Col 4 | KjiSC | STEP | Ghau ira faghina, ghau o toraina hio suteri ira nomu noni mala varituhu ka ia ghaghahena ta totonu nia lotoro, e ghua. O nganai ta kuru faghinamu harona molamo ghau ka malauo God fate.

Colossians 4

1 Ghau ira faghina, ghau o toraina hio suteri ira nomu noni mala varituhu ka ia ghaghahena ta totonu nia lotoro, e ghua. O nganai ta kuru faghinamu harona molamo ghau ka malauo God fate.

2 Ghau haroharo o tarai tudu ma nia o toraina mato va veha ghau taghomu e ghua, noto tarai la, nia o kudoveha lao ka God, e ghua. 3 Ka fafata iahi haro la, ghau o tarai toka ghini ghai haro molamo, mala God e age vanamai ghu ia fafata ta veha mala tuturi beana ghinina ia nonomohona Kraes neke deono ge torai podolo ghu ka ira noni sepao. Ne ghua mamu iahi ghe, na au nga ara ghatunaina ka pipiliga. 4 O tarai ghini ghu ta mala va ongahina ara nonomoho iahi geala ka ia ghaghahena ta toraina age fafahaka va veha ka manei.

5 O vatovato ka ira heve ta riva ghidi noto au taremehadi la ira noni taka va hohoghona ghu ka Zisas. Leleghu fafata e au kaike fafata ta veha mala turi taremehadira ghau ira noni ghinina Zisas, o riva ghini va veha ghu. 6 Ira ngengene ka ghau geala e namanama tudu ma nia geala edi vari hivoro e ghua, e mala age kuru ghau ungene tughu ta lotoro ghu ka heiri haroharo ta notoho ghau.

Va Nonoghadi Ungene Veha Ka Polo

7 Tikikasi ta va kahe ghini ghauna ghatu mu vahina tuturigura nga ara. Manei mu kaike tahida mane ka Kraes ta namaha ghini fuludu ara. Manei mu kaike mane toka ta hohoghona ta riva vanani ia Lod taremehagu ara. 8 Ara na tuhu ageina manei ka ghau, mala age va kahe ghini ghauna heve ne dufu ghaina ghai, nia ta mala va gigima ghauna, e ghua. 9 Ara na tuhu agei manei taremehana Onesimasi ia tahida mane ka Kraes ia ta riva hohoghona, ta namaha ghini ghu ghai, ia tanina haro ka pukuna nia ghau. Maneri ta age va kahe ghini ghaura nga ghatu, vahina leghutau ta dufu idi nga aiahi.

10 Arisitakasi, ta au tagu iahi ara ka pipiliga ini nia Maki ia tahina va kakadolo Banabasi e ghua, di vanamu age nodi ungene veha ka ghau. (Ara nato ke kusu vanamu ungene babatu ta mala riva ghinina ghau ka Maki. Neto meha la manei, o hio namahi ghena.) 11 Zisas ia ta va kudo ghini Zasitasi ghai, ne va ghahe age nona ungene veha haro molamo. Lito mane irahi lama mu, noni Ziu ta va hohoghona di riva taremehagura ara aiahi vananina ia ravutu ka God. Maneri mu toraina kaike leghahai va kakapoto ka ara.

12 Epafarasi, ia nona noniriva Zisas Kraes ta au ka pukuna nia ghau, ne va ghahe age nona ungene veha haro molamo. Manei e tarai toka ghini ghau va gigima tudu ma, ta mala tetu va gimana ghau, ta kodolo va zeolona ghu ka ia tarunga, nia ta toraina age va hohoghonana ghatu ghidira ira vahina ta kabai ghini ghau nga God ta riva ghidira. Manei ne kabai ghini ghau ghu ta riva ghidira ka ia ungene nonomoho. 13 Ara na avohi mo ta torai riva va gigima vanamuna manei ghau nia ira noni kiloau ka ira malau leghaha Leodisia nia Hierapolisi, e ghua.

14 Dokita Luku ia nomai baere ta namaha ghini fuludu ghai nia Dimasi e ghua, di va ghahe age nodi ungene veha ka ghau. 15 O vanadi nogu ungene veha irahi ira tahigu ka Kraes aianihi Leodisia, nia ka ia fotati Nimifa, nia ka ia kiloau ta varighara ka sugao manei, e ghua.

16 Leghuna izumi ghau leta iahi, ghau o toraina ke la izumi haro molamo ka ia kiloau aianihi Leodisia. Nia ghau o fanga tadi haro molamo ia leta nake kangava vanadi laono ara maneri, o izumi ghu.

Ira Va Nonoghadi Ngengene Ka Ia Leta

17 Nia o va kahe ghini Arikipasi, “O toraina va hokoti ia riva neke vananighono ia Lod,” o ghua ghini.

18 Kehara neke kangava vanagu hinaena leta iahi, ghe ara Polo na kangavina mu ungene veha iahi ka kamegu ini taghogu, o mala age avohi ghu ghau leta iahi mu neka toraina sipa meha mamu ka ara ta ghuana.

Go ngana kaini la ta au ini ara ka pipiliga. Ara na tarai e age vanamu ghu God ia varisute ta vanada kakato.