Act 24 | KjiSC | STEP | Ka ia va gahana ravata, Ananaeasi ia hiama pauna, neke lao ka ia malau leghaha Sesaria taremehadi keha mane babatura ka ira Ziu nia kaike mane ta avohi ia vetula babaolonana Teritulasi e ghua, mala la hio vonarira ira nodi vari va tapata ghini Polo ka kenuna ia mane gavana.

Acts 24

Ia Vari Sukutuaina Polo Ka Kenuna Gavana Filikisi

1 Ka ia va gahana ravata, Ananaeasi ia hiama pauna, neke lao ka ia malau leghaha Sesaria taremehadi keha mane babatura ka ira Ziu nia kaike mane ta avohi ia vetula babaolonana Teritulasi e ghua, mala la hio vonarira ira nodi vari va tapata ghini Polo ka kenuna ia mane gavana. 2 Ka ia kudo hagheli Polo, Teritulasi neke makuti Polo ka kenuna gavana Filikisi kahe ghuana iahi:

“!Gavana Filikisi! Ia babatu ta namanama ka agho ne vanada kaike fafata ta bule soduai nia tehi foforudi holarani di age aura e ghua, malanana ia veha ka noda soloso ini. 3 Hae ghe hae ghu, ghai na torai kabai ghini tudu ma ia babatu ka agho nia na torai kudo vehaigho, e ghua. 4 Ghe ka ia deo ga kabai hio va soduaini ghu ia fafata ka agho, ara a fangaigho ka ia nou namaha, ta nomoho meharira ma nomai ngengene teri irahi.

5 “Ghai nato ke hadu kavei mane iahi, ta noni ngongovalanana va hugahugarira ira noni Ziu hae ghe hae ghu ka malau iahi peka. Manei haro lamu ta papauna ghinina ia butubutu ta leghui ia mane vari va kakahei ka ia malau leghaha Nazareti. 6 Manei neke va sisiva sotai haroma ghe ia Sugana God, nake sakomi ghu ghai. ^{▼▼24:6 Keha sesepadi kakangavara ka Giriki edi nai hagheleri papaguaina 6b-8a: 6a Ghai nake kabai fatei manei ka ira nomai vetula taghomai. 7 Ghe Lisiasi ia mane pauna ia punugara neke meha ngovangovala ghai ka ia meha hio ghaheina Polo. 8 Toraina kahe ghidi va gigima tuna ira ta vari makutu neke ghua Lisiasi ta mala hio meharira ira nodi vari va tapata ghini mane iahi ka kenuu agho.} 7 – 8 Go notohi la agho mane iahi, agho o boka age hadu kavei mo taghou, dito hohoghodi la vahina puhi ta va tapata ghini irahi nga manei.” 9 Ira keha noni Ziu dike holara vari makutu molamo, dike kahei ghu taghe leghu irahi nga mu hohoghodi, ta ghuana.

Polo Ne Ungene Tughuri Ira Vari Makutu Ka Ira Ziu

10 Ne rivai lao va ghila ghu ka ia kamena ia gavana ta mala ngengenena Polo, Polo neke kahe ghua iahi, “Ara na avohi noke manefatena agho tehi komuhuni ka soloso iahi, na va manemane ghu ara ta mala tetu kaputuauna taghogu ka kenuu agho. 11 Agho o boka riva ghini kave ma, neke deona ge fuludi ghu tazoi palu ravata toke fuludu agera, ara nake vona la va totoana aianihi Zerusalemu. 12 Heiri ta makutuau irahi ara, e deo gedi ke finiau ghu ara vari tuufai taremehanana kaike noni ghu ka giliona ia Sugana God, ba va hugahugarira ira noni ka ira suga mala varighara ira Ziu, ba hae mo ka giliona ia malau leghaha. 13 Maneri e deo hae ta boka va dedekerira nodi turi ta va tapata ghinagu meha irahi ara.

14 “Ghe ara a kahe kavei ghu iahi ka agho: Ara mu a va totoana ghini mamu ia God ka ira faamai, leghuina Hangana ianimu ka Zisas, ne sesebona ta ghua ghini iahi maneri. Ghe ara a toraina va hohoghonari molamo ira vahina leghutau nga dike kangava hinaeriro ka ia vetula Mosese nia ka ira buka ira porofeti, e ghua. 15 Taghe mane irahi la, a ghua molamo ara, kuruauna ia rangerange ka God ghinina ia tetuleghu ka ia leme ka ira noni ta veha nia ta muko, e ghua. 16 Ianimu la ghe na toraina va sisiva tudu nga ta va kalasina nganganagu ini ka kenuna God nia ira noni haroharo, e ghua.

17 “Leghudi ira tehi komuhu nake kave kainio ara Zerusalemu, ara nake leghu lao aianimu hio lao rongona ka ira Ziu ta kuma nia la rivai veala laona ka God, e ghua. 18 Noni ta makutuau irahi ara mu, dike finiau ka giliona ia Sugana God, ka ia va hokoti ara ia riva beanana ia va kakalasa. E deo varigharana noni neke au taremehaguna ara nia e deo magara, e ghua. 19 Ghe kehara ka ira noni Ziu ka ia babarana Esia, dike au haroma aianimu. Neto hohoghona la mamu nake riva ghidi va zeara ara keha leghutau, maneri lamu geala ta makutuauna ara aiahi ka kenuu ini agho. 20 Ba, o notohori mane babatu ta au irahi, heve mo muko dike finina maneri ka ara, ka ia fafata tetu ara ka kenuna ia nonohe faghina ira Ziu. 21 Va tapata ta boka hio vonaina maneri ghinaguna ara mu, ia ngengene nake kudo ghini laono ara ka kenudi maneri, ia ta ghua iahi lama, ‘Ghe no hioau nga ara ghau ka vari sukutuai mu, vununa ara na va hohoghona ka ia tetuleghu ka ia leme,’ ia ta ghua ka ara.”

22 Ghe Filikisi mu, e avoho va vehai ia Hangana ka Zisas, neke age va nodoi ghu ia vari sukutuai kahe ghuana iahi, “E sabara Lisiasi ia mane pauna ia punugara, ghe ga age kahe kavei nga ara heve ta ghuana mu puhi iahi.” 23 Ianimu tuna ghe neke kahe ghini va gigima nga manei kaike manefaadi ira mane magara ta mala kopu ghinina manei, ghe neke va malumi mo tuna ta ghahe ghena lao mehana keha fafatara nia neke va malumuri haro ira nona baere ta la sigho ghinina, ta toka ghinina ghu ka ira ta malanga ghidi manei, neke ghua.

24 Leghudi keha ravatara, Filikisi neke meha ka ia koti taremehana ia ghaseborona Durusila, kaike ghase Ziu. Manei neke tuhu lao noni mala la hio mehaina Polo ka taghona, neke nonomoho ghu Filikisi ka ira tuturi manei ghinina ia va hohoghona lao ka Kraes Zisas. 25 Ghe Filikisi neke age maughena ka ia tuturi Polo ghinina ia au va lotoro nia ia au banabana ka ira noni nia ghinina ia fafata ta age fateri God ira leghu noni nga e ghua, neke kahe ghua ghu iahi, “!O nodo, to fata! Oto boka ke ghahe mo agho. To age au la ghatu keha fafata ta veha, ghe gake kudo leghuigho nga ara.” 26 Ka fafata iahi haro, Filikisi neke rangerangei molamo ta age vanani rongona Polo ka ia kabai va kavei taghonai, e fani tuhu lao noni ghu mala la hio vanani mehana, ta nonogelena ghu maneri palu.

27 Leghudi palu komuhu, Porisiasi Fesitasi neke age tetu gavana holarina Filikisi, ghe vununa Filikisi neke kabai hadu veha ka ira noni Ziu, neke nai kaini ghu Polo ka pipiliga.