Act 15 | KjiSC | STEP | Keha nonidira ka ia babarana Zudia dike meha ka ia malau leghaha Anitioko dike tataniga va kakahe ghidi ghu ira noni ta nonofoi kahe ghuana iahi: “Noto deo la ghau go hioi ghu ia papahe va ghilaghila, taghe neke kaheio ia vetula ka Mosese, e deo ge boka age hio va doli ghau ghu.”

Acts 15

Ia Haedu Aianihi Zerusalemu

1 Keha nonidira ka ia babarana Zudia dike meha ka ia malau leghaha Anitioko dike tataniga va kakahe ghidi ghu ira noni ta nonofoi kahe ghuana iahi: “Noto deo la ghau go hioi ghu ia papahe va ghilaghila, taghe neke kaheio ia vetula ka Mosese, e deo ge boka age hio va doli ghau ghu.” 2 Polo ghe Banabasi dike toraina age gigima fuludu vari tuufuai taremehadira maneri ghinina iahi. Ia kiloau ani Anitioko neke va puhini ghu ta va ghahe laorira ani Zerusalemu Polo ghe Banabasi nia keha noni ta va hohoghonara e ghua mala nonogele ghinina puhi iahi ka ira mane nonomoho nia ira nonifaa e ghua. 3 Ia kiloau neke tuhu vona laorira noni irahi aianihi Zerusalemu, dike la haghele fuludu ghu ka ira babaradi Fonisia nia Samaria e ghua, tuturi vanadira ira noni ta va hohoghona ta au aianimu ghidira ira noni taka Ziu ghu dike to fihiki lao ka God, ta ghuana. Nonomoho iahi dike toraina age va ghazaghaza ghini ira leghu noni ta va hohoghona nga.

4 Ka ia fafata la sabaradi maneri aianihi Zerusalemu, ia kiloau, ira mane nonomoho nia ira nonifaa e ghua, dike la hio namahari Polo ghe Banabasi. Maneri palu dike tuturi vanadi ira vahina leghutau nga neke riva ghidiro God ka giliona ia riva beana dike riva ghinio maneri palu. 5 Ghe keha mane ta va hohoghonara ka ia Lod dike holararo ka ia pukuna ira Farisi, dike tetu vona dike kahe ghua ghu iahi, “Ira noni ta va hohoghona taka Ziu ghu edi toraina papahe va ghilaghila nia edi toraina leghui ia vetula ka Mosese e ghua,” dike ghua.

6 Ianimu tuna ghe dike varighara nga ira mane nonomoho nia ira nonifaa ka ia kiloau, dike nonogele ghini ghu puhi iahi. ^{▼▼15:6 Nonogele varighara iahi mu neke au ka A.D. 49 ba 50.} 7 Leghuna kaike soduaina nonogele, Pita neke tetu vona neke tuturi vanadi ghu maneri taghe iahi: “Tahiguro, ghau haroharo to avohi neke faeteauna ara God ka hoataimu ghau sepao laoni mala tuturi vanadi beanana ira noni taka Ziu ghu, mala edi boka nomohi ghu nia edi va hohoghonai ghu e ghua, ia Nonomoho Ta Veha. 8 God, ia ta avohori ira hihingodi ira noni, neke toraina va podoli neke to nakairira ka taghonai ira noni taka Ziu ghu ka ia vanadi ia Tarunga Ta Maduana, taghe neke ghua ghini ghitao la ghita. 9 Manei e deo geke va sopai ghita ghu ka maneri, vununa maneri dike va hohoghona, neke va kalasari ghu manei ira hihingodi. 10 ?Ne heve ghe no kabai va kinakinai nga God, no va hure ghidi lao gapa ta tahu ghu ira taghurudi ira noni ta va hohoghona, ira ta deo haro gada boka gapari ghu ghita nia ira faada meha, e ghua? 11 Ghe ghai na va hohoghonai, ghita nia maneri haro e ghua, ta age hio va doli ghitana ghatu ka ia varisute ta vanada kakato ia Lod Zisas.”

12 Ia kamotona pukuna noni dike age vanemoho haroharo, ka ia nomohori maneri Banabasi ghe Polo tuturi ghidira ira hahaima va ghilaghila ta fefereana, neke riva ghidiro God ka ira riva maneri palu ka giliodi ira noni taka Ziu.

13 Ka leghuna dike to age noghao tuturina maneri palu, Zemesi neke tetu vona neke kahe ghua ghu iahi, “Ghau Tahiguro, o nonomoho meha ka ara! 14 Saemoni Pita neke bake va fafahaka vanada mo ghinina ia fafata neke tataniga va podolio God ia nona nganaheta ka ira noni taka Ziu ghu, ka ia hiori manei kehara ka maneri mala meha nona nonina taghonai. 15 Ira ngengene ka ira porofeti dike toraina leghui ghu iahi, ia ta kahe ghua iahi ka ira Kakangava Ta Maduana:
16 “‘Leghuna iahi, ara a ke leghu meha,
a ke va tetu leghui ghu ia ravutu ka Deveti neke riufuo.
Ara a ke age va tetu leghuri ira huara kaina manei,
a ke age nai va lotoro leghui ghu.
17 Mala ira keha butubutu noni haroharo, edi boka meha ghu ka ara,
holara harona ira noni taka Ziu ghu, ^{▼▼ 15:17 Emosi 9:11,12}
ira nake kudoriro ara ta mala taghorira taghogu,
ne ghua ne kaheina ia Lod,
18 neke riva va podoloriro leghutau irahi sepaoni.’ ^{▼▼ 15:18 Emosi 9:11,12}

19 Ka ia nganganagu ara mu, ghita daka va mamarutana vanadi la ghu ira noni taka Ziu ghu, ira ta fihiki lao ka God. 20 Nga e mala age au ghu ia bule ka vari hoataida ghita haroharo. E ghua ianimu ghe, ge veha nga ka ghita ta kakangava vanadi laora maneri. Va kahe ghidi tuna ghita taka mahairira ghu maneri ira ghano dike mala veala laoro ka ira nguzunguzu, nia taka riva ghinina ghu ia zave peghuruna ia varihio, nia taka mahai busakana ghu, ba taka mahai vilahadira ghu ira va vuha ta kumuhu va lemeri, e ghua. 21 Ira noni taka Ziu ghu edi toraina leghui ghu vetula iahi, vununa vahina leghutau irahi nga mu e toraina muko ka ghita ira Ziu. E ghua ianimu ghe, ge deo nga va mukorira ira Ziu. Sepaoni God neke vanani Mosese ia vetula. Tataniga ka fafata ianimuni, ia vetula dike tuturi beana ghini ma neke meha ghu ka ira leghu malau leghaha nga, nia dike izumi ma neke meha ghu e ghua ka ira suga mala varighara ira Ziu leleghu Ravata Mala Maghoso.”

Leta Vanadi Ira Noni Ta Nonofoi Taka Ziu Ghu

22 Ianimu tuna ghe dike va puhini nga ira mane nonomoho, ira nonifaa nia ia kiloau kamoto ani Zerusalemu e ghua, mala faeterira keha mane mala va ghahe laorira Anitioko aianihi Siria taremehadi Polo ghe Banabasi. Palu mane babatu dike faeterira ghu maneri mu, Zudasi (Basabasi ia ta ghua ghini haro) nia Saelasi, e ghua. 23 Leta dike hio taremehadi laona maneri mu, neke kahe ghua ghu iahi:

“Leta iahi mu sipana ka ghai ira taremehamu noni ta va hohoghona, ira mane nonomoho nia ira nonifaa e ghua, aiahi Zerusalemu. Iahi mu nake kangava vanadi age ghu ira noni ta va hohoghona taka Ziu ghu aiamuhu Anitioko, Siria nia Silisia, e ghua. !Nomai ungene veha ka ghau!
24 Ghai nato nomohi keha nonira ka ghai aiahi, dike age gora ghau ka ira nodi vari va kakahei, ghe ghai e deo gake va kahe ghidi ghu maneri ta mala age riva ghinina ianimu. 25 Nato ke nakaini ghu ghai ka kaike haedu varighara ta mala faeterira keha mane mala va ghahe age taremehadira Banabasi ghe Polo, ira palu nomai baere kenudi, 26 dike nakairiro ira dolidi ka ia leme nia doli, vananina ia noda Lod Zisas Kraes. 27 Ghai na tuhu ageri ghu Zudasi ghe Saelasi mala age turi vanamuna leghutau ta kakangava ghidi age haro irahi lama ghai.
28 Ia Tarunga Ta Maduana neto va podolo vanamai geala taka vanamuna ghu ghai keha hure ta tahurani ka fatemu ghau, nga riva ghidi ma leghutau irahi lama: 29 Ghau o toraina ka mahairi ghu ira ghano dike veala ghidi laoro ka ira nguzunguzu; ka mahai busaka ghu; ka mahai vilahidi va vuha ta kumuhu va lemeri ghu, nia ka zave ghu peghuruna ia varihio, e ghua. Ghau o age riva va veha ghatu, noto au va takale la ka leghutau irahi. Ghahe va veha ghau ka ia siakale.”

30 Ira rodana mane dike va ghahe laori dike hinae lao ghu aianihi Anitioko, dike la posini ghu kaike haedu varighara taremehadi ira noni ta va hohoghona, nia vanadi lao tuna ia leta, dike ghua. 31 Ka ia izumi maneri ia leta, ira noni dike puina age va ghazaghaza ghidi ira tuturi ta toraina vanadi gigima.

32 Ianimu tuna ghe dike tetu nga Zudasi ghe Saelasi ira palu porofeti, dike tuturi soduai vanadi ghu ira noni ta va hohoghona, mala va gigimarira ira nodi va hohoghona. 33 Zudasi ghe Saelasi dike au laona birusuna fafata aianimu, ghe dike va ghaheri ghedi nga tuna ira noni ta va hohoghona taremehana vanadina ia va beana, mala ke leghu laona Zerusalemu maneri palu ka ira dike varituhu ghidiro. ^{▼▼15:33 Keha kakangavara ka Giriki edi nakai hagheli papaguaina 34: Ghe Saelasi neke va puhini ta auna aianimu.} 34 – 35 Nga Polo ghe Banabasi mu dike auna aianihi Anitioko mala toka ghidira ira keha tehi noni ta vari va kakahei nia tuturi beana ghini ia saorona ia Lod.

Polo Ghe Banabasi Di Fota

36 Leghudi keha fafatara, Polo neke kahe ghua iahi ka Banabasi, “Aria dake leghu age ghu ka ira leghu malau leghaha nga, ka dake age tuturi beana ghinio ghita ia saorona ia Lod, dake age sigho ghidi ghu ira tahida noni ta va hohoghona mala fininina heve di ghua mo ta ghuana ka ia nodi va hohoghona.” 37 Ne veha mo ka Banabasi ta ghuana ianimu, neke kabai hio taremehana haro ghu Zone Maki manei. 38 Ghe Polo, toraina deo ma geke kabai ghini ghu ta ghuana ianimu, vununa Zone Maki neke ghahe kairi maneri aianihi Pamufilia deona geke riva taremehadi ghu ta dufuna ghu ka ia va nonoghana. 39 Ia vari tuufuaina iahi neke puina age faa fuludu, dike to age sopai ghahe ghu maneri palu. Banabasi mu neke hioi Zone Maki dike lao ghu ka kaike vaka tepe ka ia ghizuna Saeparasi. 40 Nga Polo mu neke faeti Saelasi mo nia ira noni ta va hohoghona aianihi Anitioko tuna gedi nakaini ghu Polo ka ia kopu ia Lod, dike ghua. 41 Ianimu tuna ghe dike kave kaini nga Anitioko, dike la haghele fuludu ghu ka ira babaradi Siria nia Silisia e ghua, va gigimarira ira kiloau aianimu.