Act 22 | KjiSC | STEP | “Ghau taremehagu noni Ziu,” neke ghua Polo. “!Nonomoho mehana ka ara, a va fafahaka vanamu ghu, heve neke dufuno!” neke ghua ghidi.

Acts 22

Polo Ne Tetu Kaputi Taghonai Ka Kenuna Ia Varigharana Noni Ta Ngaziri

1 “Ghau taremehagu noni Ziu,” neke ghua Polo. “!Nonomoho mehana ka ara, a va fafahaka vanamu ghu, heve neke dufuno!” neke ghua ghidi. 2 Di nomohi ghu ta ngengenena manei ka ia nodi ngengene Erameiki taghodi, maneri dike to age vanemoho laoni.

Ianimu tuna ghe neke kahe ghua nga iahi Polo, 3 “Ara mu mane Ziu, nake doli meha ghu ka ia malau leghaha Tarasasi ka ia babarana Silisia, nake faa vona ghu aiahi Zerusalemu. Ara nake kaike mane sikolu ka pekana Gamalieli, nake toraina leghu va vehai ghu ia vetula nia ira puhi ka ira noni Ziu, e ghua. Ara mu taghe ghau la ghatunaina nake ghua molamo, nake toraina gigima ghu riva vananina God ka ira vahina leghutau nake riva ghidiro nga. 4 Nganganaguna ara mu noni irahi dike vari va kakahe ghidi ira leghutau ta haza ka ia vetula ghita ghinina God nake ghua, ghe nake ngovangovalari nga ira noni dike leghuio ia Hangana ka ia Lod mala atungurira, nake sakomo kai hagheleri ghu ira mane nia fotati ka pipiliga. 5 Ia hiama pauna nia ia kamotona nonohe faghina ka ira Ziu e ghua, edi boka va kahe ghini ghau mo ta hohoghonana mu iahi. Ara nake hio leta haro ghe ka maneri, mala vanadi laora ira taremehada noni Ziu ka ia malau leghaha Damasikasi, mala sakomorira ira noni ta leghui Zisas aianimu, ta piliga hio meharira ghu ka seni aiahi Zerusalemu mala meha va kilasarira.

6 “Neke nona au ka ia hoatai ravata ka ia meha namo ara Damasikasi, kaike fegala ta pelara sipa mehana ka kolangana fate, heve ba ne ghua ma neke pelara lilohoau ghu. 7 Riufu hinae tuna ara ka kavao, ga nomohi ghu kaike leo kahe ghua mehana iahi ka ara, neke ghua, ‘?Solo, Solo, heve no ghua ghe no ngovangovalau nga ara?’ neke ghua.

8 “‘?Hei mu agho Lod?’ nake ghua ungene tughuna ara.

“‘Ara mu Zisas na Nazareti ta ngovangovalau nia agho’ neke ghua meha ka ara. 9 Ira noni dike ghahe taremehaguro ara dike finini mo ia fegala, ghe maneri e deo gedi ke va fafahaki ghu ia leona manei neke ngengene mehao ka ara.

10 “‘?Heve ghu mu ta age riva ghinina ara Lod?’ nake ghua notohoguna ara.

“‘O tetu vona, o la haghele ghu Damasikasi,’ neke ghua ia Lod. ‘Aianimu ghe gedi age va kahe ghinigho nga ira leghu ta mala riva ghidi nga agho.’

11 “Ara nake to age melu fifini ka ia fegala ta pelara, dike posi au ghu ka kamegu ini ira dike leghuauro, batu ghinagu laona Damasikasi.

12 “Kaike mane babaolonana Ananaeasi, neke auna aianimu. Manei mu kaike mane neke namaha ghini God, neke leghu va vehai ghu ia vetula ka Mosese, nia dike toraina va vonavonai ira leghu noni Ziu nga ta au Damasikasi, e ghua. 13 Manei neke meha tetu ka gheremegu ini ara neke kahe ghua ghu iahi, ‘!Tahiguo Solo, ghatunaina agho o boka toraina ke fifini leghu mo tuna!’ neke ghua ghinagu. Selu laoi ma ianimu, nake to age boka finini ghu ara manei.

14 “Ianimu tuna ghe neke va kahe ghinagu nga manei, ‘Ia God ka ira faada meha neke faetighona agho ta mala avohina ia nona lao nanafa, nia ta mala fininina Zisas Kraes ia nona Maneriva Ta Lotoro, nia ta mala nomohina ia ngengenena ka ia torai leona taghonai, e ghua. 15 Agho lamu mala tuturi ghini kavena manei ka ira noni haroharo hae ghe hae ghu, ghidi heve noto ke finirira nia nomohorira, e ghua. 16 ?Heve ghu no afa ghinina agho? !Tihi kairi ira sasakeu ka ia tarai lao ka ia Lod nia tetu vona o hioi ghu ia seselebeana, e ghua!’

17 “Kaike ravata, leghuna ia leghu laogu ara Zerusalemu, ara nake tarai ka giliona ia Sugana God, nake finini ghu kaike hahaimana 18 ia Lod, neke kahe ghuao iahi ka ara, ‘Magali o ghahe kaini ghu Zerusalemu, vununa ira noni aiahi e deo gedi ke va hohoghonaigho ghu ka heve noto ke tuturi vanadiro agho ghinaguna ara,’ neke ghua.

19 “Ara e deo gake avohi ghu heve dike ghua ira Ziu ghe, dike deo nga va hohoghonauna ara, vununa nganganaguna ara mu noni irahi dike vari va kakahe ghidi ira leghutau ta haza ka ia vetula ghita ghinina God nake ghua, nake kahe ghua ghu iahi ara, ‘Ghe Lod, maneri edi toraina avoho va vehai nake laona ara ka ira tehi suga mala varighara ira Ziu la sakomorira, nia botarira ira ta va hohoghona ka agho e ghua,’ nake ghua ungene tughuina ara. 20 ‘Nia ka ia fafata atungi maneri Sitivini ia neke tuturi ghinigho kaveno agho, ara nake tetu haroma aianimu, veha vanagu harona ta atungina manei maneri. Ara nake kopuna ghidi ghe ira poko sodu ka ira dike atungio manei.’

21 “Ghe ia Lod neke kahe ghuani iahi ka ara, ‘!Ghahe kaini Zerusalemu, vununa ara a va ghahe laoigho ghatu varihauni ka ira noni taka Ziu ghu, mala la tuturi ghinaguna ara!’”

22 Ia varigharana noni dike nonomoho ma ka Polo neke vuhai kahei ghu manei ia ngengene e ke mala lao ka ira noni taka Ziu ghu ta ghua iahi. Noni irahi mu ira ta mumukori ira noni Ziu. Tatanigai kudokudo ghua tuna iahi dike ghua maneri, “!Hio ghahei mane iahi! !Atungi! !Manei e deo ge fata ghu ta mala dolina!” 23 Kudo va fafaa vona tuna gedi hio kairi ghu ira nodi poko sodu purua ghidi lao mehara, ghe dike kai vona kofelena kava nga tuna fate, dike ghua.

Polo Ne Va Podoli Ta Holarana Taghonai Ka Ia Ravutuna Romu

24 Ia mane pauna ia punugara neke kahe ghidi va gigima ira nona mane ta hio laoina Polo gilio ka ia malauna punugara, mala la notohina nia puruasiminina e ghua, e vuhai kahe va podoli ghu Polo heve dike ghua ira Ziu ghe dike kudo ghua lao nga iahi ka manei, ta ghuana. 25 Ghe dike piligai ngama maneri manei mala puruasiminina, neke kahe ghua lao ghu iahi Polo ka kaike manefaana kaike ghobi mane magara ka giliona kaike pukuna punugarana Romu, neke tetuo aianimu, “?E totonu mo ka ia vetula mu ta mala botaina ghau kaike noni ta holara ka ia Ravutuna Romu, ia ta deo nga geke fatei ghu, ta va kahe ghini ghu ne zea manei ta ghuana?”

26 Ne nomohi ghu iahi ia manefaadi ira mane magara, manei neke lao ka ia mane pauna ia punugara, neke la notohi ghu, “?Heve mu no riva ghinina agho? !Mane iahi mu kaike noni neke holara ka ia Ravutuna Romu!”

27 Lao tuna ka Polo ge la notohi ghu neke ghua ia mane pauna ia punugara. “?O va kahe ghinagu ko, agho mu kaike noni ta holara ka ia Ravutuna Romu?”

“Uve,” neke ghua ungene tughuna Polo.

28 Kahe ghua tuna iahi neke ghua ia mane pauna punugara, “Ara mu nake toraina kai va faa rongo mala meha holarana ka ia Ravutuna Romu,” neke ghua ghini.

“Ghe ara mu nake doli mala holara ka ia Ravutuna Romu,” neke ghua Polo. ^{▼▼22:28 Ia noni mu e boka meha holara mo ka ia Ravutuna Romu ka lito ghaghahena. Ia noni e boka tabara ghini rongo mo, ba, e vanani taghe kaike tabara e ghua, ta malana keha leghahai riva ka ia Ravutuna Romu, ba, e doli meha mala holara ka ia Ravutuna Romu. Ia doli meha mala holara ka ia Ravutuna Romu, ne vanani Polo kaike papala ta toraina vona fuludu laoi ia mane pauna ia punugara neke tabarao mala holarana ka ia Ravutu Romu.}

29 Magali ma dike to nodo ghu ira mane dike va tanao notohina nia puruasiminina Polo. Ia mane pauna ia punugara neke age maughena haroma taghonai, vununa manei neke buhuti ia vetulana Romu, ka ia piligai ka seni Polo, ia neke holarao ka ia Ravutuna Romu.

Polo Ka Kenuna Ia Nonohe Faghina Ira Ziu

30 Ia keha ravata, ia mane pauna ia punugara neke toraina kabai hadu kavei heve mo dike hala ghinina ka Polo ira noni Ziu. Kudori tuna ira leghu hiama ta kenu nga nia ia kamotona nonohe faghina ka ira Ziu mala posinina kaike haedu, neke ghua. Ianimu tuna ghe, neke hio kavei nga Polo ka ia pipiliga ia mane pauna ia punugara, neke va tetui ghu ka kenudiro taghodi.