Act 9 | KjiSC | STEP | Ka fafata iahi, Solo neke toraina nakai hihingona ma neke au ghu ta mala va mamaghuri ta atungurira ghu ira ta leghui ia Lod. Lao tuna ka ia hiama pauna,

Acts 9

Solo Ne Meha Tataniga Va Hohoghona Ka Zisas

Ira Riva 22:4-11; 26:13-18

1 Ka fafata iahi, Solo neke toraina nakai hihingona ma neke au ghu ta mala va mamaghuri ta atungurira ghu ira ta leghui ia Lod. Lao tuna ka ia hiama pauna, 2 ge la fangari ghu ira leta ta mala hio laori ka ira ta babatu ka ira suga mala varighara ira Ziu, ka ia malau leghaha Damasikasi, neke ghua. Leta iranimu neke vanani mana Solo, mala neto la finiri la keha mane, ba ghase ta leghuina ia Lod, manei e boka sakomo hio leghu laori mo Zerusalemu, e la nakairira ghu ka pipiliga aianimu.

3 Ne ghahe namo laoi ghu manei Damasikasi, heve ba ne ghua ma, neto pelara lilohi ghu ia fegala sipa mehana ka kolangana fate. 4 Manei neke riufu hinae ka kavao, ghe neke nomohi nga kaike leo kahe ghua laona iahi ka manei, “!Solo! !Solo! Heve no ghua ghe no ngovalau nga agho?”

5 “Hei mu agho, Lod?” neke ghua notohona Solo.

“Ara mu Zisas, ta ngovalau nia agho.” neke ghua ia leo. 6 “Ghe o tetu vona, o lao ghu ka malau leghaha ani, e la va kahe ghinigho ghu ghatu kaike noni heve ta mala riva ghinina agho.”

7 Ira mane dike ghahe taremehanao Solo dike to tetu ma aianimu deona heve ta kaheina. Maneri dike nomohi mo leo ani, ghe deo ma hei dike fininina. 8 Ne tetu vona ghu Solo tobeherira ira hibana, to deo ghu heve neke boka fininina. Posini tuna ia kamena gedi batu ghini lao ghu Damasikasi, dike ghua. 9 Lito ravata neke to deona ge boka fifini ghu manei, nia deona geke mahai ghu nia ketuhu ghu, e ghua.

10 Ghe kaike mane ta va hohoghona, babaolonana Ananaeasi neke auna aianihi Damasikasi. Ia Lod neke kudoi manei ka kaike hahaima, “!Ananaeasi!” neke ghua.

“Iahi ara Lod,” neke ghua ungene tughuna Ananaeasi.

11 “Va tana, o lao ghu ka ia suga Zudasi ka ia hangana ta va kudo ghini ‘Lotoro,’ o la notohi ghu kaike mane ka ia malau leghaha Tarasasi babaolonana Solo. Manei ne tarai meha ka ara ghatunaina. 12 Ka kaike hahaima, manei neke finini kaike mane babaolonana Ananaeasi laona, ta la posinina ghu paunani manei, mala ke va vovoho fifini leghuina.”

13 “Lod,” neke ghua Ananaeasi, “Ara nake nomohori ira leghutau ta mumukoana neke va riva ghidiro ira nou noni aianihi Zerusalemu mane iahi. 14 Manei neke hio mana ka ira hiama ta kenu, mala sakomo hiorira ira noni haroharo ta va hohoghona ka agho aiahi Damasikasi.”

15 Ghe ia Lod neke kahe ghua iahi ka Ananaeasi, “Lao, o la riva ghini ghu heve ta kahei ini ara. Mane iahi mu nake faeti ara mala riva vanaguna, e tuturi beana ghini ghu manei babaologu ini ara ka ira noni taka Ziu ghu, ka ira mane ginitaukela nia ka ira nonidi Isiraeli, e ghua. 16 Ara ta va podolo vananina ghatu taghe niha ghu ta toraina mala age vavahagala vanaguna manei ghatu.”

17 Lao tuna neke ghua Ananaeasi, ge la finini ghu Solo ka ia suga ta au ani manei. Manei ne va fara laori ira kamena ka Solo, ghe neke kahe ghua nga iahi, “Tahigu mane Solo; ia Lod Zisas neke podolo ghinighono agho ka hanganao, neke tuhu au mehana ara, o mala ke vovoho fifini leghu ghu agho, nia va foudighona ka ia Tarunga Ta Maduana, e ghua.” 18 Heve ba, ne ghua ma, to zoghu hinae ghu ka ira hibana Solo keha leghutau taghe karidi namari ira ta ghua, neto ke boka age fifini leghu ghu manei. Tetu vona tuna ge la seselebeana ghu, neke ghua. 19 Leghuna mahairi keha ghano, manei neke age gigima leghu.

Solo Ne Tuturi Beana Ka Ia Malau Leghaha Damasikasi

Tehi ravatani, Solo neke au taremehadi ira ta va hohoghona aianihi Damasikasi. 20 Magali ma neke to la tataniga tuturi beana ghini ghu manei Zisas, ka giliodi ira suga mala varighara ira Ziu, ghinina manei mu toraina Tuuna mamu God, ta ghuana.

21 Ira leghu noni dike nonomohoro nga ka manei dike age nodi fere fuludu, dike notoho ghua ghu iahi, “?Eka ghua ghu ia mane neke ngovalariro ira noni dike leghuio Zisas ani Zerusalemu, baini mu mane iahi?” dike ghua. “Ta avohina ghita mu, manei neke meha aiahi neke sakomo hiori ghu noni iranimu mala hio laorira ka ira hiama ta kenu.”

22 Ghe ira tuturi beana ka Solo dike puina age gigima laoni, to age deo ghu boka paufidina ira noni Ziu ani Damasikasi ia nonomoho ta hohoghona ka manei ta va podoli Zisas lamu, toraina Mesaea hohoghonana ia ta ghua. 23 Leghudi tehi ravatani, keha mane babatura ka ira Ziu dike vato ghini mala atungina Solo, 24 ghe kehara dike to va kahe ghini Solo vatovato ianimu ka maneri. Redu ravata, maneri dike kakae ghini ka ira makatanana malau leghaha ani mala atungina manei. 25 Ghe ka ia redu, ira mane dike leghuio Solo, dike va luara kave hinae laoi manei ka giliona kaike leghahai maka ta gima, ka kaike tobehena ka ia riringina malau leghaha.

Solo Ne Tuturi Beana Aianihi Zerusalemu

26 Ka ia la dufuna Solo aianihi Zerusalemu, manei neke va sisiva holara taremehadi ira ta va hohoghona ka Zisas, ghe maneri haroharo dike maughini ghedi, vununa maneri e deo gedi ke toraina va hohoghonai ghu manei mu toraina kaike mane va hohoghona mamu, ta ghuana. 27 Ianimu tuna ghe neke tetu nga Banabasi neke toka ghini ghu hio laoina ka ira mane nonomoho. Banabasi neke la turi vanadi ghinina heve neke ghua Solo finina ia Lod ka ia hangana ta vai lao Damasikasi nia heve neke kaheina ia Lod ka manei, e ghua. Manei neke tuturi vanadi haro molamo ghinina neke deona ghe geke maughena ghu Solo, tuturi beanana ka ia babaolona Zisas aianihi Damasikasi. 28 Nia age tatanigai holara taremehadi tuna ira mane nomoho nia ira keha noni ta va hohoghona neke ghua Solo, neke rizu lao meha ghu deona heve ta va gogohaina ka ia kamotona Zerusalemu, neke toraina nadu ghu manei tuturi beanana ka ia babaolona ia Lod. 29 Manei e fani ngengene nia vari tuufuai taremehadi ira Ziu ta ngengene Giriki, dike kabai va lemei ghu maneri. 30 Di nomohi ghu iahi ira ta va hohoghona, maneri dike hio hinae laoi Solo ka ia malau leghaha Sesaria, dike va ghahe laoi ghu ka vaka ka ia nona malau ka ia malau leghaha Tarasasi.

31 Ia kiloau ka ira leghu pelodi nga ka ira babaradi Zudia, Galili nia Samaria e ghua, dike age auri tuna ia fafata ta bule, va totoana ghini ma ta auna ghu ia Lod. Ia kiloau neke age gigima laoni nia tehi laoni neke ghua ka ia riva ia Tarunga Ta Maduana.

Pita Ne Va Vehai Aeniasi

32 Pita neke ghaheri leghu malau nga sigho ghidira ira ta va hohoghona, neke la dufu ghu ka ira nona noni ia Lod ta au ka ia malau leghaha ta va kudo ghini Lida. ^{▼▼9:32 Ia malau leghaha Lida mu e au ka ia babarana Zudia haeba e 34 kilomita (21 maele) pelovona visi pakaona mo Zerusalemu. Ia malau leghaha mu haeba e 16 kilomita (10 maele) pelopeka visi fateona mo ka ia malau leghaha Zopa, haeba e lito aoa to ghaghahe la.} 33 Manei neke la dufui aianimu kaike mane babaolonana Aeniasi ia neke lemeo ia tinina neke to epu fuludaino ghu ka vavage giliodi hana komuhu. 34 Kahe ghua tuna iahi ka manei neke ghua Pita, “!Aeniasi, Zisas Kraes e va vehaigho! Tetu vona o pipidui ghu nou natu nia,” neke ghua ghini. Selu laoi ma ianimu neto tetu vona ghu Aeniasi. 35 Ira leghu noni ta au nga ka ia malau leghaha Lida nia ka ia malau leghaha Saroni ta au gheremena mo e ghua, dike fininio Aeniasi ghaghahe lilohonana, dike fihiki lao ka ia Lod.

Pita Ne Va Doli Leghui Dokasi

36 Kaike fotati ta va hohoghona, babaolonana Tabita, (Dokasi e ghua ka Giriki) neke auna ka ia malau leghaha Zopa. ^{▼▼9:36 Dokasi ka ia ngengene Erameiki mu Tabita, e ghua.} Fotati iahi mu neke riva ghidi tudu ma ira leghutau ta namanama vanadira ira keha noni nia toka ghidira ira ta malanga, e ghua. 37 Ka fafata ianimu, manei neke age fogari ghena neke leme ghu. Seseli tuna ia tinina, gedi la va epui ghu fate ka giliona kaike ringifota dike ghua. 38 Zopa mu neke namo lao ma Lida. ^{▼▼9:38 Ia malau leghaha Lida mu neke nona au ka 16 kilomita (10 maele) pelopekana fateo mo ka ia malau leghaha Zopa, e 3 aoa ghu to ghaghahe lao la aianimu.} Ira noni ta va hohoghona ta au Zopa di nomohi ghu ta auna Pita aianihi Lida, maneri dike va ghahe laori palu mane mala la papada mehaina, dike la kahe ghua ghu iahi, “Magali ko oto meha ghu ka ghai,” dike la ghua.

39 Va tana tuna ge leghu laori ghu neke ghua Pita. La sabara ne ghua ghu manei, dito hio vona laoi ma ka kaike ringifota fate, ka dike fouduro ira fotati ta lemekai dike nakele dike auro ghu. Va podolo vanani lao tuna ira poko sodu nia keha pokorani neke riva vanadiro Dokasi dike ghua. 40 Ghe Pita neke tuhu kaveri haroharo maneri ka ia ringifota; ianimu tuna ghe neke torongaghituturu hinae nga neke tarai ghu. Manei neke fihiki lao ka ia tinina fotati ta leme, ghe neke kahe ghua nga iahi, “Tabita, o tetu vona,” neke ghua. Ka ia tobeheri ira hibana ta fini ghu Pita, manei neto ke nohe vona ma. 41 Posi laoi tuna ia kamena ge toka ghini ghu tetu vonana neke ghua Pita. Ianimu tuna ghe neke kudo hagheleri haroharo nga ira ta va hohoghona nia ira fotati ta lemekai e ghua, neke va fini ghidi ghu tato ke doli leghuna manei.

42 Ia nonomohona iahi, magali ma neke ongaha ghu ka ia kamotona Zopa, dike age va hohoghona ghu ka ia Lod ira tehi noni. 43 Pita neke au laona tehi ravatani aianihi Zopa taremehana Saemoni ia mane ta rivai leghutau ka kafuna bulumakau.