Act 19 | KjiSC | STEP | Ka ia fafata auna Apolosi ka ia malau leghaha Koriniti ka ia babarana Akaea, Polo neke ghahe kodaka visi gilio mo ka giliodi ira voruhu, neke podolo rauru lao ghu la sabaranana ka ia malau leghaha Efesasi ka giliona ia babarana Esia, ka neke la dufurio manei keha noni ta va hohoghonara.

Acts 19

Ia Va Litona Ghaghahe Riva Beana Ka Polo

1 Ka ia fafata auna Apolosi ka ia malau leghaha Koriniti ka ia babarana Akaea, Polo neke ghahe kodaka visi gilio mo ka giliodi ira voruhu, neke podolo rauru lao ghu la sabaranana ka ia malau leghaha Efesasi ka giliona ia babarana Esia, ka neke la dufurio manei keha noni ta va hohoghonara. 2 “?Noke hioi mo ghau ia Tarunga Ta Maduana, ka ia meha va hohoghonamu?” neke ghua Polo notohorina.

“E deo, ghai e deo ghe gake nomohi ghemai ghu e au kaike Tarunga Ta Maduana, ta ghuana,” dike ghua.

3 “?Heve ghu mu kokolona seselebeana noke hioina ghau?” neke ghua notohona Polo.

“Ia seselebeana neke vari va kakahe ghinio Zone,” dike ghua ungene tughuina.

4 Kahe ghua tuna iahi neke ghua Polo, “Ia seselebeana ka Zone mu, e maladi heiri ira ta taghuru kairi ira sasakedi ta fihiki lao ghu ka God. Zone neke va kahe ghidi ira noni Isiraeli ta va hohoghonana ka Zisas, ia ta la meha ghatu leghuna taghonai, neke ghuao turi ghinina manei.”

5 Ka ia nomohidi iahi, maneri dike age hioi ia seselebeana ka ia babaolona ia Lod Zisas. 6 Ianimu tuna ghe neke va fara laori nga ira kamena Polo ka ira paudi, neke hinae meha ghu ia Tarunga Ta Maduana ka maneri, dike age tatanigai ngengene ghu ka ira keha ngengene nia turi ghidi kavera ira nonomoho ka God, e ghua. 7 E nona au ka tazoi palu mane varigharadira dike aura aianimu.

Polo Ne Tuturi beana aianihi Efesasi

8 Ka giliodi lito hihile, Polo neke la haghele ka ia suga mala varighara ira Ziu, neke toraina la tuturi beana va nadu ghu, va ohiohirira ka ira nona nonogele taremehadi maneri ghinina ia Ravutu ka God. 9 Ghe kehara ka maneri dike puina kaputu, dike pake ghedi ghu va hohoghonana, kahe va mukoina ia Hangana ka ia Lod ka kenudi ira noni. Ghahe kairi tuna hio taremehanana ira noni ta va hohoghona ge lao ghu ka ia sikolu ta taghoi kaike mane babaolonana Tiranasi, neke ghua. Leleghu ravata manei neke la nonogele taremehadi ira noni aianimu, 10 giliodi palu komuhu. Vununa ka ia riva manei, dike age nomohi haro ghu ia saorona ia Lod ira leghu noni Ziu nga nia ira taka Ziu ghu e ghua, dike auro ka ia babarana Esia.

11 God neke vanani Polo ia mana ta mala riva ghidira ira hahaima taka fani finiri ghu. 12 Keha nonira dike hiori ghe ira kodakadi poko teri neke va vonariro Polo dike va fara laori ghu ka ira noni ta fogara. Ka ia riva ghini iahi maneri, ira ta fogarari dike age veha ghedi nia ira tarunga ta muko tuna gedi age kave kairi ghu, dike ghua.

13 Keha noni Ziura dike ghahe liloho molamo dike tavusu kai kave tarunga ta muko ghu ka ira noni. Maneri dike va sisiva mala riva ia babaolona ia Lod Zisas mala tavusu kai kaverira ira tarunga ta muko ka heiri dike sukuriro tarunga ta muko. “Ka ia babaolona Zisas ia ta tuturi ghini beana Polo, ara a toraina ungene va gigima ghau ta kave mehana,” dike ghua ghu ta kaheina. 14 Nodi mamana ira vitu mane dike riva ghinino iahi mu Seva, ia ta kaike hiama pauna. 15 Ghe di va sisiva ghini ghu maneri ka ia mane ta sukui kaike tarunga ta muko, ia tarunga ta muko neke kahe ghua iahi, “Ara na avohi mo Zisas nia ghinina Polo, e ghua. ?Nga heiri mu ghau?” neke ghua ghidi. 16 Ianimu lama neto paraku laori ghu ia mane ta sukui tarunga ta muko. Vununa manei neke toraina age gigima fuluduri maneri haroharo, dike age pelo kave sosole ghu ira mane ka ia suga, taremehana bakora harodira.

17 Ia tuturina heve neke dufuno, magali ma neke ongaha ghu ka ira noni Ziu nia ka ira noni taka Ziu ghu e ghua, ka giliona ia malau leghaha Efesasi. Maneri haroharo dike age maughedi fuludu dike toraina heluhelu ghini ghu ia babaolona ia Lod Zisas. 18 Ira tehi noni dike va hohoghonaro, dike age kahe kaveri ka kenudi ira leghu noni nga heve dike riva ghidi va mukoro. 19 Kehara ka ira ta vovoho rivai basa, dike hio varighara ghidi meha ira nodi buka sasairadi basa, dike meha saligari ghu ka kenudi ira noni. Tabaradira ira buka mu neke fatana tabarana kaike mane ka 160 komuhu ^{▼▼19:19 Kaike Darakima mu kaike kunegele ta siliva, ta fatana kaike ravata tabara ka kaike noni. Ira varigharadi kunegele ta siliva mu gahafulu togha.} taho varighara ghidira. 20 Ia saorona ia Lod neke age ongaha varihau ghu nia kodolo va gigima laoni neke ghua, ka ghaghahena ta toraina mana iahi.

Ia Magara Leghaha Aianihi Efesasi

21 Leghudi leghu irahi nga, Polo ka ia babatu ia Tarunga Ta Maduana, neke kusu kabai kadolo laona nga ka ira babaradi Masedonia nia Akaea e ghua, ghe geke leghu lao nga Zerusalemu. Neke kahe ghua ghu iahi manei, “Leghuna lao ara Zerusalemu, ara a toraina ke lao haroni aianihi Romu!” neke ghua. 22 Manei neke kusu tuhu kenu laori aianihi Masedonia Timoti ghe Erasitasi, ira palu mane ka ira tehi nona noni mala toka ghini, nga taghonai mu neke au soduai birusuna laona ka ia babarana Esia.

23 Nia ka fafata ianimu, kaike leghahaina lelemeana ghinina ia Hangana ka ia Lod, neke auna Efesasi. 24 Kaike mane ta rivai leghutau ka siliva babaolonana Demitiriasi, neke rivai rekahadi suga totoghalena ia ringifota ta maduana ka ia god ghasena Atemisi neke torai hio vanadi rongo leghaha ghu ira ta riva. 25 Kudo varighara ghidi tuna ira mane ta riva nia ira keha noni ta riva varifata ka maneri neke ghua manei, neke va kahe ghidi ghu:

“Ghatomane, ghau to avohi ia bokaboka ka ghita ta mehana ka riva iahi. 26 Ghe ghau noto finini nia nomohi heve neke riva ghinina mane Polo iahi. Manei neke va hugahugari neke to fihiki va ghaheri ghu tehi nonini aiahi Efesasi nia to namo kamotona ka ia babarana Esia, e ghua. Ne kaheina manei mu, ira god ta riva ghidi ghita noni mu, eka toraina god ghu,” neke ghua. 27 “Mamaghuana ta la mehana mu, e age va mukoi ghatu ia babaolona ta veha noda leghutau mala rivai rongo ini, ghe kaike lelemeana haroni ta auna. Ira noni edi tatanigai nganai ta deona ge tongovona ghu ia sugana god ka ia leghahai god ghasena Atemisi. Ia varanga ka manei e age va hinaei, ghe Atemisi lamu ghu mu ia god ghasena ta va totoana ghini haroharo ira noni ka ia babarana kamoto Esia nia malau kamoto iahi peka, e ghua.”

28 Di nomohori ghu ngengene irahi ia varigharana noni, maneri dike age halari dike tataniga kudo ghua ghu iahi, “!Atemisi na Efesasi mu, e Varanga!” dike ghua. 29 Ia malau leghaha kamoto dike age zea lao meha. Ira noni dike rauku laori Gaeasi ghe Arisitakasi ira tanidi Masedonia dike ghahe taremehanao Polo, dike koroho laori ghu ka kaike malau mala varighara. 30 Polo neke kabai la podolo haroma ka kenudi ira noni, ghe ira noni ta va hohoghona deo gedi ke va malumi ghu. 31 Keha mane babatudira ka ia gaumanina ia babarana Esia dike baerero ka Polo, dike va ghahe lao nonomoho haro molamo ka manei, dike papadi ghu taka laona ghu ka galahena mala varighara ani peghuru.

32 Edi kudo ghini ghu kaike leghutau keha noni ari, ira keha edi ke kudo ghidi keha leghutaura mo. Ia kamotona varigharana noni dike to age zea ghedi lao meha; tehidira ka maneri dike to deo gedi ke avohi ghedi ghu heve mo dike lao ghinina aianimu. 33 Kehara ka ira noni Ziu, dike tiulu kenu laoi kaike mane babaolonana Alekesada, nia tatanigai va kahe ghini tuna ira ungene babatu ta mala kaheri manei, dike ghua. Alekesada neke kalovo ka ia kamena ta mala vanemohona maneri, e mala boka va fafahaka vanadi ghu keha leghutau ira noni, neke ghua. 34 Ghe di age avohi ghu maneri, neke noni Ziuna manei, maneri dike kudokudo ghua ma dike au ghu iahi giliona palu aoa: “!Atemisi na Efesasi mu, e Varanga!” dike ghua ma dike au ghu.

35 Va nonoghanana, ia mane ta kenu ka ia nonohe faghina ka malau leghaha ani, neke age boka mo va vanemoho hinaerira ia varigharana noni, neke kahe ghua ghu iahi, “Ghau noni mu Efesasi, ira leghu noni nga edi avohi malau leghaha iahi Efesasi lamu ta kopu ghinina ia sugana god Atemisi ia ta varanga, nia ia ghahipa beana ka manei, neke riufu hinae mehao ka kolangana fate, e ghua,” neke ghua ghidi. 36 “E deo hei ta boka tuufu ghinina ne sesebodi leghutau irahi ta ghuana, geala ghau o bule hinae ghu. Oka bobolo ghu riva ghinina kaike leghutau ghu. 37 Ghau no la hio mehari mane irahi aiahi, ghe maneri e deo heve ta sikoina ka ira sugana god nia e deo gedi ke kahe va mukoi ghu ia god ghasena ka ghita, e ghua. 38 Demitiriasi nia ira nona maneriva e ghua, dito kururi puhi ta mala hio vonarira la ka ira keha noni, ira manefate nia ia suga mala varifate ta boka lao ta la vari tuufuai ghu maneri aianimu, ta au iahi mo. 39 Nga neto au la keha leghutaurani ta kabai va puhiri ghau, edi boka ke va totonui mo ka kaike haedu varighara ka ia malau leghaha. 40 Ta mamaghuanana ka ghita mu, ia gavanana Romu edi boka age hio vona ghita mo ka vari sukutuai ghinina dake tataniga ghini ghita ia magara, ta ghuana. Deo tuna ghita gada boka age va fafahaki ghu iahi e ghua, vununa neke deo ia torai va fafahaka ghinina varighara iahi ka ghita.” 41 Leghuna kaheri leghutau irahi ia mane ta kenu ka ia nonohe faghina ka malau leghaha ani, manei neke va ghaheri ira varigharadi noni.