Act 3 | KjiSC | STEP | Kaike ravata Pita ghe Zone dike lao ka ia Sugana God ka nakele lito ghu leghuna ia hoatai ravata, ka ia fafata mala tarai.

Acts 3

Pita Ne Va Vehai Ia Mane Ta Paheku Ta Fafanga

1 Kaike ravata Pita ghe Zone dike lao ka ia Sugana God ka nakele lito ghu leghuna ia hoatai ravata, ka ia fafata mala tarai. 2 Kaike mane neke doli paheku dike hure laoi maneri ka ia makatana ta mala haghele lao ka ia Sugana God. Leleghu ravata maneri dike la nakaini manei ka ia gheremena makatana ta va kudo ghini Vevehana Makatana, e mala boka fanga nona rongo ghu ka ira noni ta haghele lao ka ia Sugana God. 3 Ne fini laori ghu manei Pita ghe Zone namo haghele laodira ka ia Sugana God, manei neke fanga lao nona rongo ka maneri palu.

4 Maneri palu dike toraina mato dodoghohoto lao ka manei, ghe neke kahe ghua nga iahi Pita, “!Mato ghai meha!” neke ghua ghini lao. 5 Mato laori tuna neke ghua manei. Ka ia nganganana manei mu, edi tufai keha nona leghutau bana nga maneri palu, neke ghua. 6 Ghe Pita neke kaheina, “Ara mu toraina deo au rongo ma, nga ara a vananigho heve ta kuruauna ara. !Ka ia babaolona Zisas Kraes na Nazareti, o tetu vona o ghaghahe ghu!” neke ghua ghini.

7 Ianimu tuna ghe neke posi laoi nga Pita ia kame mautuna, neke toka ghini ghu ta tetu vonana manei. Selu laoi ma ianimu, to ke age veha ghena ghu ira ghahena nia ira sisiena. 8 Manei neke to paraku vona ma ka ghahenaro, neto tatanigai ghaghahe liloho ghu. Ianimu tuna ghe neke leghu hagheleri nga manei Pita ghe Zone ka giliona ia Sugana God, ghaghahe, paraku, ta ghua ta laona ghu, helahela ghinina God.

9 Ira leghu noni nga aianimu, dike fini laoi mo manei ghaghahe lilohonana nia helahela ghinina God, e ghua. 10 Di age avohi ghu manei lamu ia mane ta paheku ta fani nohe fafanga ka ia makatana ta mala haghele lao ka ia Sugana God ta va kudo ghini Makatana Ta Veveha, ta ghuana, maneri dike puina age nodi fere fuludu ka heve neke dufuna ka manei. 11 Ka ia fafata poposi lao ta au ghu mane ta fafanga ini ka Pita ghe Zone, ka ia malau mala adihi nonogele Solomone, ira noni haroharo dike puina nodi fere dike purudu lao ghu ka maneri.

Pita Ne Tuturi Beana Vanadi Ira Varigharadi Noni

12 Ne finiri ghu Pita noni ta varighara irahi, manei neke va kahe ghidi, “?Ghau taremehagu noni Isiraeli, heve ghe no nomu ferei nga iahi? ?Nia ne heve ghe no mato dodoghohoto ghini ghai meha nga, taghe nake va vehai ghu ghai mane iahi ka ia torai mana taghomai, ba ka ia au ta beana ghai, ta ghua ghini ghai ini? 13 Ia God ka Ebarahamu, Aesake, Zekopu nia ka ira faada meha, e ghua lamu, ne toraina va vonavonaina ia nona noniriva Zisas, ka ia va tetu leghui manei ka ia leme nia ka ia va vehai mane iahi ka ia babaolona Zisas, e ghua. Zisas haro iahi lamu, noke vanadi laono ghau ira faghinadi Romu. Nia ghau noke sokei manei ka kenuna Paelati, geta ghua ghu ka ia leghuna kahei Paelati ta mala nai kaveina manei. 14 Ghau noke sokei Zisas Ia Ta Lotoro nia Ta Maduana, noke fangai ghu Paelati ta toraina va kave vanamuna ia mane ta vari atungu mo. 15 Ghau noke atungi ia ta mala vanadi doli ira noni, ghe God neke va tetu leghui manei ka ia leme. Ghai palu mu, nake toraina fini hibamai ghu ghinina iahi.

16 “Ka ia va hohoghona ka ia babaolona Zisas, neke age hio gigima ghu mu mane ta paheku noke finini nia avohi iahi ghau. Ka babaolona iahi lamu Zisas nia ka va hohoghona ta la meha ani lamu ka manei, neke toraina age va veha kamotina mu mane iahi, taghe tato finini iahi la ghau haroharo.

17 “Ghau taremehaguro, na avohina ara mu, ghau nia ira ta babatu ghini ghau e ghua, e deo goke avohi ghemu ghu heve noke riva ghinina. 18 Ghe iahi lamu tuna mu age va ghuduvina God, heve dike kusu kahe kenuriro ira leghu nona mane porofeti nga, ghinina ia Mesaea e age va vavahagala, dike ghuaro. 19 O taghuru kairi ghu ira sasakemu, o fihiki lao ghu ka God mala kai hazarira manei ira sasake ka ghau. 20 Ianimu tuna ghe ge la meha nga tuna ghatu mu ira fafata ta namanama, ta mala ke va gigima leghu ghauna ia Lod nia ke la va meha vanamuna ghatu Zisas ia faetaina Mesaea, e ghua. 21 Manei e toraina au tudu ma e au ghu ka malauo God fate, e vuhai dufu ghu ia fafata ta ke age va foforu leghuri God ira sare leghutau haroharo, taghe neke naiungene ghinio manei sepaoni mala kahe kaveina ira porofeti ka ira noni. Iahi mu e mala va tana ghini ghu Zisas, ia ta ke la leghu meha ta meha kopuna ghidi ghu ira nona noni. 22 Mosese neke kahe ghua iahi, ‘Ia Lod ia nomu God e age va tetui ghatu kaike mane porofeti taghe ara la ka hoataidi ira torai nomu noni taghomu. O nonomoho va veha lao ka ira vahina leghutau ta kaheri nga manei, o leghuri ghu. 23 Hei ia ta deo ge nomohi ghu mane porofeti iahi mu, e age nakai kavei ghatu ka ira nona noni God e age toraina ngovala va mukoi ghu.’ ^{▼▼3:23 Ngengene 18:15,18,19}

24 “Ira leghu porofeti nga, tatanigai ka Samueli ta la meha ghu, dike tuturi ghini molamo heve ta dufu ini ghatunaina. 25 Ira naiungene ka God neke kaheriro manei ka ira nona porofeti mu, e malamu ghau. Nia ghau o hio tufa ka ia varivehai foforu neke riva ghinio God taremehadira ira faamu, e ghua. Manei neke kahe ghua iahi ka Ebarahamu, ‘Ka ira noni haroharo ta age pagusu meha ka agho, a va beanari ghu ara ghatu ira noni haroharo ka malau iahi peka.’ ^{▼▼3:25 Tatanigaina 22:18; Tatanigaina 26:4} 26 Ianimu la ghe, neke va tetu leghui nga God ia nona noniriva, neke kusu tuhu agei ghu ka ghau ira nonidi Isiraeli, mala va beana ghauna, ta fihiki kairira ghu ira sasake ka ghau.”