Act 20 | KjiSC | STEP | Ka ia leghuna magara, Polo neke kudo varighara ghidi ira noni ta va hohoghona neke va gigimari ghu. Ianimu tuna ghe neke kubaeri nga neke lao ghu ka ia babarana Masedonia.

Acts 20

Polo Ne Lao Aianihi Masedonia Nia Akaea

1 Ka ia leghuna magara, Polo neke kudo varighara ghidi ira noni ta va hohoghona neke va gigimari ghu. Ianimu tuna ghe neke kubaeri nga neke lao ghu ka ia babarana Masedonia. 2 Ka ia ghahe vari kadoloai ta lao ghu Polo ka ira malau, manei neke va gigimari ira noni ta va hohoghona ka tehi nonomoho. Ianimu tuna ghe neke lao nga ka ia babarana Akaea ^{▼▼20:2 Ia babarana Akaea mu keha babaolonana ia babarana Girisi. Haeba faana fafatana ka Polo manei neke au ka ia malau leghaha Koriniti, ka dike nganaio ira tehi ta vari va kakahei ghini ia Baebolo neke auna Polo neke kangavina ghu ia leta vanadi laona ira noni ta va hohoghona dike auro ka ia malau leghaha Romu.}, 3 neke la au ghu lito hihile aianimu. Manei neke va tanai leghu ka ia babarana Siria ka vaka, ghe manei neke hadu kavei dike va puhinina kehara ka ira noni Ziu ta mala atungina manei, neke nai hihingona ghu ta mala ke leghuna giliona mo Masedonia.

Ia Va Nonoghana Ghahe Sigho Ka Polo Aianihi Toroasi

4 Mane dike ghahe leghuina manei mu, Sopata ia tuunamane Pirasi, ia tanina ka ia malau leghaha Berea, Arisitakasi ghe Sekanadasi ira tanidi ka ia malau leghaha Tesalonaeka, Gaeasi ia tanina ka ia malau leghaha Deribi, nia Tikikasi ghe Torofimasi ira palu manedi ka ia babarana Esia, nia Timoti e ghua. 5 Maneri mu dike kusu kenu age mo dike age afa ghini ghai ghu ka ia malau leghaha Toroasi. 6 Leghuna ia Mahai Varigharana Ia Bereti Ta Falao Kakato, ghai nake haghe ka vaka sipamaina Filipae aianihi Masedonia, nake la sabara ghu aianihi Toroasi leghudi gaha ravata. Kaike kolabana nake la auna ghai aianimu.

7 Ka ia saighonana Sarere, ghai nake varighara mala mahainina ia Mahai Varighara Va Sasaighona ngana leghuna ia Lod. Polo neke tuturi vanadi ira noni neke dufu ghu ka ia hoatai redu, vununa manei neke va tanai mala ghahe ka ia keha ravata. 8 Ka ia ringifota nake varigharao ghai fate, tehi zutani dike dolira. 9 Kaike rekaha mane foforu babaolona Iutikasi, neke nohe ka ia vuida neke puina age epu doka ka ia fafata tuturi ta au ghu Polo. Va nonoghana, manei neke age toraina epu melu kai, neke riufu hinae ghu peka ka kavao sipana ka ia va litona papalana suga fate. Ka ia la hio vonaidi maneri, manei neke to hoatai leme. 10 Ghe Polo neke hinae lao neke habara lao ghu ka fatena mane foforu ini la habe lilohina ka ira kamena. “Oka anga ghemu ghu,” neke ghua ghidi. “!Manei ne doli mo!” 11 Ianimu tuna ghe dike vona leghu lao haroharo nga fate ka sugana, dike la mahaini ghu ia Mahai Varighara Va Sasaighona ngana leghuna ia Lod. Leghuna turi soduai taremehadi ta pagasa ghu ia fugho, ghe neke ghahe kairi nga tuna manei. 12 Ianimu tuna ghe dike hio surai nga maneri ka sugao ia rekaha mane foforu neke to doli ghenao, dike toraina ke age va kakapoto ghu maneri.

Va Nonoghadi Ungene Veha Ka Polo Ka Ia Kiloau Aianihi Efesasi

13 Ghai mu nake kusu kenu lao mo ka ia vaka, nake tepetepe pizuli ghu ia visoko laona ka ia malau leghaha Asosi, ka ia malau ta mala ke la va haghei ghai Polo. Ghe neke vato ghua ghini nga iahi Polo mu, vununa manei neke mala kodaka ghutupelo lao ma aianihi Asosi. 14 Ne age dufu ghai ghu manei aianihi Asosi, ghai nake to va haghei ma nake lao ghu ka ia malau leghaha Mitilini. 15 Ka ia keha ravata, ghai nake sabara ka kaike malau gheremena ia ghizuna Kiosi. Ka ia ravata leghuna ianimu tuna, ga kadolo lao ghu ka ia ghizuna Samosi, nake ghua. Ka ia keha ravatani ghe, nake sabara nga ka ia malau leghaha Maelitasi. 16 Polo neke kabai ghini ta ghahe fuludina ia malau leghaha Efesasi, vununa manei deo geke kabai ghini ghu take la aurinani keha fafatara ka ia babarana Esia. Manei neke torai bobolo ta dufuna Zerusalemu ka ia ravatana Pedekosi ge boka la, neke ghua.

17 Ka ia au aianihi Maelitasi, Polo neke va ghahe lao nonomoho ka ira noni babatu ka ia kiloau aianihi Efesasi, neke fanga laori ghu mala ghaghahe hinae vai pelopekana, ta la dufuina ghu taghonai maneri. 18 Ka ia la sabaradi maneri, Polo neke kahe ghua iahi, “Ghau no avohi mo heve neke ghua auna ka ara ka ia kamotona fafata au taremehamu ara, tatanigai ka ia kusu ravata sabaragu ka ia babarana Esia. 19 Ara nake riva vanani ia Lod torai nai va hinae auna taugu taremehana nakele ghegu ka giliodi ira fafata ta toraina mamarutana dike konokono ghinaguro ira keha Ziu. 20 Ghe ara e deo ghe gake posi leghui ghu kaike leghutau ghu ka ira ta boka mala toka ghini ghau, ka ia tuturi vanamu beana nia ka ia va kakahe ghini ghau ka kenudi ira noni, ba, ka ira sopai sugamu. 21 Ara nake va kahe ghidi ira noni Ziu nia ira noni taka Ziu ghu e ghua, ta taghuru kairira ira sasakedi ta fihiki laona ghu ka God nia va hohoghona tuna ka ia noda Lod Zisas, ta ghuana.

22 “Ghatunaina tuna mu, ara na nomohi ia Tarunga Ta Maduana a lao ghu aianihi Zerusalemu, ghe ara e deo ga avohi ghegu ghu heve ta la dufuauna aianimu ghatu. 23 Taghe ta avohina ara mu, ka ira leghu malau leghaha ta ghaheri nga ara, ia Tarunga Ta Maduana neto ke va kahe ghinagu ta au afa ghinaguna kenugu mo ia pipiliga nia ia age ngovangovalau e ghua. 24 Ghe ia doli ka ara mu, e deo lighorona ma ka ara, nga e tongovona ta riva ghini va hokotona ara ia riva neke vanaguo ia Lod Zisas, ia ta mala va ongahi ara ia Nonomoho Ta Veha ghinina ia nona varisute ta va meha kakatoi God.

25 “Nia ghatunaina ara nato avohi, ta deona ke boka age fini leghuaunani ghau ira nake to tuturi vanamu beanao ghinina ia Ravutu ka God. 26 Ara a va kahe ghini ghau ghu ka torai ravata iahi, ta deona ge paluhagu ghu ara mu, to age ghahe va zea la heiri ka ghau, 27 vununa ara e deo gake suaraghi ghu va kahe ghini ghauna, ira vahina leghutau ta kabai ghidi nga God avohorira ghau.

28 “O kopu ghini ghau va veha ghu taghomu, nia ira noni ta va hohoghona haroharo taghe sipisipi ira ta ghua e ghua, neke nai vanamu ageo ia Tarunga Ta Maduana mala kopu ghidira ghau. Taghe ira ta kopunai sipisipi la o ghua, noto kopu ghini la ia kiloau ka God, neke tabario ka ia lemena ia tuuna taghonai. 29 Leghuna ghahe kai ghau ara, ara na avohi mo ta age haghele mehana ka hoatamu ghau, ira ta vari va kakahei ta sesebo, va sisiva ngovalarira ira nona noni God, taghe ta ghua ira wulufu ta lelemeana, ta rapati kaike totopa sipisipi. 30 Kehara ka ia pukuna taghomu, edi age sesebo ghatu mala batu ghidi kavera ira ta va hohoghona ta leghurira ghu taghodi. 31 !O au banabana ghu! Ke ngana laori ira lito komuhu nake deono ga nodo ghu ara va kakahe ghini ghauna ghau haroharo redu ravata nia nakele ghini ghauna hibagu idi, e ghua.

32 “Ghatunaina ara a nai ghau lao ghu ka ia kopu God nia ka ia saorona ia nona varisute ta va meha kakatoi manei e ghua. Saoro iranimu edi boka vanamu ia gigima nia edi age vanamu ghatu ira va beana ta mala hio kadolori, ta kurui God maladi ira nona noni haroharo ta maduana.

33 “Ara e deo gake kulukulu ghidi ghu ira nodi rongo, ba poko ta veveha ira keha noni. 34 Ghau to avohi, nake riva tuduna ara ka kamegu idi, mala hiorira ira vahina leghutau nga ta malagu taghogu nia ta maladi ira noni dike va nunumauro, e ghua. 35 Ara nake va fini ghini ghau ghu ka ira vahina leghutau nake riva ghidiro nga, ghinina ia ghaghahena riva va gigima mala toka ghidira ghau ira noni ta paeke. Ke ngana laori ira ngengene ka ia noda Lod Zisas neke kahe ghuao iahi, ‘Ka ia tutufa mo ta faana mu ia va manemane fuludina ia va manemane ta meha ka ia hihio.’”

36 Leghuna nogha ngengenena Polo, manei neke torongaghituturu hinae taremehadi maneri haroharo, ghe neke tarai nga. 37 Maneri haroharo dike age nakele ghedi ka ia fafata abaꞌabai nia angohi dike ghuao maneri. 38 Taghe dike age suri muko hihingo ghinina maneri mu, ghidi ira ngengene ka manei neke kahe ghuao iahi, “Ghau e deo boka ke age fini leghuaunani ghatu,” ia ta ghua ka manei. Ianimu tuna ghe dike va nunumai nga, dike lao ghu ka ia vaka.