Colossians 3

Va Paluna Pagahaina: Ira Noni Ka Ia Kiloau Edi Nomohi Kraes 3:1–4:18

Hadu Ghini Ngangana Heve Neto Ke Riva Va Hokoto Vanamuna Kraes Nia Ghinina Ia Malau Ka God Fate

1Vununa ghau neto ke va tetu leghu ghau ka ia foforuna doli taremehana Kraes, o nai laori ghu hihingomu nira ka ira leghutau ta au ka malauo God fate, ka ia ta nohe Kraes ka ia nona nonohe ginitaukela ka mautunao God. 2O ngana va gima lao tudu ma ka ira leghutau ta au aianimu, nga eka ghua ghu ka ira leghutau ta au ka malau iahi peka. 3No riva ghidi nga ghau irahi mu, vununa ghau mu taghe noni ta leme no ghua, ghe ia noni ta leme e deo ge boka riva ghidi ma ge au ghu ira puhina ta muko. Ghatunaina mu ghau noto parekete taremehana Kraes ka ira nahalina God. Nia ira noni taka va hohoghona ghu tuna mu, e deo gedi va fafahaki ghu doli foforu nia ka ghau, e ghua. 4Kraes lamu ghasolonana ia doli foforu ka ghau, nia neto la leghu meha la manei ka malau iahi peka, ghe go age podolo taremehana haro nga molamo ghau, hio tufana ka ia pelarana varanga manei.

Heve E Ghua Au Taghe Ira Ta Leghui Kraes Ta Ghuana

5O nai kairi ira lao hihingo ta nona malau iahi peka, taghe ia zave peghuruna ia varihio, doli ta sota, nonoro nia ia ngagungagui ia ta muko, e ghua. Oka kabakabai leghutau ghu, vununa ia kabakabai leghutau mu eka haza ghu ma ka ia va totoanai nguzunguzu, e varifata ma ghu ka ia ta va totoana ghidi ghau ira leghutau ta ngagungagu ghidi. 6Vununa ghidi leghutau ta muko irahi, e la meha ghu ghatu ia haala ta mamaghuana ka God, ka fatedi heiri ira ta riva ghidi. 7Sepao, ghau noke fani au haro molamo ka ghaghahena doli iahi, ka ia fafata au leghu ghini ghau nga ia dolimu sepa. 8Ghe ghatunaina mu, ghau o toraina nai kaini ghu ia haala, ngaziri, konokono, va susura sebo, nia ngengene ta sota, e ghua. 9Oka vari sebo ghu, vununa ghau noto ke nai kairi ira ghaghahedi dolimu sepa, taremehadi ira riva ta muko ka doli ianimu. 10Ghatunaina mu ghau ira sopai noni haroharo, to age noni foforu. Ghau mu noto meha taghe ia neke va vuha ghauno noto ghua laoni, o age va fafahaka va veha laoini ghu manei ghatu. 11Ka doli foforu iahi mu, e deo ge tongovona ghu mu no noni Ziu ghau, ba deo go noni Ziu ghu, ta ghuana; ba no papahe va ghilaghila, ba deo, ta ghuana; ba no noni mehamu, ba ira noni ta bongihehe, ta ghuana; no noni mala varituhu, ba, deo go mala varituhu ghu ta ghuana, nga Kraes mo mu ta toraina tongovona fuludu laona, e au ghu manei ka giliodi ira nona noni haroharo.

12Ghau mu nona noni ghu God; manei neke namaha ghini ghau neke faete ghau ghu mala nona nonina taghonai. O toraina va poko ghau ghu taghomu ka vari dudumanai, varisute, au unuhu, va totoke, nia au vanemoho. 13Oka au ghu ka vari mukoi. Neto va haligho la ia keha noni, oka raghe leghui ghu, nga o au vanemoho ma. Ghau o toraina kai hazari ghu ira muko ka ira keha noni dike va muko ghauro, taghe neke ghuao la Kraes neto ke kai hazariro ira muko ka ghau. 14Ka fatedi lao leghu irahi nga mu, toraina tongovonana leghutau geala ta riva ghinina ghau mu, o vari namahai. Namaha lamu ghu mu ta posi varighara ghini ghau haroharona ghau, ka ia kaike au varighara ta toraina kamoto. 15O va malumi ia bule ta meha ka Kraes ta au leghu ghidira ira hihingomu, vununa ghau haroharo mu neke kudo varighara ghini ghau ka kaike tini mo ta mala auna ka ia bule. Nia kudo vehai tudu ma God, e ghua.

16Va malumi ia nonomohona Kraes ta toraina va foudurira hihingomu nira noto vari va kakahei la nia vari tatangana la e ghua, ka ira leghu avoavoho ta veha nga. Kudo vehai God ka ira hihingomu koze ghidira ira Samu, ira himu nia ira keha leghu koze beana nga, e ghua. 17Ka ira heve ta riva ghidi, ba kaheri ghau mu, geala o riva ghidi ghu ka ia ghaghahena ta va podoli ghau mu no riva vanani ia Lod Zisas, ta ghuana. O kudo vehai tudu ma ghu God ia noda Mama. Ghau o boka namo lao mo ka manei, vununa Zisas neto ke riva ghini ta mala bokaina mo ghau.

Ira Tatangana Ta Maladi Ira Fototatamana Ta Leghui Zisas

18Ghau ira ghaseboro, o au ka pekadi ira keramuau, vununa e ghua mamu ianimu rivana ka heiri ira ta leghui ia Lod.

19Nia ghau keradiau ira fotati tuna, o toraina namaha ghidi nia oka ngovangovalari ghu ira ghaseboromu, e ghua.

20Ghau rekaha, ghau o toraina riva ghidi tudu ma vahina leghutau nga ta va kahe ghini ghaura nomu ukeri nomu mamari, vununa ianimu lamu ta veha vananina ia Lod.

21Ghau ira mama, oka roroza ghidi tudu ghu ira tuumu, go va halari ghu. Noto ghua la ianimu ghau, maneri edi boka age muko hihingodi mo nia nodo tuna va sisiva riva ghinina heve ia ta lotoro, e ghua.

22Ghau ira noni mala varituhu; ghau o toraina nomohori tudu ma ira faghinamu ka malau iahi peka, ka ira vahina ta riva ghidi nga ghau. O va sisiva leleghu fafata ta va manemanerira; eka ghua ghu ma ka ira fafata ta mato ghau maneri. O ohoꞌoho ghini ta nomohorira, vununa ghini ia nomu heluhelu ta vanani ia Lod. 23O riva va ngazuluai nia va manemane e ghua ka ira heve ta riva ghidi ghau, taghe ta ghua nia riva vananina ia Lod o ghua, nga eka vanani ghu ia noni. 24O nganai ta age vanamuna ghatu ia Lod ia tabaramu ka heve ta mala hio kadolori ghau neke naiungene ghidiro manei maladira ira nona noni. Vununa Kraes ia Lod lamu no torai riva vananina ghau. 25Nga hei ia ta riva va zea mu, e age hio ghini tabara mo ghatu manei va zezea ianimu, vununa varifate ta vanadina God heiri haroharo mu, eka kaike pelo ghu.