engizeli.

11 Ka ta ghuao ianimu ghe, neke age ngana avohi nga tuna Pita mu heve neke dufuno, neke kahe ghua ghu iahi, “!Toraina hohoghona mamu! !Ia Lod lamu neke tuhu mehaina ia nona engizeli, mala meha hio va doliauna ara ka Herodi nia ka ira heve dike kabai va riva ghinaguro ira Ziu, e ghua!”

12 Ne age ngana avohi ghu iahi, manei neke lao ka ia sugana Mere ia nona uke Zone Maki, ka dike varighararo ira tehi noni, tarai ta auna ghu. ^{▼▼12:12 Babaolodira ira noni Ziu mu edi fani au ka Romu nia ka Ziu, e ghua. Zone Maki mu haeba neke kangavina mu ia Buka Nonomoho Ta Veha Neke kangavio Maki. Babaolonana manei ka Romu mu Maki, nia babaolonana ka Ziu tuna ge Zone ghu, e ghua.} 13 Pita neke la ketaketa ka ia makatana ta au peghuru, neke lao ghu Roda ia ghaseriva, mala la tobehina. 14 Ghe ne nomoho avohi ghu Roda ia leona Pita, manei neke fuludu vanani va ghaseghase, neke purudu leghu lao ghu gilio, deona geke tobehi ghu ia makatana. “!Pita ta tetu ani ka makatanana peghuru!” neke la ghua.

15 “!Agho mu noto gogosu bana nga!” dike ghua ghini. Ghe Roda neke tuufu ghini, Pita lamu, ta ghuana. Ghe maneri e deo gedi ke va hohoghonai ghu, nia tehidira ka maneri dike kahe ghua iahi, “Ia engizeli ta kopu ghini manei ko nia, ne meha va kahe vanada ghu tato leme ghenana Pita,” dike ghua.

16 Ka fafata ianimu, Pita neke ketaketa ma neke au ghu. Leghunana, ka ia ta kave lao ta la tobehi ghu makatana ani, ghe dike toraina la nodi fere nga fininina Pita. 17 Pita ne ngengene kameri ta vanemohona maneri, ghe neke turi vanadi nga heve neke dufuna nia heve neke ghua ia Lod batu ghini kavena manei ka ia pipiliga, e ghua. “O va kahe ghini nga Zemesi ^{▼▼12:17 Zemesi iahi mu ia tahina Zisas neke dolio ka ia age varihiodi Zosepu ghe Mere ia nona uke haro Zisas, neke kaikeu ghu ka ira mane babatu ka ia kiloau ani Zerusalemu. Zemesi ia neke mane nonomoho no, dike kodaka kainio ia pauna ia ta au ka Ira Riva 12:2 mu keha Zemesi na mo.} nia ira keha noni ta va hohoghona e ghua ghinina iahi,” neke ghua ghidi. Ianimu tuna ghe, neke lao nga tuna manei ka keha malauna mo.

18 Ka ia fufughona, ira mane magara dike to age toraina zea lao meha, ghini heve mo neke age dufuna ka Pita. 19 Herodi Agiripa neke hadui Pita hae ghe hae ghu, ghe deo ma geke finini ghu. Hio vonari tuna ira nona mane magara mala kopu ka vari sukutuai, ge kahe va gigimai ghu ta mala atungurira neke ghua. Leghuna iahi, Herodi neke ghahe kaini ia babarana Zudia neke hinae la au ghu ka ia malau leghaha Sesaria birusuna fafata tei.

Ia Leme Ka Herodi Agiripa

20 Herodi mu neke puina hali ghena fuludu ka ira nonidi ka ira malau leghaha Taea nia Saedoni, e ghua. Tetu tuna maneri gedi va ghahe laoi ghu kaike pukuna noni mala ke la va buleina Herodi dike ghua, vununa malau leghaha irahi ka maneri mu, edi va ghighiu ma ka soloso ini Herodi ta mala la hio ghedi ghanona. Maneri dike la baere taremehana ghu Balasitasi ia mane kenuna ka Herodi mala toka ghidina, 21 neke nakai vanadi ghu manei kaike ravata mala la finina Herodi maneri. Ne dufu ghu ia ravata, Herodi neke va vonari ira nona poko ginitau, neke la nohe ghu ka ia nona nonohe ginitaukela, ghe neke tuturi vanadi nga. 22 “!Iahi mu leona kaike god, nga eka leona noni ghu!” dike ghua kudodira ira noni.

23 Ka fafata ianimu lama, neto ke meha ghu ia engizeli ka ia Lod, toraina va fogarina Herodi, vununa manei neke kabai ghini ia va totoana ka ira noni, nga geala e vanani ia varanga God mo. Ghanini tuna saku ge leme ghu, neke ghua.

24 Ghe ia Nonomoho Ta Veha ka God, magali ma neke ongaha ghu, dike to age tehi laoni ghu ira noni ta nonomoho ta va hohoghona ghu.

25 Leghuna va hokotori Banabasi ghe Solo ira nodi riva aianihi Zerusalemu, maneri palu dike leghu lao ka ia malau leghaha Anitioko, hio taremehadina Zone Maki.