Act 8 | KjiSC | STEP

Acts 8

1 – 2 Keha mane ta va totoana ghini God, dike meha gilu ghinina ia tinina Sitivini dike toraina nakele va fafaa ghu muko hihingo ghinina. Ghe Solo neke va tabei ta vehana mo atungina maneri Sitivini.

Solo Ne Ngovali Ia Kiloau

Ka ravata ianimu, neke toraina age ngiburu ngovangovalina ia kiloau aianihi Zerusalemu, dike age pirara haroharo ghu ira leghu noni ta va hohoghona nga, pelo laodira ka ira leghu pelodi nga ka ia babarana Zudia nia ka ia babarana Samaria, e ghua. ^{▼▼8:1-2 Neke nona au ka palu vuro (20,000) noni ta nonofoina Zisas ani Zerusalemu, ghe neke age tataniga nga ia vari ngovangovala.} Ira mane nonomoho lama dike au hinaera Zerusalemu.

3 Ghe Solo neke tataniga ngovali ia kiloau, neke hagheleri ghu tehi sugani, koroho kaverira ira mane, ghase, mala kai laorira ka ia pipiliga.

Va Paluna Pagahaina: Ia Nonomoho Ta Veha ne ongaha ani Zudia nia Samaria 8:4–12:25

Filipi Ne Tuturi Beana Aianihi Samaria

4 Ghe ira noni ta va hohoghona dike pirararo, dike age tuturi beana ghini ia Nonomoho Ta Veha ghini Zisas hae ghe hae ghu ka dike laoro maneri. 5 Filipi mu neke lao ka giliona kaike malau leghaha ka ia babarana Samaria, neke la tuturi beana ghini ghu ia Mesaea ka ira noni aianimu. 6 Di age nomohi ghu Filipi tuturi beanana nia finirira ira hahaima va ghilaghila neke riva ghidiro manei e ghua, ira varigharadi noni dike age kabai nonomoho va veveha laoni. 7 Tehini ka noni irahi dike sukuri tarunga ta muko, ghe Filipi neke age tavusu kairi dike azili va fafaa ghu kavedira. Nia tehini ka ira dike lemero ira tinidi nia ka ira dike pahekuro e ghua, dike age veha ghedi haroma. 8 Neke toraina age faa fuludu ghu ia va ghazaghaza ka malau leghaha ianimu.

9 Kaike mane babaolonana Saemoni, neke sasairai lao ka ira nazahi rivai ghidira ira leghutau ta fefereana ka ira tehi komuhu, neke toraina va varangi ghu taghonai. 10 Ira leghu papaladi noni nga Samaria, ta hinae ghe ta vona ghu dike toraina nonomoho va huhugu lao ka manei dike kahei ghu, “Manei mu ia mana ka God, ‘ia Mana ta Varanga,’” dike ghua ghini. 11 Maneri dike leghui ghu manei, vununa to puina soduai fuludu va nodi fererina manei ira noni ka heve neke riva ghidiro manei ka nazahi. 12 Ghe ne tuturi vanadi ghu Filipi ia Nonomoho Ta Veha ghinina ia Ravutu ka God nia ia babaolona Zisas Kraes e ghua, ira mane nia fotati dike age va hohoghona, dike seselebeana ghu. 13 Taghonai Saemoni harona ghe, neke age va hohoghona molamo, neke age seselebeana ghu, nia tataniga ghahe leleghui tuna Filipi neke ghua. Manei neke nona fereri ghu ira leghahai hahaima nia va ghila neke riva ghidiro Filipi.

14 Ira mane nonomoho aianihi Zerusalemu, dike nomohi tato va hohoghonaina ia nonomoho sipana ka God ghinina Zisas ira nonidi Samaria, dike tuhu laori ghu Pita ghe Zone aianimu. 15 – 16 Ira ta va hohoghona aianihi Samaria mu dike to seselebeana ka ia babaolona Zisas, ghe ia Tarunga Ta Maduana neke deo nga ge sukuri ghu maneri. Di la sabara ghu ira palu mane nomoho, maneri palu dike tarai fangai ia Tarunga Ta Maduana ta meha auna ka ira dike bake va hohoghonaro mo. 17 Va fara laori tuna ira kamedi ka ira paudi ira noni ta va hohoghona dike ghua Pita ghe Zone, dike hioi ghu maneri ia Tarunga Ta Maduana.

18 Ka ia fafata posiri ira paudi ira noni ira mane nonomoho, Saemoni neke finini ta hioina maneri ia Tarunga Ta Maduana neke kabai vanadi rongo ghu ira mane nonomoho mala tabarina mana iahi, 19 kahe ghuana iahi, “!Vanagu haro ko mana iahi, edi mala age hioi ghu ia Tarunga Ta Maduana ira noni, nato posi laori la ara paudi ari!” neke ghua.

20 Ghe Pita neke ungene tughui, “!Agho nia nou rongo nira e ghua, o lao Gehena, vununa ka ia nganganau agho, ia kaikadolo ka God e boka tabari mo ka rongo, no ghua! 21 Agho, e deo go boka riva leleghu taremehamai ghu ghai ka riva iahi, vununa hihingou nia agho, e deo ge lotoro ghu ka kenuna God. 22 Taghuru kaini sasake noke riva ghini iahi agho, o tarai lao ghu ka ia Lod God. Haeba manei e boka age kai hazari mo nganganau ta muko nira, 23 vununa ara na finini ta toraina foudighona kakabai nia ta pipiligana ka sasake, e ghua.”

24 Kahe ghua tuna iahi neke ghua Saemoni, “Tarai toka ghinagu lao ka ia Lod God, mala e deo ghu age dufuauna leghutau noke kaheri irahi ghau!”

25 Pita ghe Zone dike va kahe ghidi ira noni ira heve dike finiriro riva ghidira Zisas, dike tuturi beana ghini ghu ia saorona ia Lod aianihi Samaria, ghe dike leghu lao nga maneri palu aianihi Zerusalemu. Ka ia ghahe ta lao ghu, maneri palu dike tuturi beana ghini ia Nonomoho Ta Veha ka ira tehi malau teri aianihi Samaria.

Filipi Nia Ia Manena Itiopia

26 Kaike engizeli ka ia Lod neke la kahe ghua iahi ka Filipi, “O ghahe vai pelopeka mo, o hinae leghui ghu ia hangana ghouna ka ia malau ta karango, ta sipa Zerusalemu ta la dufu ghu ka ia malau leghaha Gaza.” 27 Tetu vona ma neke to lao ghu Filipi. Ka hangana ani, manei neke la dufui kaike mane ta lalage ka ia soloso leghaha Itiopia. ^{▼▼8:27 Itiopia ka fafata ianimu neke haza ka Itiopia iahi ghatunaina. E au haghele haro ghu ghatunaina ia pelopekana Izipi nia pelovonana Sudani, e ghua. Ia soloso leghaha neke sipa ka ia malau leghaha ta va kudo ghini Asawani ghatunaina, e dufu lao ghu ka ia malau leghaha Karatumi. Ka ngengene Hiburu mu Itiopia mu dike va kudo ghini Nubia ba Kusi, molamo.} Mane iahi mu kaike manefaana kopui rongo, ka ia ghase ginitaukelana Itiopia. ^{▼▼8:27 “Kanadesi” ta ghua iahi ka ngengene Itiopia mu, “ghase ginitaukela”, e ghua.} Mane iahi mu neke lao mala va totoana aianihi Zerusalemu, 28 neke to la leghu meha ghu taremehadi ira nona noniriva. Manei neke nohe ka ia nona leghutau mala haghe ta korohi ka hose, ghe neke izuizu va fafaa nga ka ia buka porofeti Aesaea.

29 Ia Tarunga Ta Maduana neke va kahe ghini Filipi, “O rizu namo lao ka gheremena leghutau mala haghe ianihi,” neke ghua ghini.

30 Filipi neke purudu lao, neke la nomohi ghu mane ani ta izuizuna manei ka ia buka porofeti Aesaea; la notohi tuna neke ghua, “?No va fafahaki mo agho heve no izumina?” neke la ghua ghini.

31 “?Heve ghe ga va fafahaki nga ara neto deo la hei ta va fafahaka vanaguna?” neke ghua ungene tughuna ia mane. Fangai tuna Filipi, ta vona la nohe taremehanana ka nona leghutau mala haghe ani, neke ghua. 32 Iahi mu neke izumi neke auna ghu ia manena Itiopia ka ira Kakangava Ta Maduana:
“Ira noni dike batu ghini ghahe mala atungina, taghe noni ta batu ghini ghahe kaike sipisipi mala atungina, neke ghua.
Taghe kaike rekahana sipisipi ta vanemoho ma ka ia fafata koto kairi ira kalana ta wulu e ghua, taghe iala molamo,
Manei e deo ge age sakolori ghu ka ia va vavahagali ira noni.
33 Ka ia va haghavi ira noni, maneri e deo gedi ke va malumuri ghu ira ta babatu ta fateina ka ia ghaghahena ta totonu.
Ira noni e deo gedi boka age turi ghidi ghu ira ta pagusu meha ka manei,
Vununa ira noni dike kusu atungi, e deo ghu boka age kurui pagusuna manei ka malau iahi peka.” ^{▼▼8:33 Asaea 53:7,8}

34 Ia manena Itiopia neke notohi Filipi, “?Heve, Aesaea mu neke turi ghini taghonai, ba kehara?” 35 Tataniga tuna ka toraina Kakangava Ta Maduana iahi neke ghua Filipi, va kahe vananina ia Nonomoho Ta Veha ghinina Zisas.

36 Ka ia ghahe ta lao ghu maneri palu ka ia hangana ka ia mala haghe, dike la dufui kaike kolobakuru ketuhu, neke kahe ghua ghu iahi ia manena Itiopia, “!Mato lao! !Ketuhu ko ianihi! ?Heve ghe ga deo nga ara boka seselebeanaguna?” neke ghua. ^{▼▼8:36 Keha kakangavara ka Giriki e nai hagheli papaguaina 37. Filipi ne ungene tughu, “Agho o boka mo, noto va hohoghona la ka hihingou kamoto nia.” Ia mane ta lagei ne kaheina, “Ara na va hohoghonai Zisas Kraes mu ia Tuunamane God, ta ghuana.”} 37 – 38 Va kahe ghidi tuna ira maneriva manei ta va nodoina ia leghutau mala haghe, gedi hinae lao ghu maneri palu Filipi ka giliona ketuhu ani, la seselebeanana manei ka Filipi, neke ghua.

39 Di ghahe kave ghu maneri palu ghu ka ia kolobakuru ketuhu, heve ba neke ghua ma, to meha ghu ia Tarunga ka ia Lod hio ghaheina Filipi. Ia manena Itiopia to deo ma ke fini leghuinani Filipi, ghe neto ghahe ma manei ka ia torai va ghazaghaza.

40 Leghunana, Filipi neke la podolo ka ia malau leghaha aianihi Azotasi. Manei neke la tuturi beana ghini ia Nonomoho Ta Veha aianimu nia ka ira leghu malau leghaha nga, ta au ta la dufu ghu ka ia malau leghaha Sesaria, e ghua.