Act 14 | KjiSC | STEP | Neke ghua molamo aianihi Aekoniamu: Polo ghe Banabasi dike lao haro ka ia suga mala varighara ira Ziu, dike toraina la tuturi va veha ghu nia age va hohoghona tuna tehi noni Ziu nia ira taka Ziu ghu, e ghua.

Acts 14

Polo Ghe Banabasi Aianihi Aekoniamu

1 Neke ghua molamo aianihi Aekoniamu: Polo ghe Banabasi dike lao haro ka ia suga mala varighara ira Ziu, dike toraina la tuturi va veha ghu nia age va hohoghona tuna tehi noni Ziu nia ira taka Ziu ghu, e ghua. 2 Ghe ira Ziu dike pake ghediro va hohoghona ka Zisas, dike va hugahugari ira noni taka Ziu ghu, edi mala age halari lao ghu maneri ka ira ta va hohoghona dike ghua. 3 Polo ghe Banabasi dike au soduai aianimu toraina tuturi ghini beana va gigimana ia varisute ta vanada kakato ia Lod. Mala va fini ghidina e hohoghona mamu nonomoho iahi ta ghuana mu, ia Lod neke vanadi mana mala riva ghidira ira hahaima va ghilaghila ta fefereana. 4 Ghe ira nonidi Aekoniamu dike to age fota ka ira nganganadi ghidira maneri. Kehara dike leghuri ira Ziu nia kehara tuna gedi leghuri ghu ira mane nonomoho, dike ghua.

5 Keha noni taka Ziu ghu nia keha noni Ziura e ghua, taremehadi ira nodi noni ta babatu, dike vari turi ghini ta mala ngovalarira Polo ghe Banabasi nia ta mala va fera ghidi ghahipana tuna mala va lemerira e ghua, dike ghua. 6 Ghe di age hadu kavei ghu ianimu palu mane nonomoho idi, dike pelo ghedi lao ka ira malau leghaha Lisitara nia Deribi ka ia babarana Likaonia nia ka ira kobosodi ta au lilohori e ghua, 7 la tuturi beana ghinina ia Nonomoho Ta Veha aianimu.

Polo Ghe Banabasi Aianihi Lisitara Nia Deribi E Ghua

8 Ka ia au aianihi Lisitara, Polo ghe Banabasi dike dufu fati nohena kaike mane ta doli paheku meha ira ghahena, neke melu ghaghahe fuludai ghu. 9 Mane iahi neke vanemoho talinga lao neke au ghu ka ta tuturi beana ani Polo. Polo neke fini avohi ta kurui va hohoghonana manei, ta boka ke age veha ghenana ghu; va fera ghini hiba lao tuna neke ghua, 10 ghe ne kudo va fafaa lao nga, “!Tetu vona va lotoro ka ghaheu nira!” neke ghua ghini. Ia mane neke to paraku vona ma ka ira ghahena neto ke tatanigai ghaghahe ghu.

11 Ira varigharadi noni di age finini ghu heve neke riva ghinio Polo, dike kudo vona ka ngengene Likaonia, kahe ghuana iahi, “!Ira god mu taghe noni dito meha ghua, dito hinae meha ghu ka ghita!” dike ghua. 12 Maneri dike vanani ghu Banabasi ia babaolo Zeusi, ia kakaputudi ira leghu god nga ka maneri. Nia Polo tuna gedi vanani ghu ia babaolo Hemisi dike ghua, vununa manei neke ngengene tudu ma neke au ghu. Heimisi mu ia neke mala ngengene vanadiro ira keha god. 13 Ia sugana ia god Zeusi mu neke tetu namo lao ka ia malau leghaha. Ia hiama ka ia god Zeusi, neke hio meha bulumakau manedi nia havoro e ghua ka ira makatanadi babarana malau leghaha ani, vununa manei nia ira varigharadi noni e ghua, dike kabai rivai veala vanadi Polo ghe Banabasi.

14 Ghe di nomohi ghu ira palu mane nonomoho Polo ghe Banabasi ta riva ghinina maneri ianimu, dike rekuri ira nodi poko mala va podolina neke puina zea vanadi ta ghuana, dike purudu haghele lao ghu ka vari hoataidi ira varigharadi noni kudo ghuadira iahi, 15 “?Ghatomane, heve ghe no riva ghini nga iahi ghau? !Ghai mu noni taghe ghau lama! Ghai mu na hio mehai ia Nonomoho Ta Veha, o mala taghuru kairi ghu ghau leghutau ta deo lighorodi irahi, o ke fihiki lao ghu ka ia God neke va vuhaio ia kolanga, ia kava, ia tahi nia ira leghutau haroharo ka ira giliodi, e ghua. 16 Sepao, manei neke va malumuri ira leghu noni nga ta leghurira ira nodi lao hihingo taghodi. 17 Ghe God neke va podoli tudu ma e torai au mamu taghonai ta ghuana, ka ira leghutau ta veha tato riva ghidi manei: ka ia va meha vanamu nanare nia ka ia va fuari ira nunuma ka ia torai fafatadi nia ka ia vanamu ghano nia hihingo ta va ghazaghaza, e ghua.” 18 Neke ghua mo ianimu dike kaheina Polo ghe Banabasi ghe, dito ke marutana vanadi mo va nodorira rivai veala vanadina. Ghe va nonoghanana, ira noni dike nai nganganadi taka veala ghidira ghu ira bulumakau.

19 Leghudi keha ravatara ghe, dike la sipa meha nga aianihi Anitioko nia Aekoniamu keha noni Ziura, dike la va hugahugari ghu ira varigharadi noni ta mala magarina Polo. Va fera ghini ghahipa tuna mala atungina, gedi koroho kave laoi ghu ka peghuruna malau leghaha ani, dike ghua. Ka ira nganganadi maneri mu, neto leme manei dike ghua ghini ghu. 20 Ghe di la tetu lilohi ghu ira noni ta va hohoghona, manei neke tetu vona neke ghahe leghu lao ghu ka malau leghaha ani. Ia keha ravata, manei nia Banabasi e ghua, dike lao ka ia malau leghaha Deribi.

Polo Ghe Banabasi Di Leghu Lao Anitioko Aianihi Siria

21 Polo ghe Banabasi dike tuturi beana ghini ia Nonomoho Ta Veha ka ia malau leghaha Deribi, dike hio hagheleri ghu tehi noni ka ia va hohoghona. Ianimu tuna ghe dike leghu lao nga aianihi ka ira malau leghaha Lisitara, Aekoniamu nia ka ia keha malau leghaha Anitioko ka ia babarana Pisidia e ghua, 22 ke la va gigimarira ira ta leghui Zisas ta au va gimana maneri ka ia va hohoghona. “Au va gima ka ia va hohoghona nia oka ngana palupalu ghu e ghua, vununa Ghita da age vavahagala ghidi mamu tehi leghutauni, ghe gada age hagheli nga ia Ravutu ka God,” dike ghua ghidi. 23 Polo ghe Banabasi dike faeteri keha manefaara ta maladira ira sopai pukudi kiloau, ghe dike tarai toka ghidi nga tuna ka ia au filui mahai, nakai laorira ka ia kopu ia Lod, ka dike to rangerange laono maneri. 24 Ianimu tuna ghe dike ghahe fuludu nga giliona ia babarana Pisidia dike lao ghu ka ia babarana Pamufilia. 25 Aianimu maneri palu dike la tuturi beana ghinini ia nonomoho aianihi Periga, ghe dike ghahe rauru lao nga tuna Atalia.

26 Sipadira aianimu, maneri dike leghu lao ka vaka ka ia malau leghaha Anitioko aianihi ka ia babarana Siria. Aiahi lamu dike nai laorio ia kiloau maneri palu ka ia nona kopu God dike va ghaheriro ghu mala riva ghinina ia riva dike to va hokotio maneri palu. ^{▼▼14:26 Ia kusu ghahe riva beana ka Polo mu (Ira Riva 13-14) neke nona hioi kaike komuhu fotana va hokotina.} 27 Ka ia sabara laodi aianihi Anitioko, maneri palu dike kudo varighara ghidi ira noni ta va hohoghona. Maneri palu dike tuturi vanadi ghu vahina leghutau dike riva ghidiro nga ka ia mana neke vanadio God nia heve neke ghua manei tobehe vanadira ira noni taka Ziu ghu ia makatanana ia va hohoghona, e ghua. 28 Polo ghe Banabasi dike la au soduai taremehadi ira noni ta va hohoghona aianihi Anitioko.