Eph 1 | KjiSC | STEP | Leta iahi mu sipana ka ara Polo neke faeteauna God mala nona mane nonomohona Kraes Zisas. Leta iahi mu na kangava vanadi lao ara ira nona noni God ta au Efesasi ta leghui ta au ghu Kraes Zisas ta au parekete taremehana ghu manei.

Ephesians 1

Va Kenuna Pagahaina: Ia Papala Ka Kenuna God Ta Kururi Heiri Ira Ta Leghui Kraes 1:1–3:21

Ira Ungene Veha Ka Polo

1 Leta iahi mu sipana ka ara Polo neke faeteauna God mala nona mane nonomohona Kraes Zisas. Leta iahi mu na kangava vanadi lao ara ira nona noni God ta au Efesasi ta leghui ta au ghu Kraes Zisas ta au parekete taremehana ghu manei. 2 Ara na verevere fangai God ia noda Mama nia ia Lod Zisas Kraes mala vanamuna ia bule nia ia varisute ta vanada kakato.

Ira Veha Ta Meha Ka Kraes

3 Ghita da helahela ghini God ia nona Mama ia noda Lod Zisas Kraes, ia ta va beana ghita ka vahina leghutau ta veha nga ka malauo God fate, mala toka ghidira ira tarungada, vununa ghita mu nona noni Kraes. 4 Sepao laoni, ghe neke va vuhai nga malau iahi peka God, manei neke to kusu faete ghita ta mala nona nonina taghonai ka ia parekete taremehana ghita Kraes, mala age noni beanana nia mamalahuna ghita ka nahalinaro taghonai. Nia vununa ka ia nona namaha vanada ghita, 5 God neke to kusu nai hihingona ta mala meha va nona rekaha ghitana taghonai ka heve neke to riva ghini va noghao Zisas Kraes. Neke riva ghini nga God iahi mu, vununa manei neke veha vanani neke kabai riva ghini ghu. 6 Ghita da helahela ghini ghu God ka ia nona pelarana varisute ta vanada kakato manei neke ghasolo vanada mehao, vununa ka heve neke riva vanadao ia Tuuna ta namaha ghini fuludu manei. 7 Manei mu e toraina foudi ia nona varisute ta vanada kakato, neke tabara kave ghita ghu ka ia busakana ia Tuuna, kai hazarira sasake idi ka ghita. 8 Manei neto ke oranga mehai ka fateda ghita ia nona varisute ta vanada kakato, taremehadi ira leghu nona avoavoho ta lotoro nga nia va fafahaka nga, e ghua.

9 God neke leghui ia nona lao nanafa, neke va podolo vanada ghu ia nona vatovato neke poikao sepao. Manei neke riva ghini ghu heve ia neke mala age riva ghini va hokotono ka Zisas Kraes. 10 Iahi ghu mu vatovatona ka manei: Ka ia lotorona fafata ta naini taghona, manei e age hio varighara ghidi ghatu ka pekana ia mana mala kopu Kraes ira vahina leghutau nga ka malauo God fate nia ka malau iahi peka, e ghua.

11 Vahina leghutau nga mu e riva ghidi va hokoto leghuina ia vatovato nia ia ngangana ka God. Manei neke faete ghai ghu, ghai ira noni Ziu, ta mala meha nona nonina taghonai ka ia parekete taremehana Kraes, vununa ka ia ghini ia nona vatovato taghona ia ta va dedeke ka heve neke to va puhinio manei ka ia torai tatanigaina mehani. 12 Manei neke riva ghini ianimu, mala ghai ira noni Ziu nake kusu rangerangero ka Kraes, geala a helahela ghini ghu ia varanga ka God.

13 Nia ghau, ira taka Ziu mu, noto ke meha nona noni haro molamo God ka ia fafata nomohimu, ta va hohoghonai ghu ia vari va kakahei ta hohoghona, ia Nonomoho Ta Veha ta vanamu ia doli soduai. Ka ia va hohoghonai ghau Kraes, God neke vanamu ia Tarunga Ta Maduana neke naiungene ghinio sepaoni mala va podolina, ghau mu ira nona noni taghonai God, ta ghuana. 14 Vununa God neto ke vanada ia Tarunga Ta Maduana, da boka toraina avohi mo ghu ghita mu ta toraina age hio kadolorira ghita ghatu vahina leghutau nga neke nai ghidi ungenero God. Ghita da age hiori leghutau irahi ka ia leghu mehana God, e toraina age va kalasari hohoghona ghu ghatu ira nona noni taghonai. Ghita da helahela ghini God ia ta varanga.

Ia Tarai Ka Polo

15 Vununa ka leghutau neto ke riva vanada irahi ghita God, ara ka ia tatanigai nomohiguni ia nomu va hohoghona ta torai gigima ka ia Lod Zisas, nia ka ia nomu namaha ta vanadi ghau ira noni ka God hae ghe hae ghu e ghua, 16 nato ke deo ghu nodoguna kudo vehaina God ghini ghauna ghau. Ara na verevere toka ghini ghau ma na au ghu, 17 fangaina God, ia nona Mama ta pelara varanga ia noda Lod Zisas Kraes, mala vanamuna ia Tarunga ia ta age vanamu avoavoho ta lotoro, ta va podolo vanamu ghu God, mala avohina ghau taghonai. 18 Ara na verevere fangai ghu God e mala tobeheri ghu ira hihingomu, o mala age va fafahakari ghu ira leghutau ta veha ta mala age vanamu manei. Ghau no avohi mo ta age hio kadolorira ghau leghutau irahi, vununa manei neke kudo ghau ta mala meha nona nonina.

19 Ara a verevere toka ghini ghau haro molamo mala age va fafahakina ghau ia nona mana ta varanga manei ia ta toka ghini ghita, ghita ira ta va hohoghona. Mana ta toraina gigima haro iahi lamu neke mala rivana God, 20 ka ia va tetu leghui manei Kraes ka ia leme, neke va noheio ghu ka ia nonohe va vonavona ka mautunao mo God ka nona malauo fate. 21 Kraes ka malauo God fate, e mana kaputuri ira engizeli nia ira nazahi ta muko nia ira vahina kokolodi mana nga, e ghua. Nia ia babaolona manei tuna ge toraina tongovona fuludu laori ghu ira babaolodi heiri haroharo ira ta auri mana, e ghua. Iahi mu e hohoghona ghatunaina nia e age hohoghona toghunai, e ghua. 22 Nia God geto ke nairi ghu vahina leghutau nga ka ia pekana mana mala kopu Kraes, neke vanani ghu mana mala kopu iahi malanana ia veha ka ira noni ta va hohoghona ka manei, neke ghua. 23 Ira noni ta va hohoghona mu to meha tinina ghu Kraes, e fouduri ghu ia dolina Kraes. Nia ia dolina Kraes tuna ge va foudu va hokotori ghu vahina leghutau nga hae ghe hae ghu, e ghua.