Gal 2 | KjiSC | STEP | Leghuna tazoi rodana komuhu ara nake leghu laoni Zerusalemu taremehana Banabasi hio taremehagu lao harona Taetusi.

Galatians 2

Ira Mane Nonomoho Di Hioi Haro Polo

1 Leghuna tazoi rodana komuhu ara nake leghu laoni Zerusalemu taremehana Banabasi hio taremehagu lao harona Taetusi. 2 Nake lao nga ara mu, vununa God neke va podolo vanagu ta mala laona ara aianimu. Ka kaike haedu nenemana taremehadi ira ta babatu ka ia kiloau, ara nake la va fafahaka vanadi ia Nonomoho Ta Veha nake to tuturi ghini beana nake mehao ghu ara ka ira noni taka Ziu ghu. Ara nake toraina kabai avoho va vehai ta kaheina maneri ne lotoro mo vari va kakahei ini ka ara ta ghuana. Gedi ke kahei la maneri neke deona ge lotoro ghu, ianimu ghu mu ia riva beana ka ara sepao nia ghatunaina e ghua mu, neke age deo lighorona ma. 3 Maneri dike zuka ghinagu ghu ara, nia e deo ghe gedi ke kahe va gigimai haro ghu ta mala papahe va ghilaghilaina Taetusi ia mane taka Ziu ghu neke va nunumauo ara.

4 Ghai nake turi ghini leghutau ianimu, vununa keha nonira dito ke haghele meha ka ia kiloau Kraes mala sigho ghini ghai poikana, dike kahei ghu ka ira sesebo maneri, taghodi mu ira noni ta va hohoghona, ta ghuana. Maneri lamu dike kahe va gigimaina ta mala papahe va ghilaghilana Taetusi. ^{▼▼2:4 Ira noni Ziu dike kururi tehi vetula dike va sisiva leghurira mala meha lotorona ka kenuna God. Ia papahe va ghilaghila mu neke kaike tongovona vetula ka maneri, vununa neke va podoli maneri mu kaikeu ka ira noni Ziu dike leghuriro ira vetula ka God, ta ghuana.} Maneri dike haghele meha mala toraina va sisiva ngovala va mukoina ia au va kalasa ka ia au vari parekete ghai taremehana Zisas Kraes. Maneri dike suna kabai ghini ghai ma ta auna ma ta laona ghu ka pekadi ira ungene tatangana ka ira Ziu. 5 Ghe ghai nake pake ghemai nomohorira ka kaike birusuna fafata tei ghu. Ghai nake kabai ghini ghau ta va hohoghonai ma ta laona ghu ia hohoghonana ia Nonomoho Ta Veha nake va kakahe ghini ghauno.

6 Nia ira ta babatu ka ia kiloau dike auro aianimu, e deo heve dike nai haghele laoinani ka heve nake tuturi ghini beanao ara. (Uve, ira puhi au ta va noni babaturi maneri, e deo ma heve ne hazana ka ia fifini ara, vununa ka ia nahalina God mu ira noni haroharo edi varifata ma.) 7 Maneri dike fini avohi neke to vanaguna God ia riva ta mala va ongahi ara ia Nonomoho Ta Veha ka ira noni taka Ziu ghu, taghe neke ghuao la neke to vananio manei Pita ia riva ta mala tuturi vanadi beana ira Ziu. 8 Vununa taghe God neke riva harono lama ka Pita ia ta mala mane nonomoho ka ira Ziu, neke riva harona ka ara ia ta mala mane nonomoho ka ira taka Ziu ghu. 9 Zemesi, Pita, nia Zone e ghua, ira ta toraina tongovodi ka ira hibadi ira noni kiloau, dike fini avohi neke vanaguna ara God riva iahi. Maneri dike kubae taremehana ghu Banabasi nia ara e ghua, mala va podolina ka maneri haroharo ta kaike nganganamaina ghai, dike hio ghai ghu ghai nia ia nomai vari va kakahei, e ghua. Maneri dike va uvei ghu geala ta tuturi beana ma ta laona ghu Banabasi nia ara e ghua ka ira noni taka Ziu ghu, ka ia fafata ta tuturi beana ta au ghu taghodi ka ira noni Ziu. 10 Kaikena leghutau dike fanga ghaina maneri ta mala riva ghinina ghai mu, ia ta mala toka ghidi ira noni ta va hohoghona ta kuma ani Zerusalemu, ia leghutau nato ke puina hagalai riva ghini tuduo ara.

Polo Ne Buruai Pita

11 Kaike fafata Pita neke meha au taremehamai ghai ira noni kiloau aianihi Anitioko. Ka fafata ianimu manei neke riva ghidi keha leghutau ta toraina zea, nake buruai ghu ara ka kenudi ira noni kiloau. 12 Ka ia kusu la sabarana aianimu, Pita neke to mahai taremehadi ma neke meha ghu ira noni kiloau taka Ziu ghu, ira ta deo gedi papahe va ghilaghilari ghu. Ghe leghunana, di la meha ghu ira Ziu ta baere ka Zemesi, Pita neto ke deo ke mahai taremehadira ira taka Ziu ghu, vununa manei neto ke maughidi ghena ira Ziu ta turi va mukoina. 13 Leleghonana mu, ira keha Ziu ta noni kiloau dike leghui haro molamo tatangana kobiri iahi ka Pita. Geta ghua ghu Banabasi ghe neke to age ghahe va zea haroma ka tatangana kobiri iahi maneri.

14 Na finini ghu ara tadi deona maneri gedi leghu va lotori ghu ia hohoghonana ia Nonomoho Ta Veha, nato kahe ghua ghini lao ma iahi Pita ara ka kenudi maneri haroharo, “Agho Pita mu kaike noni Ziu, ghe agho no au taghe kaike noni taka Ziu ghu, no ghua. ?Heve no ghua ghu agho ghe, no ghorevaha ghini nga ta mala au taghe ira noni Ziu ta ghua ghidira ira noni taka Ziu ghu.

15 “Agho nia ara e ghua mu dake doli Ziu, e deo ghu ghita taghe ira noni taka Ziu ghu ta ghuana, ira ta deo gedi avohi ghu ia vetula ka God. 16 Ghe ghita ira noni Ziu ta noni kiloau tuna, gada avohi ghu mo mu ta boka meha au va lotoro taremehanana God ia noni ka ia nona va hohoghona ka Zisas Kraes e ghua, nga eka ghua ghu ka ia riva ghini ia heve ta kahe va gigimai ia vetula. Ghita dato ke va hohoghona haroma ka Kraes Zisas, mala boka nai va lotoro ghita taremehanana God ka ia noda va hohoghona ka Kraes, nga vununa da leghui ia vetula eka ghua ghu. Vununa e deo kaike noni ghu mu ta boka nai va lotoro taremehanana God ka ia ta suna leghui ma ia vetula.

17 “Kehara ka ira Ziu edi nganai ta kuru sasakedana ghita vununa ghita da va ghighiu ka Kraes mala age lotorona ka ira nahalina God, nga eka ghua ghu ka ia leghui ia vetula. ?Heve, fafahakanana ianimu ghu mu Kraes ne va sasake ghitana, vununa ta deo ini ghita gada leghui ghu ia vetula? !Toraina deo! 18 Nga e age hohoghona mo mu ta mane rivai sasakena ara, nato ke leghu lao la, ke la leghuinani ia vetula mala lotorona ka ira nahalina God; ia vetula nake to sokeio ara. 19 Sepao ara nake au ka pekana ia kopu ka ia vetula ira Ziu. Na age va fafahaki ghu ta deona ge boka age nai va lotoroau ghu ka ira nahalina God, ara nake nai kaini kamoto nake leghui ghu God. Taghe ta ghua nia nake leme ka ia hekefalahata ara taremehana Kraes, e ghua. 20 Eka ara la ghu mu ta doli ini, nga Kraes mo mu ta doli ini ka ara. Ghatunaina mu ara na au ghu ka ia doli ta va hohoghona lao ka ia Tuuna God, neke namaha ghinaguo, neke vanaguo ghu ia dolina taghonai. 21 Ghita mu da lotoro nga ka ira nahalina God mu vununa ka ia nona varisute ta vanada kakato manei, nga da leghui ia vetula ka ira Ziu, eka ghua ghu. Ara e deo ga boka nai kaini ghu ia nogu va hohoghona. Vununa leghuina ia vetula neto boka nai va lotoro ghita la ka God, e age deo fafahakana ma ghu mu ia leme ka Kraes.”