Eph 3 | KjiSC | STEP | Ka va fafahaka iahi, ara Polo, na verevere fangai God malana ia veha ka ghau. Ta au ini ara ka pipiliga mu, vununa ara na tuturi ghini beana ia Nonomoho Ta Veha ghinina Zisas Kraes vanamuna ghau ira noni taka Ziu ghu.

Ephesians 3

Ia Riva Ka Polo Vanadi Ira Noni Taka Ziu Ghu

1 Ka va fafahaka iahi, ara Polo, na verevere fangai God malana ia veha ka ghau. Ta au ini ara ka pipiliga mu, vununa ara na tuturi ghini beana ia Nonomoho Ta Veha ghinina Zisas Kraes vanamuna ghau ira noni taka Ziu ghu. 2 Ghau mu to avohi neto ke vanaguna ara God nenemana riva beana iahi ka ia nona varisute ta vanada kakato manei, mala toka ghini ghauna ghau ira taka Ziu ghu. 3 Taghe nake turi ghini birusuna ageo la ara nihaoba ka leta iahi, taghonai God lamu neke va podolo vanaguna mu ia nona popoikana ngangana. 4 Ka ia izumuri ghau heve ta kakangava ghidi age idi ara ghe, go age va fafahakari nga ghau ghatu heve na avohina ara ka ngangana popoika ghinina iahi Kraes. 5 God e deo geke va podolo vanadi ghu ira pagusudi noni sepao, ghe ghatunaina ka ia Tarunga Ta Maduana, manei neto ke va podoli iahi ka ira nona mane nonomoho ta beana nia ka ira porofeti ta beana, e ghua. 6 Iahi lamu popoikana vatovatona ka God: Ira noni taka Ziu ghu nia ira noni Ziu e ghua, ta va hohoghona ka ia Nonomoho Ta Veha mu, edi varifata ma heve tufa ta hioina ka ira leghu taghotagho ta mala hio kadolori nga ira nona rekaha God. Palu butubutu haro irahi edi taremehana haroma ghu kaike tini iahi, edi au va ghazaghaza haroma ghu ka ira naiungenedi va beana neke riva ghidiro God ka Kraes Zisas.

7 Ka ia nona varisute ta va meha kakatoi nia ka ia nona mana ta fefereana e ghua, God neke vanagu riva ta namanama iahi mala riva vananina ka ia va ongahi ia Nonomoho ta Veha. 8 Ara lamu ta toraina au va nonoghanana pekani ka ira leghu nona noni nga God, ghe God ka ia nona varisute ta va meha kakatoi, ne soni vanagu mo ara riva mala hio va dufui iahi ia Nonomoho ta Veha ka ira noni taka Ziu ghu, mala va kahe ghidira ira taghotagho ta deo va nonoghadi ta au ka Kraes. 9 God neke va vuhariro vahina leghutau nga, neke kabai ghinagu ta va podolo vanadina ara ira noni haroharo ia popoikana vatovato neke poikai ma neke mehao ghu manei ka ia tatanigainani. 10 Ka ira vahina leghutau ta riva ghidi nga God, manei e lotoro hohoghona ira nona avoavoho. Manei ne nai varighara ghidi ka ia kiloau ira noni Ziu nia ira noni taka Ziu ghu e ghua, mala va podolo kaveina ghatunaina ia avoavoho ta lotoro ka manei ka ira engizeli, ira nazahi ta muko nia ira tarunga, e ghua. 11 Iahi ghu mu ia nona ngangana toghunaina God, neke riva ghinio manei ka Zisas Kraes ia noda Lod. 12 Vununa ka ia parekete taremehana Kraes nia ka ia noda va hohoghona ka manei e ghua, da boka meha ghu tuna ghita ka God ka ia gigima, deona gada maugheda ghu ka kenuna manei. 13 Oka muko hihingo mu la ghu ghau ka ia fafata vavahagala ara vanamuna ghau. E malana ia veha ka ghau lamu ghe na vavahagala nga ara, geala e vanamu va vonavona ghu ghau.

Ia Namaha Ka Kraes Vanada Ghita

14 Ka ia fafata nganari ara leghu irahi nga, ara na torongaghituturu hinae, na verevere lao ghu ka ia Mama, 15 ia va vuha ka ira vahina leghutau nga ka malauo God fate nia ka malau iahi peka, e ghua. 16 Ara na verevere fangai God, mala ka ira taghotagho ka ia nona varanga, e age vanamu mana ghu manei ka ia nona Tarunga, mala age va gigimarira ira dolimu. 17 Ara na verevere fangai ghu ta mala age au tuduna Kraes ka ira hihingomu, vununa ka ia nomu va hohoghona ka manei. Ara na verevere fangari molamo ira vahina leghutau ta riva ghidi nga ghau, ta age riva ghidira ghau ka ia namaha ta meha ka God. 18 Nia ara na verevere fangai, mala ghau nia ira nona noni haro God e ghua, o mala age kuru ghau ghu ia mana mala va fafahakina taghe niha ghu mu bobonana, sodunana, vonanana nia hinaenana e ghua, ia namaha ka Kraes. 19 Geta mamarutana ghu ta torai va fafahakina ia namaha ka Kraes ghe, ara a verevere fangai ta age avohina ghau namaha ianimu. Ka ia avohi ghau ia namaha ka manei, ira puhimu ghau taghe ira puhina God edi age ghua ghatu.

20 !Ghita da va varangi God! Vununa ka ia nona gigima ta toraina mana ta riva gilioda ghita, God e boka riva ghidi mo tehi leghutauni fuludu laorira ira leghutau ta fangari, ba ta nganari ghita. 21 Ghita da helahela ghini ghu God, vununa ka ia nona varanga ta boka fini laoi ira keha noni ka ira nona noni nia ka Zisas Kraes e ghua, ka ia kamotona fafata, e au toghunai ghu. Amen.