Act 2 | KjiSC | STEP | Vitu kolabana leghuna ia tetuleghu ka Zisas ka ia leme, ira noni ta va hohoghona dike au varighara ka kaike malau ka ia ravatana Pedekosi.

Acts 2

Ia Mehana Ia Tarunga Ta Maduana

1 Vitu kolabana leghuna ia tetuleghu ka Zisas ka ia leme, ira noni ta va hohoghona dike au varighara ka kaike malau ka ia ravatana Pedekosi. 2 Heve ba ne ghua ma, taghe kurumuna dafe ta toraina gigima, neto la ghua meha ghu ka kolangana fate, toraina kigilina ka ia giliona suga kamoto ka dike nohero maneri. 3 Ianimu tuna ghe dike finiri nga maneri taghe helupudi totoi dike ghuaro, ta fota ta la auna ghu ka ira sopai paudi ira noni aianimu. 4 Maneri haroharo dike auro aianimu, dike fouduri ia Tarunga Ta Maduana dike tatanigai ngengene ghu ka ira sopai kokolodi ngengene, leghuina ia babatu ka ia Tarunga Ta Maduana.

5 Ira Ziu dike va totoana ghinino God dike sipa mehadiro ka ira tehi soloso, dike au Zerusalemu ka fafata ianimu. 6 Di nomohi ghu ta kurumu ini, ia leghahaina varigharana noni dike la varighara meha kabai fini va fafahakina. Maneri dike puina age nodi fere nomohorira ira noni dike va hohoghonaro ngengenedira aianimu ka ira sopai nodi ngengene taghodi.

7 Ka ia nodi fere fuludu, dike notoho ghu maneri, “Noni ta ngengene ghua irahi mu, tanidi haroharo ka ia kobosona Galili ngama idi. 8 ?Ghe heve ne ghua ghe, da nomohori nga ghita ngengenedira maneri ka ira toraina ngengeneda taghodai? 9 Ghita mu tanida ka ira soloso Pafia, Madia, Elamu; kehara mu tanidi Mesopotamia, Zudia, Kapadosia, Ponitasi nia Esia, 10 nia tanidi Firizia, Pamufilia, Izipi, nia ka ira kobosodi Libia gheremena Saerini, e ghua. Kehara ka ghita ta tanida Romu ghu mu 11 noni Ziu nia eka noni Ziu ghu e ghua, ta leghuri ghatunaina ira ta va hohoghonari ira Ziu. Nia kehara ka ghita mu tanida ka ira soloso Kiriti nia Arabia, e ghua. !Ghe ghita haroharo da nomohori noni irahi ngengenedira ka ira noda ngengene taghodai, turi ghidira ira leghutau ta namanama neke riva ghidiro God!” 12 Maneri dike toraina age nodi fere fuludu nia zea fafahakadi dike ghua, dike vari nonotoho ghu, “?Heve mu fafahakanana iahi?” dike ghua.

13 Ghe kehara ka ia varigharana noni dike va sire ghidi kahe ghuana iahi, “Maneri mu di suna ketuhu gogosu ma,” dike ghua ghidi.

Pita Ne Tuturi Vanadi Beana Ira Varigharadi Noni Ka Ia Ravatana Pedekosi

14 Ianimu tuna ghe neke deke kenu lao nga Pita taremehadi ira keha tazoi kaike mane nonomoho, neke tatanigai ngengene va fafaa lao ghu ka ia varigharana noni. “O nonomoho va veha meha haroharo ghau ira taremehagu noni Ziu nia ghau leghu noni nga ta au Zerusalemu e ghua, a va kahe ghini ghau ghu fafahakanana iahi. 15 !Kehara ka ghau no kaheina mu, ghai na ketuhu gogosu no ghua, ghe e deo ge hohoghona ghu! Ira noni edika fani ketuhu gogosu ghu ka nakele leghahau ka ia fufugho. 16 Nga, heve ta finini iahi ghau ka fufugho iahi mu neke kusu kahei mo ia porofeti Zoeli sepaoni:
17 “‘Iahi mu ta age riva ghinina ara ghatu ka ira va nonoghadi ravata, ne ghua God:
ara a ghasolo vanadi lao ghatu ira noni haroharo ia nogu Tarunga.
Ira tuumu mane nia ira tuumu ghase, edi age tuturi ghini kave ghatu ia nogu nonomoho,
Ira mane foforu ka ghau edi age fini hahaima ghatu,
ira mane kusu ka ghau edi age fini epu baghunai ghatu.
18 Ka giliodi ravata iranimu, ara a age oranga kave vanadi ghatu ia nogu Tarunga
ka ira leghu nogu noniriva nga, mane ghe ghase ghu,
edi age tuturi ghini kave ghu ia nogu nonomoho.
19 Ara a riva ghidi ghatu ira hahaima ta fefereana ka kolangana fate
nia ira ghila ka malau iahi peka mala va podolina ia mana ka ara.
Ara a age va vuha magara, mala ira noni edi age fini busaka ghu, totoi ghu nia gufu ta tuta ghu, e ghua.
20 Vununa ka ia gufu, e age fifini nagoromona ghu ka ira noni ia taunu,
nia ia hihile tuna taghe busakana kuburu ge ghua ghu ka maneri, e ghua.
Leghutau iranimu edi age dufu ghatu, ghe ge dufu nga ia tongovona ravata ta namanama, ka ta la mehao ghatu ia Lod God, mala faterira ira noni haroharo.
21 Heiri haroharo ta kudo lao ka ia Lod mala hio va dolirira,
Ia Lod e age hio va doliri ghatu ka ia va kilasa ta maladi ira sasakedi.’ ^{▼▼2:21 Zoeli 2:28-32}

22 “!Ghau noni Isiraeli, o nonomoho meha ka iahi! God neto ke va podoli neke va meha vanamuna Zisas na Nazareti ka ira hahaima nia ira ghila ta namanama neke riva ghidiro manei ka ia mana neke vananio God mala riva ghidira manei. Ghau mu o avohi haroma ghu iahi taghomu. 23 God neto ke kusu vato ghini ta mala nai ageina Zisas ka ira kamemu ghau. Neke ghua mamu ghe noke va kahe ghidi nga ghau ira noni ta muko taka Ziu ghu, ta huhughi ia vetula ka God, ta atungina manei. Maneri dike riva ghini ianimu ka ia tupila ghini ka kaike hekefalahata. 24 Ghe God neke va tetu leghui Zisas ka ia leme, mala va kalasina ka ia vavahagalana leme, vununa deo geke boka ghu manei ta au leme fuludaina. 25 Sepao laoni Deveti ia Mane Ginitaukela neke kangava hinaeri heve neke kaheriro ia Mesaea:
“‘Ara na finini tudu ia Lod ta au taremehaguna.
Manei ne au ka gheremegu ini, e deo ghu ara ga age maughegu ghu.
26 !Ianimu la ghe, na toraina va manemane nga ka hihingogu ini,
nia ne foudui va ghazaghaza nga ngengenegu idi, e ghua!
Tinigu ini haro ge age au ghu ka rangerange, e ghua.
27 Vununa agho e deo go age nai kaiau ghu ka hoatadi ira ta leme,
ba, ta va malumina ia nou noniriva ta va hohoghona, ta boena ka ia beku.
28 Agho noto va fini ghinagu ia hangana ta vai lao ka ia doli,
nia o age vanagu ia va ghazaghaza ta namanama ka ia au taremehagu, e ghua.’ ^{▼▼2:28 Samu 16:8-11}

29 “!Ghau taremehagu, a toraina va kahe ghini ghau va veveha ghu ghini Deveti ia faada leghaha. Manei neke leme dike gilu ghini ghu, ghe ia lianga bekuna manei, ta au ini ngama ka ghita aiahi. 30 Ghe Deveti mu neke mane porofeti, neke avohi ghu ta naiungenena God ka ia va bebereana vananina taghonai Deveti, ghinina kaike ghu ka ia pagusu taghonai Deveti e ke meha mane ginitaukela ghatu, neke ghuao. 31 Deveti mu neke to kusu fini vai kenu laoi ghu heve ta age riva ghinina ghatu God, neke tuturi ghini ghu ia tetuleghuna ia Mesaea ka ia leme, kahe ghuana iahi,
“‘God mu e deo geke nai kaini ghu manei ka hoatadi ira ta leme,
ia tinina manei e deo geke boe ghu ka ia beku,’ neke ghua.

32 “God neke to va tetu leghui Zisas ka ia leme, dato ke finini haroharo ghu ghita mu neke torai ghuana ianimu. 33 Ghatunaina mu, manei ne nohe ghu ka ia kame mautuna God ia nona Mama fate, ka ia malau ta toraina heheluana nia mana, e ghua. Ia Mama neto vanani Zisas ia Tarunga Ta Maduana leghuina taghe neke naiungene ghinio taghona. Zisas neto ghasolo mehai ghu ka ghita Tarunga ianimu, taghe ta finini nia nomohi nia la ghau ghatunaina. 34 Vununa taghonai Deveti na neke deono ge vona ghu ka malauo God fate, neke kahe ghua harona iahi,
“‘Ia Lod neke kahei ka ia nogu Lod:
“Nohe aiahi ka kame mautugu ini, ka malau ta toraina heheluana nia mana iahi,
35 a vuhai nakairi ghu ara ira kana ka agho
ka pekadi tabalau nira, mala deke dadalaparira.” ’ ^{▼▼ 2:35 Samu 110:1}

36 “Ghau leghu noni nga Isiraeli mu, geala o toraina avoho va vehai ghu, Zisas noke tupila ghini iahi lamu ghau ka ia hekefalahata neke faetina God, ta mala meha Lod na nia Mesaea na.”

37 Di nomohori ghu ngengene irahi ira noni, dike toraina hoto va mukori ira hihingodi, dike kahe ghua ghu iahi ka Pita nia ira keha mane nonomoho, e ghua “?Tahimairo, heve ghu ngaini ta age riva ghinina tuna ghai?”

38 Pita neke ungene tughuri, “Ghau haroharo o toraina taghuru kairi ira sasakemu nia o seselebeana ka ia babaolona Zisas Kraes mala kai hazadira ira muko ka ghau, e ghua. Ianimu tuna ghe go hioi nga ghau mu ia Tarunga Ta Maduana, ia kaikadolo sipana God. 39 Naiungene iahi ka God ta mala hio va doli ghau ini mu, e mala mu ghau nia ira nomu rekaha nia heiri haroharo ta hauai lao e ghua, ira leghu noni ta kudo laori nga ka taghonai ia Lod ia noda God.”

40 Ianimu tuna ghe neke tuturi beana va sodu laoni nga Pita, kahe ghidi va gigimana ira dike nonomohoro, “!O hio va doli ghau taghomu ka ubalana noni tato ghahe va zea iahi!” 41 Ka ravata ianimu, e nona au ka lito togha noni dike va hohoghonara ka heve neke kaheriro Pita, dike age seselebeana ghu, ke holara lao haronani ka pukuna noni ta va hohoghona ianimu.

Doli Vari Hoataidi Ira Noni Ta Va Hohoghona

42 Maneri dike nonomoho nia leghuri ma dike au ghu, ira vari va kakahei ka ira mane nonomoho, dike kaike ngangana tudu ma ghu taremehadira ira keha noni ta va hohoghona ta vari tokai maneri. Nia maneri dike holara haro molamo ka ia Mahai Varighara Va Sasaighona ngana leghuna ia Lod, nia taremehana tarai e ghua. 43 Ira mane nonomoho dike rivai tehi hahaima nia va ghila, ka ia mana God, dike age maughini ghedi ghu God ira noni nia heluhelu ghini tuna dike ghua. 44 Ira noni haroharo ta va hohoghona, dike vari dudufu tudu ma, vari tufa ghidira ira vahina nodi leghutau ta taghori nga. 45 Maneri dike tatabara ghidi haro molamo ira nodi kava nia ira keha leghutau dike taghoriro e ghua, dike tufari ghu ira rongodi ka heiri ira ta malanga. 46 Leleghu ravata maneri edi la varighara ka ira galahedi ka giliona ia Sugana God nia edi mahai varighara ka ira sugadi, mahaina ka ira hihingo ta va manemane nia unuhu, 47 helahela ghini ma ta auna ghu God nia va ghazaghaza ghinina ia ngangana ta veha ka ira keha nonidi Zerusalemu, e ghua. Leleghu ravata, ia Lod neke hio va doliri ira noni ka ira sasake maneri, va tehi laoinani ia pukuna ka maneri.