Act 23 | KjiSC | STEP | Polo neke mato dodoghohoto laori ira ta au ka ia nonohe faghina ira Ziu, ghe neke kahe ghua nga iahi, “!Ghau tahigumanedi Isiraeli; ka ia au riva ara ka kenuna God ta dufu ghu ka ravata iahi, ia ngangana ka ara mu toraina kalasa va veha ma!”

Acts 23

1 Polo neke mato dodoghohoto laori ira ta au ka ia nonohe faghina ira Ziu, ghe neke kahe ghua nga iahi, “!Ghau tahigumanedi Isiraeli; ka ia au riva ara ka kenuna God ta dufu ghu ka ravata iahi, ia ngangana ka ara mu toraina kalasa va veha ma!”

2 Ananaeasi ia hiama pauna, ka ia nomohi ianimu, neke kahe ghidi va gigima ira noni dike tetu namo laoro ka Polo ta mala tapalina ia paetena manei. 3 Ghe Polo neke kahe ghua iahi ka manei, “!God e age tapaligho haro ghatu, agho ta tatangana kobiri! Agho no nohe aiamuhu no fateau ghu ara ka ia vetula, ghe agho taghou go huhughi haro ghu ia vetula no ghua, ka ia ungene va gigimari maneri ta mala tapalauna ara.”

4 Ira dike tetu namo laoro ka Polo dike kahe ghua iahi ka manei, “!Agho no ungene va mukoi ia nona hiama pauna God!” dike ghua.

5 “Ghau tahigumanedi Isiraeli, ara e deo gake avohi ghu, manei mu ia hiama pauna, ta ghuana,” neke ghua ungene tughurina Polo. “Gake avohi la ara ianimu, geala ara toraina deo gake kahe ghua ghu ianimu, vununa ta kaheina ka ira Kakangava Ta Maduana mu, ‘Agho oka ungene va mukoi ghu hei ia ta kopu ghidi ira noni ka agho,’ ^{▼▼23:5 Kave 22:28} e ghua.”

6 Ne avohi ghu Polo ta tanidira ka ia butubutu Sadiusi kehara nia kehara ka ia butubutu Farisi ta ghuana, ta aura ka ia giliona nonohe faghina ira Ziu, manei neke kudokudo ghua lao iahi, “!Ghau tahigumanedi Isiraeli, ara mu kaike Farisi, nia kaike tuunamane kaike Farisi e ghua! !Di hioau nga maneri ka vari sukutuai mu, vununa ara na va hohoghonai take age doli leghuna ira noni ka ia leme!”

7 Kaheri ne ghua ghu Polo ngengene irahi, dike to age vari tuufuai ma ira Farisi nia ira Sadiusi e ghua, dike age fota ghu ia nonohe faghina ka ira Ziu. 8 Ira Sadiusi mu edika va hohoghonai ghu ia tetuleghu ka ia leme, ba ta auna ira engizeli, ba tarunga; nga ira Farisi mu edi va hohoghonari haroharo irahi. 9 Age au tuna ira kudokudo va fafaa ka fafata iahi neke ghua. Kehara ka ira ta vari va kakahe ghini ia vetula, ta au ka ia pukuna ira Farisi, dike tetu vona dike toraina gigima ghini ghu ta lotorona mo Polo. “Ghai e deo heve leghutau ta zea na hadu kaveina ka mane iahi!” dike ghua kudodira. “Haeba kaike tarunga, ba kaike engizeli, neke ngengenina manei.” 10 Ia vari tuufuai neke puina age muko laoni, neke age maughena ghu ia mane pauna ia punugara age koroho va geesina maneri Polo, neke kahe ghidi va gigima ghu ira nona mane magara ta mala la hio ghaheina ka maneri ta hio laoina ghu ka ia malaudi ira mane magara.

11 Ka redu ianimu, ia Lod neke la tetu ka gheremena Polo neke kahe ghua ghu iahi, “!Hioi hetauna Polo! Taghe noke va kahe ghidiro la agho ira noni aiahi Zerusalemu ghinaguna ara o ghua, o tuturi beana ghini haro ghu agho ia Nonomoho Ta Veha ka ia malau leghaha Romu.”

Ia Va Puhipuhi Mala Atungi Polo

12 Ka ia keha fufugho, keha noni Ziura, dike varighara dike va bebereana ghu ta mala deona gedi mahai ghu, ba ketuhu ghu, edi vuhai atungi ghu Polo. 13 E fuludu laoi rodana ngavulu mane dike riva ghini varigharana va puhipuhi iahi. 14 Ianimu tuna ghe dike lao nga ka ira hiama ta kenu nia ka ira keha noni Ziu ta babatu e ghua, dike la kahe ghua ghu iahi, “Ghai nake to va bebereana ta mala deona ga mala mahai ghu nia ketuhu ghu e ghua, a vuhai age atungi ghu Polo. 15 E ghua ghu iahi na kabai ghinina ghai: Ghau nia ia nonohe faghina ka ira Ziu e ghua, o va ghahe laoi kaike nonomoho ka ia mane pauna ia punugara, mala ke hio kave leghu mehaina Polo ka ghau, taghe ta ghua nia ta kabai ke notoho va veha laoinani ghinina ia puhi ka manei, o ghua. Ka ia ta ghahe ta la meha ghu lama manei, ato la atungi ghu ghai ka hanganani, ka ia fafata deo nga ge dufu ghu manei aiahi,” dike la ghua.

16 Ghe kaike mane hoghana Polo neke nomohi ia va puhipuhi ka maneri, neke lao ghu manei ka ia malaudi ira mane magara, la turi vananina Polo. 17 Kudoi tuna kaike ghu ka ira manefaadi ira mane magara, ge va kahe ghini ghu, neke ghua Polo. “Hio laoi mane foforu iahi ka ia mane pauna ia punugara; manei ne kurui keha tongovodi turi mala va kahe ghinina manei,” neke ghua ghini.

18 Ia manefaadi ira mane magara, neke hio laoi manei ka ia mane pauna ia punugara, neke la kahe ghua ghu iahi, “Polo, ia mane pipiliga, neke kudoau ara mala hio mehaina mane foforu iahi ka agho, vununa manei ne kurui keha leghutau ta mala va kahe ghinighona agho,” neke ghua ghini.

19 Ia mane pauna ia punugara ne posini ia kamena neke hio nenemai ghu, ghe neke la notohi nga, “?Heve mu no kabai va kahe ghinaguna ara agho?” neke ghua ghini.

20 Kahe ghua tuna iahi neke ghua ia mane hoghana Polo, “Keha noni Ziura edi meha fangaigho agho fugho, mala hio laoina Polo ka kenuna ia nonohe faghina ira Ziu, taghe ta ghua nia ta kabai ke hio va veha lotorodi turi ghinina manei, edi age ghua sesebodira. 21 Ghe oka nomohori ghu, vununa e fuludi rodana ngavulu mane ta poika ta laora ghu ka hangana ani, ta afa mala magarina manei. Maneri dike va bebereana ta deona gedi mahai ghu, ba ketuhu ghu, edi vuhai age atungi ghu Polo. Maneri to va tana ghatunaina, suna afa ghini ma va uverina agho ka nodi fanga ani.”

22 “Oka va kahe ghini ghu agho kaike noni ghu, noke to turi vanagu agho ghinina iahi,” neke ghua ia mane pauna ia punugara, ghe neke va ghahei nga tuna ia mane foforu.

Polo Ne Va Ghahe Laoi Sesaria

23 Ianimu tuna ghe neke kudori nga palu ghu ka ira nona manefaadi mane magara, neke kahe ghidi va gigima ghu, “Hiori palu ghobi mane magara, vitu ngavulu mane ta haghe hose nia palu ghobi mane ta posi kolae e ghua, o va tanari ghu mala laona Sesaria ka nakele leghaha ghu ghatu redu. 24 Va ghono vanani Polo keha hose mala haghe vari holaraina ka manei, e boka la dufu va veha ghu manei ka ia mane Gavana Filikisi.”

25 Kangava vanani lao tuna ia mane gavana leta iahi, neke ghua manei:
26 “Sipana ka ara Kolodiasi Lisiasi, e lao ghu ka ia leghahai faghina Gavana Filikisi. !Nogu ungene veha ka agho!
27 Mane iahi dike sakomi keha mane Ziura, dike bini atungi mo ghu. Na avohi ghu ara neke holarana manei ka ia Ravutuna Romu, nake to lao ma ara taremehadira nogu mane magara idi, mala la hio va dolinina.
28 Ianimu tuna ghe nake hio laoi nga ara ka ia nonohe faghina ira Ziu mala va sisiva hadu kaveina heve mo neke riva ghinina manei, ghe dike makuti nga. 29 Na hadu kaveina ara mu, ia vari makutu neke susugoro lao ka ira notoho ta ghini ma ia vetula ka taghodi, nga manei mu neke deo ma heve leghutau neke riva ghinina, ta boka mala nai haghelina maneri ka pipiliga, ba ta boka mala va lemeina maneri.
30 Ghe, na age avohi ghu ara ta kabai atungina manei maneri, nake to magali va ghahe agei ma ara ka agho. Nake to va kahe ghidi ghu ara ira Ziu ta mala age va kahe ghinighona agho ira heve leghutau di norekina maneri Polo.”

31 Leghuina ghu heve neke kahe ghidi va gigimao manei, maneri dike to ghahe mala lao Sesaria redu ianimu, dike hio dufu laoi ghu Polo ka ia malau leghaha Anitipatirisi ira mane magara. 32 Ia keha ravata, ira mane magara dike ghaghahero, dike leghu lao ka ia malauna punugara. Ira mane ta haghe ka hose tuna, gedi ke hio va dufu laoi ghu Polo ka ia malau leghaha Sesaria, dike ghua. 33 Ka ia la sabaradi aianihi Sesaria, maneri dike hio laoi Polo nia ia leta e ghua, ka Gavana Filikisi. 34 Ia gavana neke izumi ia leta, ghe neke notohi nga tuna Polo ka babarana hae mo neke la sipa mehana manei. Ne age hadu kavei ghu ta taninana manei Silisia, 35 manei neke kahe ghau iahi, “Ara ta age nomohina ghatu puhi iahi ka agho dito meha sabara la ira ta hioigho agho ka vari sukutuai.” Ianimu tuna ghe, neke va kahe ghidi va gigima nga, ta la nakainina maneri Polo ka ia suga pipiliga, la kopu ghinina ira mane magara, ka ia leghahaina tolima neke riva ghinio sepaoni Herodi ia Mane Ginitaukela ta Varanga. ^{▼▼23:35 Herodi ia Ginitaukela ta Varanga, neke riva ghinina mu malau ginitau iahi. E deo ma ge sepa ghu leghuna ia urahana Zisas neke leme ghu manei. Fini Matiu 2.}