Acts 18

Polo Aianihi Koriniti

1Leghuna iahi, Polo neke ghahe kaini ia malau leghaha Atenisi neke lao ghu ka ia malau leghaha Koriniti. 2Manei neke la dufui aianimu Akuila, ia mane Ziu neke doli mehao ka ia babarana Ponitasi. Manei nia Pirisila ia ghaseborona e ghua, dike bake sabara mo sipadira Romu ka giliona ia babarana Itali, vununa Kolodiasi Sisa ia mane ginitaukelana Romu neke kahe ghidi va gigima ira noni Ziu ta ghahe kainina Romu. Polo neke la finiri maneri, 3nia neke la au nia riva taremehadi maneri palu, vununa maneri palu mu dike rivai suga tapole taghe taghonai Polo la edi ghua haro molamo.

4Leleghu Ravata Mala Maghoso, manei neke la nonogele ka ia suga mala varighara ira Ziu, va sisiva ohiohirira ira Ziu nia ira Giriki e ghua, ta va hohoghonana ka Zisas. 5Ka ia sabara mehadi Saelasi ghe Timoti sipa mehadira ka ia babarana Masedonia, Polo neke nakaini ia kamotona fafata ka manei ta mala tuturi beana ghinina ia Nonomoho Ta Veha vanadira ira Ziu, neke va kahe ghidi ghu Zisas mu ia Mesaea, ta ghuana. 6Ghe ka ia fafata taga tetui maneri manei ta ungene va mukoi ghu, Polo neke vuvusu kairi ira sota ka ia nona poko sodu, taghe kaike va ghilaghila mala va balaurina maneri, ghe ne kahe ghua nga iahi, “!Heve ta dufu ghauna ghau mu, e age nomu va zezea taghomu! Ara mu kalasa ghegu ka ia riva ara. Ghatunaina e vai vona ghu, ara a lao ka ira noni taka Ziu ghu.”

7Leghuna ianimu, manei neke la au ka ia suga Taetusi Zasitasi, ia noni taka Ziu ghu. Mane iahi mu e va totoana ghini God, neke au vavata taremehana ghu ia suga mala varighara ka ira Ziu. 8Kirisipasi ia mane babatu ka ia suga mala varighara ira Ziu nia ia fototatamana kamoto ka manei e ghua, dike age va hohoghona ka ia Lod. Maneri tehini aianihi Koriniti dike age va hohoghona haroma, dike seselebeanari ghu.

9Kaike redu ia Lod neke la ngengene ka Polo ka kaike hahaima kahe ghuana iahi, “!Oka maugheu ghu! !O tuturi vanadi ma au ghu ira noni! !Oka vanemoho ghu! 10Vununa ara na au taremehau mo, e deo ghu hei ta boka age ngovalighona, vununa tehi noni ka malau leghaha iahi mu, nogu ara.” 11Polo neke au ma aianimu kaike komuhu fotana, vari va kakahei ghinina ia saorona God ka ira noni.

12Ghe ne meha tetu gavana ghu Galio ka ia babarana aianihi Akaea, keha Ziura dike varighara dike sakomo hioi ghu Polo hio laoina ka ia koti. 13“Mane iahi neke va hugahugari ira noni ta va totoana ghinina God ka ira ghaghahedi ta deo ge leghui ghu ia vetula,” dike ghua.

14Eto va tanai ngengene ne ghua ghu Polo mala tetu kaputina taghonai, neto fihiki lao ghu Galio ka ira noni Ziu ta halari ka Polo kahe ghuana iahi, “Ara a nonomoho mo ka ghau ira Ziu noto ngenengene ghini la ghau kaike ngongovala ba keha va zezea. 15Nga leghutau ta kaheri irahi ghau mu, suna ghidi ma ira ngengene, ira babaolo nia ia vetula ka ghau ira Ziu e ghua ma. Ghau o va totonuri ma ghu taghomu. Ara e deo ga kabai meha manefate ghu ka ghidira leghutau irahi.” 16Bozo kai kaveri tuna ka ia ringifota mala koti, neke ghua. 17Rauku laoi tuna Sositinisi, ia mane babatu ka ia suga mala varighara ira Ziu dike ghua ia varigharana noni, dike la botai ghu ka kenuna ia koti. Ghe Galio e deoi ma kaike birusuna va ghunaghuna ghinina ianimu.

Polo Ne Leghu Lao Anitioko Aianihi Siria

18Leghuna ianimu, Polo neke au laona tehi ravatani taremehadi ira noni ta va hohoghona aianihi Koriniti. Leghuna kaike birusuna fafata, manei neke vato ghini ta mala laona ka ia babarana Siria. Ianimu tuna ghe, neke kubaeri nga ira noni, neke ghaghahe taremehadi ghu Pirisila ghe Akuila laona ka ia malau leghaha mala sabarana vaka ta va kudo ghini Senikirea. Manei neke kusu senge va ziziloi ia pauna aianimu, mala va podolina neto va ghuduvi ia nona va bebereana lao ka God ta ghuana, ghe neke ghahe nga ka kaike vaka. Ianimu tuna ghe dike lao nga ka kaike ghaghahe soduai Polo, Pirisila nia Akuila e ghua ka vaka, vai laona fateo mo ka ia babarana Siria. 19Ka ia kusu la nodo kaidi ka ia malau leghaha Efesasi ka ia babarana Esia, Pirisila ghe Akuila dike zoghu mala la au aianimu. Nga Polo mu neke la haghele ka ia suga mala varighara ira Ziu, neke la nonogele taremehadi ghu ira noni Ziu. 20Maneri dike fangai ta au soduai laona aianimu, ghe manei deo geke lao hihingona ghu. 21Ghe ka ia fafata ghahena, manei neke naiungene kahe ghuana iahi, “Ara a ke la leghu meha mo ghatu, neto va malumuau la God,” neke ghua ghidi. Ianimu tuna ghe, neke ghahe kaini nga Efesasi ka kaike vaka.

22Ka ia la sabarana ka ia malau leghaha Sesaria, manei neke ghaghahe vona lao aianihi Zerusalemu la ungene vehaina ia kiloau aianimu, ghe neke hinae leghu laoni nga tuna ka ia malau leghaha Anitioko. 23Leghuna au birusuna lao aianihi Anitioko, Polo neke sipa aianimu neke ghaghahe vari kadoloai neke lao ghu ka ira malau ka ira giliodi kamoto ira babaradi Galesia nia Firizia e ghua, va gigimarira ira leghu noni ta va hohoghona nga ka ia Lod.

Ia Tatanigaina Riva Beana Ka Apolosi Aianihi Efesasi

24Ka fata ianimu, kaike mane Ziu babaolonana Apolosi, neke dolio ka ia malau leghaha Alekesanidiria ani Izipi, neke meha Efesasi. Apolosi mu kaike mane neke toraina vovoho tuturi va veveha nia neke toraina avoho fikifokori ira Kakangava Ta Maduana, e ghua. 25Maneri dike va kakahe ghini manei ghinina ia hangana ka ia Lod, neke toraina ridiridi ghini ghu manei tuturi ghini kavena ia hohoghona ghinina Zisas. Ghe seselebeana neke avohina manei mu, ia seselebeana neke vari va kakahe ghinio Zone lama. 26Manei neke tatanigai age ngengene va nadu ka giliodi ira suga mala varighara ira Ziu. Pirisila ghe Akuila di nomohi ghu manei, dike fangai ta mala hio laoina ka sugadio, nia la toraina va fafahaka vanani va veha laoni tuna ghinina ia Hangana ka God, dike ghua.

27Apolosi neke nakai hihingona ta mala ghahe kadolo laona ka vaka ka ia babarana Akaea, dike toka ghini ghu ira noni ta va hohoghona aianihi Efesasi va gigimaina nona ngangana ianimu. Kakangava lao tuna ka ira noni kiloau aianihi Akaea mala hio namahina manei, dike ghua. Ka ia la sabarana manei aianimu, leghahai toka neke la riva ghinina manei ka ira dike va hohoghonaro ka ia varisute ta meha kakato ka God. 28Ka ira nona vari tuufuai ta toraina gigima ka kenudi ira noni, manei neke paufuri ira Ziu, va fini ghidira ka ira Kakangava Ta Maduana ghinina Zisas lamu ghu mu ia Mesaea, ta ghuana.