Act 5 | KjiSC | STEP | Kaike mane babaolonana Ananaeasi, taremehana Safira ia ghaseborona e ghua, dike tatabara ghini haro kaike nodi birusuna kava.

Acts 5

Ananaeasi Ghe Safira Di Sesebo

1 Kaike mane babaolonana Ananaeasi, taremehana Safira ia ghaseborona e ghua, dike tatabara ghini haro kaike nodi birusuna kava. 2 Maneri palu noni dike variveha ghini ta rivai sesebona mala posi leghuina ia keha pelona rongo, hio vanadi lao ma tuna ia keha pelona rongo ira mane nonomoho, dike ghua.

3 “?Ananaeasi,” neke ghua Pita, “heve no ghua ghe, noke va malumi nga Satana ta va foudina hihingou nia? Agho noke seboi ia Tarunga Ta Maduana, noke posi leghui ghu ia keha pelona rongona kava, malauna taghou. 4 Kava iahi mu neke kusu nou mo agho, ghe noke tatabara ghini nga agho. Leghuna ia tatabara ghini agho mu, ia rongona manei neke nou haro ngama agho. ?Neke heve ghe, noke riva ghini nga agho kokolona puhi ta ghuana iamu? Agho e deo goke seboi ghu ia noni, nga noke seboi God,” neke ghua Pita.

5 Nomohori ne ghua ghu Ananaeasi ngengene irahi, to riufu leme hinae ma manei. Maneri haroharo dike nomohio tuturi iahi, dike age puina maughedi fuludu. 6 Ianimu tuna ghe, dike la meha nga keha mane foforura, dike la pihai ghu ia tinina. Hure kavei tuna gedi la gilu ghini ghu, dike ghua.

7 Haeba leghuna lito aoa bana nga, neke la haghele meha ghu ia ghaseborona, ghe e deo geke avohi ghena ghu heve neke dufuna ka keranau. 8 Tetu tuna Pita ge notohi ghu, neke ghua, “?O va kahe ghinagu ko, iahi lamu ia kamotona tabarana kava ka ghau palu noni?” neke ghua ghini.

“Uve, iamu lamu tabaranana,” neke ghua manei.

9 Kahe ghua tuna iahi, neke ghua Pita, “Boka ghemu ghau palu ghe, no variveha ghini nga ta va kinakinaina ia nona Tarunga ia Lod ka kokolona riva ta ghuana iahi. Ira mane foforu dike la gilu ghinio kerauau, ta au ari ka makatanana. Maneri edi age hure kaveigho haroma agho ghatu, edi la gilu ghinigho ghu.”

10 Selu laoi ma ianimu, to riufu leme hinae ghu manei ka ira ghahena Pita. Di haghele lao ghu ira mane foforu, dike la finini neke to lemena manei, hure kavei tuna gedi la gilu ghini ghu ka gheremena keranau, dike ghua. 11 Ia kamotona kiloau nia ira keha leghu noni nga peghuruna ia kiloau dike nonomohoro, dike age puina maughedi fuludu.

Ira Mane Nonomoho Di Rivai Hahaima

12 Ira mane nonomoho dike riva ghidi tehi hahaima va ghilaghila ta fefereana ka hoataidi ira noni, va podolina ia mana ka God. Ira leghu noni ta va hohoghona nga, edi fani la varighara tudu ma ka ia malau mala adihi nonogele Solomone, ia ta ghua ghini, ka ia giliona Sugana God. 13 Ira noni dike deoro nga gedi va hohoghona ghu, dike puina va vonavonari mo, ghe maneri haroharo dike maughedi holara taremehadira. 14 Ghe tehini ka ira mane nia fotati, dike age va hohoghona mo ka ia Lod, dike age tehi laoni ghu maneri ka pukuna ianimu. 15 Leleghonana riva ianimu ka ira mane nonomoho, ira noni dike to hure kave laori ghe ira ta fogarari ka ira hangana peghuru, la va epurira ka ira vavage nia natu e ghua, e mala boka hoto laori ghu ia mamaeluna Pita ka ia ghahe fuluduna manei, mala va veharira, dike ghua. 16 Ira varigharadi noni dike la haghele meha ka ira malau ta au lilohi Zerusalemu, hio meharira ira dike fogarariro nia ira dike sukuriro tarunga ta muko e ghua, dike meha veha ghedi haroharo ghu.

Di Ngovalari Ira Mane Nonomoho

17 Ia hiama pauna nia ira nona mane baere ta holara ka ia pukuna ta va kudo ghidi Sadiusi e ghua, dike puina age faa vanadi kakabai ka ira mane nonomoho. 18 Sakomo hiori tuna, gedi nakairi ghu ka ia pipiliga, dike ghua. 19 Ghe kaike engizeli ka ia Lod, neke meha ka redu ianimu, neke meha tobeheri ghu ira makatana ka suga pipiliga ianimu neke hio kaveri ghu. Va kahe vanadi tuna neke ghua, 20 “Lao o la tetu ghu ka ira galahedi ka ia giliona ia Sugana God, o la va kahe ghidi ghu ira noni vahina leghutau nga, ghinina doli foforu iahi.” 21 Leghui tuna ianimu dike ghua ira mane nonomoho, dike la haghele ghu ka ira galahedi ka ia giliona ia Sugana God ka ia ghalaghalana fufugho, dike la tataniga vari va kakahei ghu.

Ne dufu meha ghu ia hiama pauna nia ira keha ta riva taremehana e ghua, maneri dike kudo varighara ghini ia kamotona Nonohe Faghina ka ira Ziu. Ianimu tuna ghe dike tuhu laori nga keha manera ka ia suga pipiliga, mala la hiorira ira mane nonomoho ta hio vonarira ghu ka vari sukutuai. 22 Ghe ira mane magara ka ia Sugana God, di la dufu ghu ka ia suga pipiliga, to deo ghidi ghu ira mane nonomoho aianimu. Ke leghu tuna ka ia Nonohe Faghina kamoto ira Ziu gedi la va tuturi ghu, dike ghua. 23 “!Ia suga pipiliga mu neke loke mo nia ira mane magara ta kopu dike tetu mo peghuru e ghua, ghe na la tobeheri ghu ghai ira makatana, e deo ma hei neke auna aianimu!” dike ghua.

24 Ia manefaadi ira mane magara ta kopu ka ia Sugana God nia ira hiama ta kenu e ghua, di nomohi ghu iahi, dike to age zea la meha ma deona gedi va fafahaki ghu heve ta age dufu mehana ghatu ka iahi. 25 Ianimu tuna ghe neke la haghele meha nga kaike noni kahe ghuana iahi, “!Nonomohona ba ghau! Ira mane noke nakairiro ghau ka pipiliga, ta la vari va kakahei ari ka ira noni ka giliona ia Sugana God,” neke la ghua.

26 Ia manefaadi ira mane magara ta kopu ka ia Sugana God, taremehadi ira mane magara ta riva ka pekana taghonai, dike la sakomo hiori ira mane nonomoho dike la hio leghuri ghu. Maneri e deo gedi ke ngovalari ghu, vununa dike maughedi ka ira noni ta va fera ghidi ghahipana. 27 Hio mehari tuna ira mane nonomoho ka kenuna ia Nonohe Faghina ira Ziu, mala hio vonarira ia hiama pauna ka vari sukutuai, dike ghua. 28 “!Ghai nake toraina kahe ghini ghau va gigima taka vari va kakaheina ghu ka ia babaolona mane iahi. Ghe ghau no huhughu noto va ongahi ghu hae ghe hae ghu Zerusalemu ia nomu vari va kakahei ghinina Zisas, kabai va tapata ghini ghaina ghai ia leme ka mane!”

29 Ghe Pita nia ira mane nonomoho e ghua, dike ungene tughuri, “Ghai a toraina leghui God mo, nga eka ghua ghu ira noni. 30 Ia God ka ira faada meha neke va tetu leghuina Zisas ka ia leme, leghuna ia atungi ta tupila ghini ghu ghau ka ia hekefalahata. 31 God neke va tetu leghui manei neke naini ghu ka ia kame mautuna taghona, ka ia malau ta toraina heheluana nia mana, mala Noda Babatuna nia Va Dolina, e ghua. Manei neke riva ghini iahi, mala vanadira kaike fafata ta veha ira noni Isiraeli, mala taghuru kairira ira sasakedi, ta fihiki laona ghu ka God mala kai hazadira ira sasake ka maneri. 32 Ghai nake finiri leghu irahi nga dufudira, mala ghai nia ia Tarunga Ta Maduana e ghua, a tuturi vanadi kave ghu ira keha noni ghidira leghutau irahi. God ne va vanadi meha ia Tarunga Ta Maduana heiri ira ta nomohi manei.”

33 Di nomohi ghu iahi ira ta au ka ia giliona Nonohe Faghina ira Ziu, maneri dike puina age halari fuludu dike kabai atunguri ghu. 34 Ghe kaike mane Farisi babaolonana Gamalieli, ia ta vari va kakahe ghini ia vetula beana ka Mosese, edi toraina va vonavonai ira noni. Manei neke tetu vona, neke kahe va gigimai ghu ta nai kaverina peghuru mane nonomoho irahi birusuna fafata tei. 35 Kahe ghua tuna iahi ka ia Nonohe Faghina ira Ziu neke ghua, “!Ghau mane mu Isiraeli, banabana ghini ghau taghomu ka heve ta kabai va riva ghidira ghau mane irahi! 36 Keha fafatara sepao lao ghu, ia mane Teudasi, taghe kaike manefaa neke ghua ghini taghonai, dike holara taremehana ghu keha rodana ghobi mane ba, e ghua. Ghe ira keha mane magara dike atungina manei, dike age sopai riraha lao meha ghu ira ta leghui nia leleghonana age deo lighorona ma tuna riva ianimu ka manei, neke ghua. 37 Leghuna manei, Zudasi na Galili neke auna aianimu ka ia fafata taho noni mala hio takisina ka maneri. ^{▼▼5:37 Taho iahi mu neke riva ghini ka A.D. 6. Ia neke riva ghinio Kuiriniasi mu neke au ka 6 B.C. (Luku 2:2).} Tehi noni dike leghuina manei, ghe keha mane magara dike age atungi haroma manei, dike age riraha lao meha ghu ira dike leghuio manei.

38 “Taghe tatanganana ghu ka ara mu, nai kairi ma mane irahi. Heve dike vato ghidi nia riva ghidi irahi maneri mu, dito ke sipa meha la ka noni, e ke age deo lighorodi ma ghatu. 39 Nga dito ke sipa mehadi la ka God mu, e deo go boka age va nodori ghu ghau. Ghau mu to boka magari haroma torai taghonai God ka ghaghahena ianimu.”

40 Ia Nonohe Faghina ka ira Ziu, dike age leghui tatangana iahi ka manei, mala deona ge atungi ghu. Ke kudo haghele leghuri tuna ira mane nonomoho gedi va kahe ghidi ghu ira mane magara ka ia Sugana God ta puruasimirira, dike ghua. Va kahe ghidi tuna taka ke puina tuturina ghu ka ia babaolona Zisas dike ghua, ghe dike va ghaheri nga tuna.

41 Ira mane nonomoho dike toraina va ghazaghaza ma dike ghahe kaini ghu ia Nonohe Faghina ka ira Ziu, vununa God neke tahori ta fatana maneri mala vavahagala vananina Zisas. 42 Nia leleghu ravata ka ira galahedi ka giliona ia Sugana God nia ka ira leleghu suga e ghua, maneri deo gedi ke nodo ghu vari va kakaheina nia tuturi beana ghinina ia Nonomoho Ta Veha ghinina Zisas lamu ia Mesaea ta ghuana.