Act 28 | KjiSC | STEP | Ka ia fafata nake to la sabara va vehao ghai kalae, ghe nake age hadu kavei nga tuna mu, Molota ta ghua ghinina ghizuna ini.

Acts 28

Polo Ka Ia Ghizuna Molota

1 Ka ia fafata nake to la sabara va vehao ghai kalae, ghe nake age hadu kavei nga tuna mu, Molota ta ghua ghinina ghizuna ini. ^{▼▼28:1 E fuludi 900 kilomita (560 maele) neke va felo ghaheina ia vaka ia tapaoho.} 2 Ira nonidi ka malau ianimu, dike puina sute ghai fuludu, dike hio namaha ghai ghu riva vanamai totoi mala faraina, vununa neke nanare nia kaporo, e ghua.

3 Polo mu neke sene piliga varighara ghidi keha heke mala pupuhi lao ka totoi ani. Ne pupuhi lao heke ghu Polo ka totoina, neto la va tagu kave mehai ghu kaike adogho minga ia dangavana totoi, neke la ghanini ghu ia kamena. 4 Di finini ghu ira nonidi ka ghizuna ani ta reketena ia adogho minga ka kamenao Polo, maneri dike kahe ghua iahi ka vari taghodi, “Mane iahi mu toraina kaike mane ta vari atungu! Geta to va fuludi mo manei ia leme ka tahio ghe, Totonu, ia god ghasena ka ghita e deo ge va malumi ghu manei ta dolina.” 5 Ghe Polo neke fute ghini kai lao ia adogho ka totoio, deona ghe geke va fogari ghu. 6 Ira noni dike afa ghini Polo taghe niha ghe ge boku nga, ba ge riufu leme hinae nga manei, ta ghuana. Ghe leghuna afa soduai maneri, dike deono ghu fininina heve leghutau neke dufuina Polo, maneri dike age holarari ira nganganadi, dike kahei ghu manei mu kaike god, ta ghuana.

7 Gheremena lao ka nake sabarao ghai mu, e au kaike malau ta taghoi Pabiliasi ia mane gavanana ghizuna ini. Manei neke hio sute ghai, neke vaikusu ghai ghu lito ravata. 8 Nona mama Pabiliasi mu neke epuepu fogara dangavi nia mamaluse tia neke ghua ka fafata iahi. Polo neke la sigho ghini manei, neke la tarai toka ghini ghu, nia va fara laori tuna ira kamena, geto ke age veha ghena ghu, neke ghua. 9 Leghuna ianimu, ira leghu noni dike fogarariro nga ka ghizuna ini, dike la meha ka Polo, neke age va vehari ghedi haroharo ghu manei. 10 Leleghonana mu, ira noni dike toraina age va vonavona ghai haro molamo, dike vanamai ghu ira vahina leghutau nake malanga ghidiro nga ghai ka ia va tanai tepetepe ghahemai ka ghaghahe ianimu.

Polo Ne Sabara Romu

11 Leghuna au aianimu lito hihile, ghe nake tepetepe ghahe nga tuna ghai ka kaike vakana ka ia malau leghaha Alekesanidiria, ta va kudo ghini “Ira God Ta Sua,” ^{▼▼28:11 Ka torai sumelekena kenuna ia vaka, ira maneriva ka ia vaka edi ghoasa nguzunguzudi ira god ta va totoana ghidi taghodi nia tadi va hohoghonari maneri e kopuna ghidi taghodi nia nodi vaka ani e ghua ira ta ghua ghidi. Ia vaka mu edi va baolo leghu ghidi ira nguzunguzu ta ghoasa nakairi ari maneri ka torai sumelekena kenuna vakana. Vaka iahi mu “Diosikuri” dike ghua ghini ghu babaolonana, fafahakanana mu “Ira Tuunamane Zeusi” e ghua. Zeusi mu ia god pauna ka ira noni Giriki. Ira palu tuunamane ta sua babaolodira mu, Kasitori ghe Polakasi.} neke va fuludio ia rabongi ka ia ghizuna Molota. 12 Ghai nake kusu la nodo kaina ka ia malau leghaha Sirakiusi, nake la au ghu aianimu lito ravata. 13 Sipamaina aianimu, ghai nake tepetepe kadolo lao ka ia malau leghaha Riziamu. Ka ia keha ravata, ia dafe neke to tataniga ufu meha pelopeka mo. Leghuna palu ravata ma, nake to la sabara ghu ghai ka ia malau leghaha Puteoli. 14 Aianimu nake la dufurira ghai keha noni ta va hohoghona, dike fanga ghai ghu ta au tadina vitu ravata. Leghuna au taremehadi maneri, ghe nake lao nga tuna Romu taonona ka kavao kalae mo.

15 Ira taremehamai noni ta va hohoghona ani Romu dike nomohi ta laona ghai, dike meha dufu ghai ghu ka ia Maketena Apiasi nia ka ira Lito Suga Mala Maghoso, e ghua. Ka ia finiri maneri, Polo neke toraina age hio gigima laoni, neke kudo vehai ghu God.

16 Ka ia la sabaramai Romu, maneri e deo gedi ke nakaini ghu Polo ka ia suga pipiliga, nga dike va malumi ta au nenemana manei ka keha sugana mo, taremehana kaike mane magara mala kopu ghinina.

17 Leghudi lito ravata, Polo neke kudo varighara ghidi ka kaike haedu ira mane babatu ka ira Ziu. Di varighara meha ghu maneri, manei neke kahe ghua iahi, “Ghau taremehagu noni Isiraeli, ara dike sakomoau aianihi Zerusalemu, dike hio laoau ghu ka ira faghinadi Romu, geta deo mo heve leghutau nake riva ghini va zeana ara ka ira noni ghita, ba ka ira puhi sepa ira faada. 18 Leghuna hioau ka vari sukutuai, ira noni Romu dike kabai va kaveau ara, vununa e deo heve muko neke hotoauna ta boka age mala va lemeauna maneri. 19 Ghe ira mane babatu ka ira Ziu, dike deo gedi veha vanadi ghu ta va kaveauna ara, nake fanga ghu ta mala ke fininina ara Sisa, geta deo au ghu heve nake mala hio vonarira ara ira nogu noni taghogu. 20 Ianimu la ghe, nake fanga mala fini ghau nga nia turi taremehamu nga, e ghua. Di piligau nga ara ka seni iahi mu, vununa ghini ia Mesaea ta mala rangerange agei iahi ghita ira noni Isiraeli.”

21 Ke ungene tughui tuna Polo dike ghua, “Ghai e deo kaike letana Zudia ghinighona agho nake hioina, nia e deo hei ka ira noni ghita dike sipa meharo aianimu, dike meha turi ghinina, ba kaherira keha leghutau ta muko ghinighona agho, e ghua. 22 Ghe ghai na kabai nomohi heve mo va hohoghonana ka agho, vununa na avohina ghai mu, ira noni hae ghe hae ghu edi turi ghini va muko ia pukuna ta leghui Zisas ta holara iahi agho.”

23 Nakaini tuna kaike ravata mala ke meha dufuina Polo, gedi la meha ghu tuna ka ravata ianimu ira tehi noni ka malau neke auno manei, dike ghua. Tatanigai ka ia fufughona dufu ghu ka ia saighona, manei neke va fafahaka vanadi ia Ravutu ka God va dedekena ka ia vetula Mosese nia ka ira buka ira porofeti e ghua, mala va sisiva fihikirina maneri ta va hohoghonaina ghu Zisas. 24 Kehara ka maneri dike age va hohoghona mo ka ira ngengene Polo nia kehara tuna dike deo ma, e ghua. 25 Ka ia dike to age vari zuaraio ira nodi vari tuufuai, maneri dike to age ghahe kaini Polo leghuna age kahei manei va nonoghana gugutona ngengene iahi: “Ia Tarunga Ta Maduana neke kahei mo ia lotorona leghutau ka ira faamu, ka ia kahe ghua iahi manei ka ia porofeti Aesaea:
26 “‘O lao ka noni irahi o la va kahe ghidi ghu,
“Ghau o age nonomoho ma, o nonomoho ghu,
ghe e deo go age va fafahaka ghu;
Ghau o age mato ma, o mato ghu,
ghe e deo go age fifini ghu,”
27 Vununa ira hihingodi noni irahi to kaputu,
nia maneri dike to kaputuri ira talingadi,
nia maneri dike to bakisiri ira hibadi, e ghua,
Gedi ke deo la riva ghinina ianimu maneri, ira hibadi geala edi finini,
ira talingadi geala edi nonomoho,
ira hihingodi geala edi va fafahaka,
geala edi fihiki meha ghu ka ara,
nia ke age va vehari tuna ara, e ghua.’ ^{▼▼ 28:27 Aesaea 6:9,10}

28 “Ianimu la ghe, na kabai ghini ghau nga ta avohina ghau mu, ta maladi harona ira noni taka Ziu ghu ia vari hio va doli ka God. Maneri edi age nonomoho ghu ghatu.” ^{▼▼28:28 Keha kakangavara ka Giriki mu e nai hagheli papaguaina 29 Leghuna kahei iahi Polo, ira Ziu dike ghahe, vari tuufuai va mukona vari hoataidi taghodi.}

29 – 30 Palu komuhu neke auna Polo ka kaike suga taghonai ta tabari ta au ghu manei mala auina, neke hio namahari ghu manei ira leghu noni ta la sura ghini nga. 31 Manei neke toraina nadu tuturi beana ghinina ia Ravutu ka God nia vari va kakahei ghinina ia Lod Zisas Kraes, e ghua. E deo ghu hei neke va sisiva nodoina manei.