Col 2 | KjiSC | STEP | Na kabai ghini ta avohina ghau taghe niha ghorevaha na riva ghinina ara vanamuna ghau, nia ira ta au namo ka ia malau leghaha Leodisia e ghua, nia vanadina heiri haroharo ira ta toraina deo nga gedi avohoau ghu ara, e ghua.

Colossians 2

1 Na kabai ghini ta avohina ghau taghe niha ghorevaha na riva ghinina ara vanamuna ghau, nia ira ta au namo ka ia malau leghaha Leodisia e ghua, nia vanadina heiri haroharo ira ta toraina deo nga gedi avohoau ghu ara, e ghua. 2 Ara na kabai va gigima ghau, o mala kaike ghu ghau ka ia vari namahai. Ara na kabai ghini ghau haroharo ta au ghauna ira va beana ta namanama, ta meha ka ia toraina va fafahaki ghau ia nonomoho ka God, nia ta toraina avohina ne hohoghona ta ghuana, e ghua. Ara na kabai ghini ghau ta toraina avohina iahi, o mala age avohi ghu ghau ia nona vatovato God, neke deono geke va podoli ghu manei ka ira noni sepao. Fafahakanana iahi mu, ara na kabai ghini ghau ta avohina taghonai Kraes. 3 Kraes lama ta boka va avoavoho ghauna ta toka ghini ghauna ghu, ta mala va fafahakina ia nona nonomoho God, ia ta puina au lighorona taghe kaike popoika, ia ta ghua.

Kraes E Vanada Ia Kalasa Ta Hohoghona

4 Ara a va kahe ghini ghau iahi, e mala deo ghu hei ta boka age sebo ghauna ka ira turi va ohiohi ta nonomoho lotorodi. 5 Vununa geta deo ghu ara ga au taremehamu ghu ka ia tini ghe, ara na au taremehamu mo ka ia tarunga nia ake ngana ghau a fani ghua. Ara na va manemane ghu, vununa ghau no au ka ia doli ta mala aui ghau, nia ka ia au va gima ghau ka ia nomu va hohoghona ka Kraes, e ghua.

6 Ghau mu noto ke hioi Kraes Zisas taghe nomu Lod na, o torai leghui ma ghu manei o lao ghu. 7 O va kodolo hinae va veha laori gilioni zagharamu nira ka manei. Va malumi manei ta mala pakarainana dolimu nira, e age va gigima ghau laoni ghu ka ia nomu va hohoghona, taghe dike va kakahe ghini ghauro la. Nia o toraina va losa kakai ghau tudu ma taghomu ka kudoveha, e ghua.

8 Oka va malumi ghu hei noni ta batu ghini ghau kavena ka ira vari va kakahei ta sesebo nia ta deo lighorodi e ghua, geta meha ghu ka ira noni, ba ka heve mana ta muko ka malau iahi peka, ba ka ira nazahi, vununa leghu irahi nga mu edika meha ghu ka Kraes. 9 Oka va malumuri ghu noni irahi ta sebo ghauna, vununa ka tini noni manei, Kraes neke toraina to hio kamoti ia aꞌauna God. 10 Ghau mu neto ke vanamu ghu ia kamotona doli ka ia meha kaike taremehana Kraes. Manei mu e mana kaputuri leghu nazahi nga nia ira ta babatu ta kopu ghidi ira noni, e ghua.

11 Ka ia meha ghau ka Kraes, manei neke papahe va ghilaghila ghau, ghe eka ghua ghu ka ia papahe va ghilaghila ta riva ghini ia noni, nga ka ia papahe va ghilaghila neke riva ghinio Kraes, neke va kalasa ghauno ghu ka ira au dolimu ta muko. 12 Vununa ka ia seselebeana ghau mu, ia aꞌaumu ta muko, neke gilu ghini God taremehana Kraes, nia ghau noke tetu leghu ka ia doli foforu taremehana manei e ghua, vununa ghau noke rangerange ka ia mana leghaha God, ia neke va tetu leghuio Kraes ka ia leme.

13 Kenuna lao iahi mu, ghau mu taghe noke to leme noke ghua, vununa ghau noke muko, nia vununa ira puhimu ta muko neke deo nga ge kodaka kairi ghu, e ghua. Ianimu tuna ghe, neke va tetu leghu ghau nga God, mala auna ka ia doli foforu taremehana Kraes. God neke kai hazari ghu ira leghu muko nga ka ghita. 14 God neke guranga kairi ira kakangava ta zea ka ia pepa taremehadi ira ungene tatangana ka ia giliona, dake tapata ghidiro ghita, neke hio kairi ghu ka ia tupila ghidi lao ka ia hekefalahata Kraes. 15 Nia aianimu lamu neke age paufina Kraes, ia mana nia kopu ka ira nazahi. God neke va haghavari ka kenudi ira noni, ka ia meha paufuri maneri ka ia hekefalahata Kraes.

16 Oka va malumi ghu hei noni ta makutu ghauna no riva va muko ta ghuana, ka ia fafata deo ghau go leghuri ghu ira nodi puhi mala leghuri ghinina heve ia taka mala mahaini ghu, nia ketuhi ghu e ghua ghau. Oka va malumuri ghu ta makutu ghauna, no riva va muko ghau ta ghuana, ka ia fafata deo go va manemane varighara ghidi ghu ira ravata beana ka ira Ziu, taghe ia Ravata Mala Maghoso, ba ia Podolona Hihile, ba ira keha ravata va manemane varighara. 17 Leghutau irahi mu taghe kaike mamaelu dike ghua ma ghidira ira leghutau dike la meharo kenu mo. Toraina ghanonana mu taghonai Kraes. 18 Oka nomohori ghu heiri ira ta va kahe ghini ghau ta mala va totoana ghidira ira engizeli nia ta nai va hinae ghauna ka ia va vavahagala ghau taghomu, nia ka ia filu ghidi ira mahai nia ira leghutau e ghua. Noto leghuri la ghau vari va kakahei ari ka maneri, ghau o age siana ghini ghatu ia tabara neto ke naiungene ghini vanamuo God. Ta kaheina noni irahi mu taghodi edi auri keha kokolona avoavoho ghinina God, vununa dito ke finiri keha hahaima, edi ghua. Ira ngangana ka maneri mu edi meha ka ira ngangana taghodi, e age va hadu varangari ghu maneri. Nga torai hohoghonana mu, maneri e deori va fafahaka ta mala hadu varanga ghinina. 19 Maneri e deo gedi posi va gima lao ghu ka Kraes ia pauna ia tini kamoto. Manei lamu ta vanani gigimana ia tini, posi varighara ghidi harona, ta kodolona ghu ka ia ta kabai ghini God.

20 Ghau mu noto ke leme taremehana Kraes, nia neto ke va kalasa ghau manei e ghua, ka ira mana ta muko ka malau iahi peka. ?Heve ghu ghe, no au taghe nonidi ka malau iahi peka no ghua nga leghuri ma ta aura ghu ungene tatangana irahi: 21 “Oka posi kameu ghu iahi, oka mahaini ghu ianimu, oka ghirini ghu iahi,” ta ghua irahi. 22 Ungene va gigima irahi mu e ghidi ma ira leghutau ka malau iahi peka ta age deo lighorodi ma ghatu to age nogha la mala rivana. Maneri mu suna ungene va gigima ma nia vari va kakahei ma ka noni, e ghua. 23 Ungene tatangana ta kaheri irahi ira noni mu, taghe ta va dedeke ka avoavoho ta veha e ghua mamu. Ka ia fifinidi lao mu, agho taghe ta toraina namaha ghini fuludu God ka ia toraina au unuhu, ta va vavahagali ghu tiniu nia taghou no ghua, vununa ka nganganau nia agho mu, iahi ne age veha vanani God, no ghua. Ghe ka ia mala taga teturi ira ngangana nia lao hihingo ta muko ka ia noni mu, puhi mala leghuri irahi edi age deo lighorodi ma.