Act 21 | KjiSC | STEP | Leghuna kubaeri ghai ira mane babatudi Efesasi, ghai nake ghahe lotoro lao ka ia ghizuna Kosi ka vaka tepe. Ka ia keha ravata tuna, gake lao ghu ka ia ghizuna Rodisi, ghe nake lao nga tuna ka ia malau leghaha Patara.

Acts 21

Polo Ne Lao Zerusalemu

1 Leghuna kubaeri ghai ira mane babatudi Efesasi, ghai nake ghahe lotoro lao ka ia ghizuna Kosi ka vaka tepe. Ka ia keha ravata tuna, gake lao ghu ka ia ghizuna Rodisi, ghe nake lao nga tuna ka ia malau leghaha Patara. 2 Aianimu nake la dufuina ghai kaike vaka neke mala ghahe kadolo laono ka ia kobosona Fonisia, ka giliona ia babarana Siria. Ianimu tuna ghe nake haghe lao nga ka vakao ga tepetepe ghahe ghu, nake ghua. 3 Ka ia nake to fini laoi ia ghizuna Saeparasi, ghai nake ghahe lao visi pelopekana mo manei, nake lao ghu ka ia babarana Siria. La nodo kai tuna ka ia malau leghaha Taea ka neke mala la va higava kakono vaka ini, nake ghua. 4 Ghai nake parago lao nake la dufuri ghu ira noni ta va hohoghona aianimu, nake la au tadi ghu kaike kolabana. Ka ia mana ia Tarunga Ta Maduana, ira noni kiloau ka malau ianimu dike va kahe ghini Polo taka laona ghu Zerusalemu. 5 Ghe ne age hokoto ghu ia fafata ka ghai, nake to ghahe ma ghai pagusu laoinani ia ghaghahe ta mala la dufu Zerusalemu. Maneri haroharo taremehadi ira ghaseborodi nia ira nodi rekaha e ghua, dike va nunuma ghaina ka ia kave kainimai ia malau leghaha, mala rauru laona ka garangao. Ghai nake la torongaghituturu hinae aianimu nake tarai ghu. 6 Ianimu tuna ghe nake kubaeri nga, nake la haghe ghu ka ia vaka, nia ke leghu ghedi tuna maneri ka sugadiro, dike ghua.

7 Sipamaina Taea, ghai nake tepetepe lao ka ia malau leghaha Tolemeisi, nake la ungene vehari ghu ira noni ta va hohoghona aianimu, la au taremehadira kaike ravata. 8 Ia keha ravata, ghai nake la sabara ka ia malau leghaha Sesaria, nake la au ghu ka ia suga Filipi, ia mane ta tuturi beana. Manei mu kaike ghu ka ira vitu mane dike faete kaveriro mala toka ghidira ira mane nonomoho ka ia tufa ghano. 9 Mane iahi mu e aui rodana tuunaghase taka varihio ghu, ta ghase porofeti.

10 Ka ira keha ravata nake aurio ghai aianimu, kaike mane porofeti babaolona Agabasi, neke sipana ka ia babarana Zudia neke ghaghahe hinae ghu meha sabaranana aiahi Sesaria. 11 Ka ia meha sigho ghini ghai, manei neke hioi ia lilihiti ka Polo neke piligari ghu ira ghahena nia ira kamena taghonai, neke kahe ghua ghu iahi, “Ia Tarunga Ta Maduana ne kaheina, ‘Ira ta babatu ka ira Ziu aianihi Zerusalemu edi age piliga ghua ghini iahi ghatu ia mane ta kutamana lilihiti iahi, mala vanadi laona ira noni taka Ziu ghu.’” 12 Na nomohi ghu iahi, ghai nake leghuio Polo nia ira noni ta va hohoghona ka malau ianimu e ghua, nake papadi manei taka laona ghu Zerusalemu.

13 Ghe manei neke ungene tughu ghai, “?Ne heve ghe no nakele nga ghau, no va muko hihingoau ghu ara? Ara mu e deo ma ga va tana ghini ghu ta haghelina ia pipiliga, nga na lao hihingogu haroma ta leme vananina ia Lod Zisas aianihi Zerusalemu.”

14 Ne age avoavohoana ghu ta deona manei boka ke holarina ia nganganana, nato va leghu ghini lao ma, nato kahe ghua ghu iahi, “Ia nona lao nanafa ia Lod, e age hokoto.”

15 Leghudi ravata irahi, ghai nake va tana nake tataniga vona lao ghu Zerusalemu. 16 Keha noni ta va hohoghona tanidi Sesaria dike va nunuma ghaira, dike hio lao ghai ghu ka ia sugana Manasoni ta mala la au ghai. Mane iahi mu tanina Saeparasi, kaike ghu ka ira noni dike kusu leghuio Zisas ka ia tatanigaina.

Polo Ne Sigho Ghini Zemesi

17 Ka ia la sabaramai Zerusalemu, ira noni ta va hohoghona aianimu, dike toraina hio namaha ghai. 18 Ka ia keha ravata, Polo nia ghai e ghua, nake la finini Zemesi. Ira leghu mane babatu nga ka ia kiloau dike au haroma aianimu. 19 Polo neke ungene vehari nia neke tuturi vanadi ira vahina leghutau nga neke riva ghidiro God ka ira noni taka Ziu ghu, ka ia riva beana neke riva ghidiro Polo.

20 Di nomohini ghu iahi, maneri dike helahela ghini God. Ianimu tuna ghe dike kahe ghua nga iahi ka Polo, “Tahimaio, agho to avohi niha ngavulu togha noni Ziu dike to va hohoghonara, dike toraina ngana tahuina ghu ia vetula ka Mosese. 21 Ghe dike to la va kahe ghidira maneri ghinighona agho mu, agho no va kakahe ghidi leghu noni Ziu ta au nga ka giliodi ira malau taka Ziu ghu, ta mala taghuru kainina ia vetula ka Mosese, dike ghua. Dike kaheina ghu maneri mu, agho no va kahe ghidi ira noni, mala edika papahe va ghilaghilari la ghu ira nodi rekaha, ba edika leghuri la ghu ira dolidi meha ira noni Ziu, dike ghua. 22 Maneri edi toraina age nomohi mamu ghatu, noto sabara agho aiahi, ta ghuana. ?Geala heve ghu ngaini tada riva ghinina tuna ghita?

23 “E ghua ghu iahi na kabai ghinighona ghai ta riva ghinina agho. Keha rodana mane dike va bebereana ka God ta aura aiahi. 24 Agho o leghu laori maneri rodanau ka ia Sugana God, o la holara taremehadi ghu ka ira riva beana mala va kakalasa. La tabara vanadi noni ta vari koto tuna agho, mala sengerira maneri paudi ari, e ghua. Ianimu tuna ghe, gedi age avohi nga ira noni Ziu ta va hohoghona haroharo mu, ta sesebodira leghu turi ta ghinigho irahi nga agho, nia agho taghou no leghui molamo ia vetula ka Mosese, ta ghuana, e ghua.

25 “Nga ghidira ira noni ta va hohoghona taka Ziu ghu mu, ghai nato ke va ghahe vanadi lao kaike leta, va kahe ghidi laona ia ngangana nake to nakainio ghai. Nga mala age auna ia bule ka vari hoataida ghita haroharo mu, e veha ka maneri taka riva ghidira ghu leghutau irahi. Maneri geala edika mahairi ghu ira ghano dike veala ghidi laoro ira noni ka ira nguzunguzu, ba edika mahai busaka ghu, ba edika mahairi ghu ira vilahidi ira va vuha ta kumuhu dodolidi nia edi toraina au va takale ka ia zave peghuruna ia varihio, e ghua.”

Polo Di Sakomi

26 Ia keha ravata, Polo neke hiori ira rodana mane, neke la riva ghidi ghu ira riva beana mala va kakalasa taremehadira maneri. Ianimu tuna ghe neke la haghele nga manei ka ia Sugana God, neke la kahe kavei ghu ia fafata ta age hokoto ghatu ira ravata mala va kakalasa, ghe ge age sopai riva vanadi nga tuna ira veala mala kudoveha ka maneri rodanau.

27 Ne age namo hokoto ghu ia kolabana mala va kakalasa, keha noni Ziura ka ia babarana Esia dike fininio Polo ka giliona ia Sugana God, dike va hugahugai ia leghahai varigharana noni, dike sakomi ghu Polo. 28 “!Ghau mane Isiraeli, o toka ghini ghai!” dike ghua kudodira. “Iahi lamu ia mane ta va kakahe ghidi ira leghu noni nga hae ghe hae ghu, kahe va mukorira ira noni ka ghita, ia vetula ka Mosese, nia ia Sugana God, e ghua. Kehanani e ghua mu, manei neto hio mehari ira noni taka Ziu ghu ka ia Sugana God, va sotaina malau ta maduana iahi.” 29 (Dike kahe ghua nga maneri mu, vununa maneri dike finini Torofimasi ia tanina Efesasi ta au taremehanana Polo ka malau leghaha ani. Nganganadira maneri mu, Polo neke to hio laoi haro manei ka ia Sugana God, dike ghua.)

30 Ia kamotona noni ka malau leghaha ani, dike ngingiri halarira, dike purudu varighara lao ghu la raukina Polo ta koroho kaveina ghu ka ia Sugana God nia magali ma tuna ira mane magara ta kopu gedito bakisiri ghu ira makatanana ia Sugana God, dike ghua. 31 Di ghorevaha ghini ghu maneri mala atungina manei, neto la dufu ghu ka ia mane pauna kaike pukuna punugarana Romu, ia nonomohona dito tatanigai magara ira leghu noni nga Zerusalemu, ia ta ghua. 32 Selu laoi ma ianimu, neke to kudo laori ghu manei kehara ka ira manefaadi ira nona pukudi mane magara nia ira keha mane magara e ghua, dike purudu hinae lao ghu ka ia varigharana noni. Ka ia fini laoi ira noni ia mane pauna ia punugarana Romu nia ira nona mane magara e ghua, ira noni dike nodo botaina Polo. 33 Ia mane pauna ia punugara neke la sakomo hioi Polo, neke va kahe ghidi ghu ira nona mane magara ta piligaina ka palu seni. Ianimu tuna ghe neke notohori nga manei ira noni, kabai avohina hei mo mu mane iahi ta ghuana nia heve mo neke riva ghini va zeana, e ghua. 34 Ia keha pelona noni edi kudo ghini ghu kaike leghutau, ira keha edi ke kudo ghini keha leghutauna mo, dike ghua. Ghe vununa ira noni dike puina age ngilingoele fuludu, neke deo ghu boka hadu kaveina manei heve mo torai hohoghonana. Va kahe ghidi tuna manei ira nona mane ta hio laoina Polo ka ia malaudi ia punugara neke ghua. 35 Di la dufu ghu maneri ka ira papala mala dedeke, ira mane magara dike hure vonai Polo ka ira rafadi, mala bara kaputina manei ka ia varigharana noni dike puina halari fuluduro. 36 Ia varigharana noni dike ghahe leleghuriro leghudi mo dike kudokudo ghua iahi, “Atungi! Atungi!” dike ghua.

37 Ka ia tato namo hio hagheli Polo maneri ka ia malaudi ia punugara, Polo neke fangai ia mane pauna ia punugara, “A boka kahe ageri mo ara ka agho keha leghutau?” neke ghua ghini.

“Agho o vovoho ngengene Giriki mo?” neke ghua notohonana ia mane pauna punugara. 38 “Nganganaguna ara mu, agho mu ia mane Izipi neke tataniga ghinio magarina ia gaumani ira keha komuhu tato fuludu lao, neke pelo taremehadi laono ghu ira rodana togha noni ta vari atungu ka ia malau koroghana ta karango, na ghua.”

39 “Deo,” ne ghua ungene tughuna Polo. “Ara mu kaike Ziu nake doli meha ka ia malau leghaha Tarasasi ia ta tongovona ka ia babarana Silisia. O va malumu au ko ta tuturi vanadira ara noni irahi.” 40 Ia mane pauna ia punugara ne va malumi mo Polo ta boka ngengenena manei. Tetu vona tuna ka ira papala mala dedeke ge kalovo lao ghu va vanemohorira ira noni, neke ghua Polo. Di age vanemoho ghu ira noni, Polo neke tuturi vanadi ka ngengene Erameiki.