Eph 5 | KjiSC | STEP | O deke leghui ia nai malaba ka God ka ira vahina leghutau ta riva ghidi nga ghau, vununa ghau mu ira nona rekaha ta toraina namaha ghini ghau taghonai.

Ephesians 5

Au Ka Giliona Ia Doli Ta Fegala

1 O deke leghui ia nai malaba ka God ka ira vahina leghutau ta riva ghidi nga ghau, vununa ghau mu ira nona rekaha ta toraina namaha ghini ghau taghonai. 2 Au ka ia doli ta foudu ka ia namaha, leghuina ia nai malaba ka Kraes. Manei neke namaha ghini ghita neke vanada ghu taghonai taghe kaike veala ta longara veveha ta veha vanani God, neke ghua.

3 Oka va malumu ghau ghu taghomu ta auna ka ia doli ta zave, sota, ba kabakabai leghutau. Kokolodi sasake irahi mu, e deori malau ka vari hoataidi ira nona noni God. 4 Oka turi ghu ka ira ngengene ta sota, kingo ba ka ira va sire ta muko. Nga o kudo vehai God mo. 5 Ta avoho va vehaina ghau mu, e deo hei noni ta zave, sota ba kabakabai leghutau mu, ta boka age hio kadolina kaike tufa ghu ka ia Ravutu Kraes nia God, e ghua. Vununa ia kabakabai leghutau mu kaike ghaghahena va totoana lao ka ira nguzunguzu.

6 Oka va malumi ghu hei noni ta sebo ghauna ka ira ngengene ta kingo, e veha mo koini riva ghidira ira leghutau ta muko, ta ghuana ghu ghau. Vununa ka ia ghidi toraina leghutau irahi lamu, ta la mehana ghatu ia haala ka God ka fatedi heiri haroharo ira ta huhughi manei. 7 Oka la holara ghu ka ira leghutau ta riva ghidi noni irahi. 8 Ka kaike fafata, ghau noke au ka giliona ia nagoromo, ghe vununa ghau noto meha nona noni ia Lod ghatunaina, noto au ghu ka ia fegala. O au taghe ira noni ta nona ia fegala, o ghua ghu. 9 Nia o va pelari ia fegala ka ghau. O veha, lotoro nia hohoghona e ghua. 10 O va sisiva hadu kavei ghu heve mu ta veha vananina ia Lod. 11 Oka holara riva ghidi ghu ira leghutau ta deo lighorodi ta riva ghidi ka ia nagoromo. Nga o va podolo kaveri ka maneri ta mukona leghutau iranimu. 12 E toraina hahaghavana haroma ghe ta turi ghidira ghita ira leghutau ta riva ghidi poika maneri. 13 Ghe ia fegala e toraina age va podolo kavei taghe heve di ghua mukodira leghutau irahi, 14 vununa ia fegala ne va podolo kaverira vahina leghutau nga. Ne ghua mamu ghe di kahe ghua nga keha nonira,
“Agho ta epu, o baghunu, o avohori ghu ira sasakeu,
taghe ia tetu leghu ka ia leme ta ghuana, o va malumi ghu God mala vananigho doli foforuna,
ianimu tuna ghe ge age pelara nga ia fegala ka Kraes ka ia hihingou.”

Au Ka Ia Mana Ia Tarunga

15 O banabana ghini ghu ia au doli ka ghau. Oka au taghe ira noni ta kingo oka ghua ghu, nga taghe ira noni ta auri avoavoho ta veha, o ghua. 16 O va sisiva ka giliodi leghu fafata teri ta veha nga ta riva va vehana, vununa irahi nga ravata mukodi. 17 Oka kingo la ghu, nga o va fafahaki heve ne kabai ghini ghauna ia Lod ta riva ghinina ghau. 18 Oka ketuhu gogosu la ghu ka waeni, vununa ianimu e toraina age ngovali ia doli ka ghau. Nga o va malumi ia Tarunga Ta Maduana ta va foudu ghauna nia ta babatu ghini ghauna, e ghua. 19 Noto au ghemu varighara la, o helahela ghini God koze ghidira ira Samu, ira himu nia ira koze beana, e ghua, ka ia helahela ghini ia Lod ka ira hihingomu kamoto. 20 Nia kudo vehai tudu God ia Mama ka ia babaolona ia noda Lod Zisas Kraes ghidira vahina leghutau nga.

Ira Ghaseboro Nia Ira Keradiau

21 Vununa ghau no va vonavonai Kraes, o toraina lao hihingomu palu pelo ghu riva ghidira ira sopai lao hihingo ka ghau. 22 Ghau ira ghaseboro, o lao hihingomu riva ghidira ira heve ta kabai ghidi ira sopai keramuau, taghe ta ghua ghini niala ghau ia Lod. 23 Ghau o ghua ianimu, vununa ia mane keranau lamu mane babatunana ia ghaseborona, taghe Kraes la ia mane babatuna ia kiloau. Taghonai Kraes lamu Va Dolina mu ka ia kiloau, ia tinina taghonai. 24 Ira ghaseboro mu edi toraina lao hihingodi ghu riva ghidira heve ira vahina leghutau ta kabai ghidi nga ira sopai keradiau mane, taghe ia kiloau ta lao hihingona la riva ghinina heve ia ta kabai ghini Kraes.

25 Nia ghau ira keradiau ira fotati tuna go toraina namaha ghidi ghu ira ghaseboromu o ghua, taghe Kraes ia ta namaha ghini ghita la ghita ira nona noni ta va hohoghona, neke vanadao ghu ia dolina mala leme vanadana. 26 Manei neke leme vanada ghita mala va maduana ghitana. Manei neke sesele va mamalahu ghita ghu ka ira sasake ka ia fafata nomohida ghita ia saorona God dake va hohoghonao ghu, nia ka ia sesele ghini ia kolo seselebeana, e ghua. 27 Manei neke riva ghini iahi, vununa ka ia age hio varighara ghidi manei ghatu ira ta va hohoghona ka kenuna taghonai, manei e kabai ghidi maneri taghe kaike fotati ta varihio foforu ia ta toraina ghase veha ghena, ta age ghuana. Maneri mu edi va vona poko ta deo sotadi ghu, ba taka ghopo ghu nia ira tinidi e deo lelemeanadi, e ghua. Nga edi age maduana nia lotoro edi ghua mo. 28 Taghe iala edi ghua molamo ira mane keradiau ira fotati, edi namaha ghidi ghu ira ghaseborodi, taghe ta namaha ghidi ari la tinidi ari taghodi. Ia mane neto namaha ghini la ia ghaseborona mu, ne toraina va podoli ta namaha ghinina taghonai. 29 E deo hei ka ghita mu ta hakohako ghini ghenana ia tinina taghonai, nga e valihai nia e kopuna ghini e ghua, taghe Kraes la ia ta kopuna ghidi heiri ira ta va hohoghona, ia nona kiloau, 30 vununa ghita ira ta va hohoghona ka manei mu ira keha pelona ia tinina manei.

31 Taghe ia ta kahei la ka ira Kakangava Ta Maduana, “Ia mane e ghahe kairi nona mama ghe nona uke, e la au parekete taremehana ghu ia ghaseborona, edi mala meha kaike noni ghu maneri palu,” ^{▼▼5:31 Tatanigaina 2:24} ia ta ghua. 32 Kaike leghahai popoika ta hohoghona mu e au ka Kakangava ta Maduana iahi, ghe ka ia va fafahaka ara, iahi mu ne va podoli ia ghaghahena ta kaike Kraes nia ia kiloau, e ghua. 33 Ara ake kahe leghuini, ira leghu mane keradiau nga ira fotati mu edi toraina namaha ghidi ira ghaseborodi, taghe ta namaha ghidi ari la taghodighi, nia leghu ghaseboro nga tuna gedi heluhelu ghidi ghu ira keradiau, e ghua.